Read nande 2 Abanya Korĩnto 6 Bible Online

2 Abanya Korĩnto 6 - nande bible

2 Abanya Korĩnto 6

¹Omo mũbĩrĩ ogo tukakola haguma na Nyamuhanga, tukabalemba-lemba tuti mwabiriangirira olukogo lwa Nyamuhanga, neryo simuleke lukabya busa.

²Kusangwa Nyamuhanga ati, Monakowa oko mugulu wʼerĩsĩmwa, Kandi monakũwatĩkya omo kiro kyʼomulamo. Ũlebaye, lino ni saa itolere, Ũlebaye, lino ni kiro kyʼerĩlamĩbwa.

³Sitwekola omwatsi owangagalya mundu, neryo omũbĩrĩ wetu siaponawe.

⁴Nĩkwa omo myatsi yosĩ tũkayĩkanganaya ngʼabagombe ba Nyamuhanga, ĩtũkayĩyĩnaya kutsibu, itukalola oko malĩge, nʼeribula ebitolere, itukagalawa.

⁵Tũkahũnzawa, tũkahĩrawa omo mũlĩkĩ, tukasangirirawa, tukanuba omo mũbĩrĩ, nʼerĩteya nʼeritindayato, nʼeribula akalyo.

⁶Tukayisolola oko bĩtĩsĩrĩre, tukabya nʼeriminya, tukayibombeka, tũkakangaya obwenge, tukamatikana nʼOmũlĩmũ Abũyĩrĩre, tukanza ekwenene.

⁷Tuwite ekĩnywa kyʼekwenene, nʼobũtokĩ bwa Nyamuhanga, kandi tuwite ekitunganene ngʼebindu byʼamalwa omo byala byʼamali nʼebyʼamalembe.

⁸Tũkasĩkĩbawa, kandi tukahemulawa; tukatsumulawa, nʼerĩsĩmwa, bakatuganza ngʼababehĩ, nĩkwa tũkabũga ebyʼekwenene.

⁹Tuli ngʼabandu abatasĩbwe, nĩkwa tũkũmayĩre; tuli ngʼabandu abakahola, nĩkwa lebaya, tuneho ndeke. Tukasuyirawa, nĩkwa sĩbetwĩta.

¹⁰Tuli ngʼabandu bʼobũlĩge, nĩkwa tukatsema ebiro byosĩ; tuli ngʼabera, nĩkwa tukayira abandi mo bateke; isituwite kindu, nĩkwa tuwite ebindu byosĩ.

¹¹Abalĩkyetu bʼeKorĩnto, twabiribabwiririra, twabiribabwira ebyosĩ ebiri omo mitima yetu.

¹²Sĩtũbahatatenĩe, nĩkwa muhatatene omo mitima yenyũ.

¹³Ngabũga nenyũ ngʼabana bage, nyiti mutukole ngoko twabiribakola, mũtũkangaye ebiri omo mitima yenyũ.

¹⁴Simumatikane nʼabatĩkĩrĩrye; kusangwa ekitunganene kyangasangira kiti nʼekibi kwehĩ? Kutse ekyakakala kyanganasakana nʼomwĩrĩmya kwehĩ?

¹⁵Kandi Kristo anganasangana nʼeSatanĩ kwehĩ? Kutse oyo Wĩkĩrĩrye anganasangira haguma nʼoyũtĩkĩrĩrye kwehĩ?

¹⁶Ehekalũ ya Nyamuhanga yanganasakana nʼesyosanamu kwehĩ? Kusangwa ĩtwe tuli ehekalũ ya Nyamuhanga oyuliho. Ngoko Nyamuhanga abĩrĩbũga ati, Nasyĩkala omwisi wabo, nasyalendera omo katĩkatĩ kabo; Nasyabya Nyamuhanga wabo, nabo basyabya bandu bage.

¹⁷Kusangwa Omukama akabũga ati, Neryo mũlũe omo katĩkatĩ kabo, muyisolole. Kandi sĩmũtũle oko kindu ekĩtĩsĩrĩre. Nage nasyabakokya,

¹⁸Nasyabya Tata wenyũ, Nenyũ mwasyabya bagala bage nʼabali bage, Omukama wʼobũtokĩ Bosĩ akabũga atya.