Read nande 2 Abanya Korĩnto 8 Bible Online

2 Abanya Korĩnto 8 - nande bible

2 Abanya Korĩnto 8

¹Balĩkyetu, twanzĩre erĩbamĩnyĩsya ebyo ĩlukogo lwa Nyamuhanga lwabirikola omo syokanĩsa syʼeMakedonĩa.

²Babirirengwako kutsibu busana nʼamalĩge balolako. Nĩkwa obutseme bwabo bunene mobwaleka ĩbahĩra omo kĩbo mo bingi, nomo banabya bera kutsibu.

³Kusangwa ngababwira kwenene, mobahĩtya ebyosĩ ko bangatoka, na kwilaba aho. Kandi mobahĩtya nʼomutima wʼolwanzo,

⁴ibakatuhatikana nʼeritulembalemba, bati babane omwanya wʼerisangana omo mũbĩrĩ wʼerĩwatĩkya abandu ba Nyamuhanga.

⁵Mobakola kwilaba obũlengekanĩa bwetu, kusangwa mobatsũka eriyiha uku Nyamuhanga, nʼenyũma wʼaho mobayiha ũkwʼĩtwe nʼerisonda lya Nyamuhanga.

⁶Kyaleka itwahatikana Tĩto, oyo watsũka omũbĩrĩ oyo, tuti, abuge omũbĩrĩ mubuya oyo omo katĩkatĩ kenyũ.

⁷Ĩnywe mukakanyirira omo myatsi yosĩ, omwʼĩkĩrĩrya, nʼomwʼĩbũga ekĩnywa, kandi Omwʼiminya, nʼomo mũhwa munene, nʼomo lwanzo lwenyũ busana netu. Neryo kandi mukanyirire omo mũbĩrĩ mubuya wʼerĩhĩtya.

⁸Kandi sindibahana omo mwatsi oyũ, nĩkwa erĩbakanganĩa omũhwa wʼabandi, ngalenga eriminya ekwenene yʼolwanzo lwenyũ nibya.

⁹Kusangwa mũnasĩ olukogo lwʼOmukama wetu Yesu Kristo. Nomo anabya muteke, mwayiyira mo mwera busana nenyũ, neryo imwatoka eribya bateke busana nʼobwera buwe.

¹⁰Neryo ngaganĩraya nyiti, litolere busana nenyũ, mubuge omũbĩri ogo mwatsũka oko mwaka owalaba. Kandi ĩnywe mwabya bʼerĩmbere erisonda erikola omũbĩrĩ oyo, kandi nĩna nywe mwatsũka erikolago.

¹¹Nĩkwa lino mubugego; ngoko mwabya nʼomũhwa wʼerisondago, lino mubye nʼomũhwa wʼeribugago ndeke ngoko mwangatoka.

¹²Nĩkwa mwamabya nʼomũhwa wʼerĩhĩtya, Nyamuhanga akalĩga ebyo mundu awite, butsira ebyo atawite.

¹³Sĩndĩbũga nyiti, abandi banguhirawe, nenyũ mũlĩtoherawe, nĩkwa busana nʼerĩrĩngĩrĩranĩa omũbĩrĩ.

¹⁴Lino obungi bwenyũ bubye busana nʼerĩwatĩkya obwaga bwabo, neryo kandi obungi bwabo ĩbwawatĩkya obwaga bwenyũ, neryo omũbĩrĩ alingirirane.

¹⁵Ngoko kĩsakĩre kiti, Oyo wakuma-kuma bingi mwatasakya, Nʼoyo wakuma-kuma bike mwatabulabyo.

¹⁶Ngaha Nyamuhanga yʼewasĩngya kusangwa abiriha Tĩto yʼomũhwa ngʼowetu busana nʼerĩbawatĩkya.

¹⁷Kusangwa mwalĩga erisaba lyetu, nĩkwa kwilaba aho kusangwa abya nʼomũhwa, mwayisoga omo mutima wuwe eriya ewenyũ.

¹⁸Kandi twabirituma haguma naye, Omũlĩkyetu, oyũsĩmĩrwe omo makanĩsa gosĩ busana nʼomũbĩrĩ wuwe wʼerĩtũla Engulu Yowene.

¹⁹Kandi amakanĩsa abirimuha omũbĩrĩ oyo wʼerirendera netu omo mũbĩrĩ mubuya ogo tukakola busana nʼolukengerwa lwʼOmukama, nʼerĩkanganĩa omũhwa wetu busana nenyũ.

²⁰Tũkalebaya ndeke Sihabye mundu oyukatutonga busana nʼomũbĩrĩ wetu oyũ, wʼeritegeka ekĩbo kibuya ekĩ.

²¹Kusangwa twanzĩre erikola ekitolere embere syʼOmukama, nʼakandi embere syʼabandu.

²²Neryo tukatuma haguma nabo ogundi mũlĩkyetu. Twabirirenga mũlĩkyetu oyũ omo myatsi mingi, twabĩrĩrebya kwʼali mundu wʼomũhwa, kandi kusangwa akayiketera nywe, awite omũhwa munene erĩbawatĩkya.

²³Tĩto naye, nĩ mũsangĩrĩ haguma nage, kandi akakola haguma nage busana nenyũ. Abandi balĩkyetu abo ni bakwenda bʼamakanĩsa, kandi bakaleta olukengerwa uku Kristo.

²⁴Neryo mũkanganayebo olwanzo lwenyũ embere wʼamakanĩsa, ibatoka eriminya busana nakĩ tukayihalamba busana nenyũ.