Read nande 2 Abanya Korĩnto 5 Bible Online

2 Abanya Korĩnto 5 - nande bible

2 Abanya Korĩnto 5

¹Kusangwa tũnasĩ ehema eyo tulimo, muna-kihugo yamabĩhĩmbũlwa, neryo tukandisyabya nʼenyũmba eyĩkalũa uku Nyamuhanga, eyĩtahĩmbawa omo byala, eyikandisyakota elubula.

²Kusangwa tũkasĩmba omo nyũmba eyĩ, ĩtũnanzĩre kutsibu eribana obwĩkalo obũkalũa elubula.

³Neryo twamabibanabo isitwangabanika tutawite omubiri.

⁴Kandi omugulu tukine omo hema yʼeno, tũkasĩmba ĩtũkanũbĩbawa. Sĩtwanzĩre erireka omubiri wʼeno, nĩkwa twanzĩre eribana omubiri wʼelubula, neryo omubiri wʼengebe atoke eribya omo mwanya wʼomubiri owakahola.

⁵Neryo Nyamuhanga abĩrĩtũtegekanĩa busana nʼomwatsi oyũ, kandi abirituha Omũlĩmũ mo omuwato.

⁶Neryo tukahanda omutima emigulu yosĩ. Kusangwa ĩtũnasĩ omugulu tukine omo mubiri Situli eka wʼOmukama.

⁷Kusangwa tukakwama omwʼĩkĩrĩrya, butsira omwʼilangira.

⁸Neryo tukahanda omutima, ĩtũnanzĩre erĩlũa omo mubiri oyũ, nʼeribya ewʼOmukama.

⁹Neryo ekyo twanzĩre ndeke nĩ ʼtsemesya Omukama, kutse eno, kutse ewuwe.

¹⁰Kusangwa litolere ĩtwe bosĩ itwahuluka embere sya Kristo nʼeritswerwa naye, neryo obuli mundu inialihwa busana nʼemikolere eyo akola omo mubiri wuwe, yamabya ĩyowene, kutse yamabya ini mibi.

¹¹Neryo kusangwa tũnasĩ olubahwa lwʼOmukama, tukahanirira abandu, nĩkwa tuminyikere uku Nyamuhanga; kandi tuli nʼamaha ko mwasyatuminya ndeke omo mitima yenyũ.

¹²Sĩtũlĩyĩmĩnyĩsaya ũkwʼĩnywe nga babuya, nĩkwa tukabaha omwatsi owangaleka imwayihalamba busana netu, imwatoka erĩsũbĩrya abakayihalamba busana nʼerilolwako nʼabandu butsira busana nʼomwatsi wʼomutima.

¹³Neryo twamabya ngʼabasĩre, ni busana na Nyamuhanga; kandi twamabya bandu bʼobũlengekanĩa, ini busana nenyũ.

¹⁴Kusangwa olwanzo lwa Kristo lukatutabalako, kandi twabiriminya ndeke ngoko mundu muguma mwahola busana nʼabandu bosĩ, neryo liri ngʼabandu bosĩ babirihola haguma naye.

¹⁵Kandi mwahola busana nʼabosĩ, neryo abakabyaho sibabyeho busana nabo ĩbobene, nĩkwa babyeho busana nʼoyo waholerabo, kandi mwalũbũkĩbwa busana nabo.

¹⁶Nĩkwa lino sitweganza omundu ngoko bandu bʼomubiri bakaganza. Kandi nomo twangaganza Kristo ngʼabandu bʼomubiri ko bakaganza, nĩkwa lino sitwesyamuganza tutya.

¹⁷Kusangwa omundu amabya amatikene na Kristo, ni mundu muhya-muhya; emyatsi ya kera yabirirenga, neryo emyatsi mihya-mihya yabĩrĩhĩka.

¹⁸Nyamuhanga yo wabirikola ebyosĩ ebĩ, oyo watũsanganaya ukwʼiye omwisi wa Kristo, kandi abirituha omũbĩrĩ wʼerĩsanganĩa abandi bʼukwʼiye.

¹⁹Tuti, Nyamuhanga akasanganaya bandu bosĩ ukwʼiye busana na Kristo, isialiganzirabo amalolo wabo. Kandi abirituha ekĩnywa kyʼerĩsanganĩa abandu ukwʼiye.

²⁰Neryo tuli bakwenda busana na Kristo, neryo Nyamuhanga akabalayira nʼeribalemba-lemba. Tukabalembalemba busana na Kristo, tuti, Mũsanganĩbawe uku Nyamuhanga,

²¹Kristo mwabya butsira ebibi, nĩkwa Nyamuhanga mwamuyira ngʼowʼebibi busana netu, itwatoka eriyirwa mo batunganene ba Nyamuhanga busana nʼerimatikana na Kristo.