Read nande Abanya Galatĩa 1 Bible Online

Abanya Galatĩa 1 - nande bible

Abanya Galatĩa 1

¹Ingye mukwenda Paũlo, oyutabirikirawa nʼabandu kutse eritumwa nʼabandu, nĩkwa oyo watumawa na Yesu Kristo na Nyamuhanga Tata, oyo wamũlũbũkaya oko baholĩ.

²Abalĩkyetu bosĩ abali haguma nage tũkabakeraya ĩnywe makanĩsa wʼeGalatĩa.

³Nyamuhanga Tata wetu, nʼomukama Yesu Kristo, babahe olukogo nʼobuholo.

⁴Kristo mwayiha busana nʼebibi byetu eritubohola oko mugulu mubi ono, ngoko Nyamuhanga Tata wetu abya anzĩre.

⁵Olukengerwa lubye uku Nyamuhanga kera na kera! Amina.

⁶Ngabaswekera! Kusangwa mukatoga lũba ukwʼoyo wababirikira omo lukogo lwa Kristo, imukakwama eyindi ngulu

⁷Nĩkwa sihali eyindi Ngulu, nĩkwa hali abandi abakabatsenga-tsengaya, ibakasonda eribindula yo nabi Engulu Yowene ya Kristo.

⁸Nĩkwa ĩtwe, kutse omũlaĩka oyũkalũa elubula, amabatũlĩra engulu eyite eyo twabatũlĩra, atakirawe!

⁹Ngoko twamabĩbũga, na lino ngabũga kandi nyiti, Omundu amabatũlĩra engulu eyite eyo mwangirira, atakirawe.

¹⁰Lino ngasonda erĩsĩmwa nʼabandu, kutse erĩsĩmwa na Nyamuhanga kwehĩ? Kutse ngalenga erĩtsemesya abandu kwehĩ? Kumbe ngyinasonda erĩtsemesya abandu, sinangabya omugombe wa Kristo.

¹¹Balĩkyetu, nyanzĩre imwaminya ndeke ngoko Engulu Yowene nabatũlĩra sĩyalũa oko bandu.

¹²Mondangirirayo oko mundu, kandi mondakangĩrĩrĩbwayo na mundu. Nĩkwa nina Yesu Kristo yo wanyĩbĩsũlĩrayo.

¹³Mwabĩrĩowa emigendere yage omo myatsi yʼAbayũda, ngoko nabya ngendererya kutsibu ekanĩsa ya Nyamuhanga, kandi nabya ngalenga erĩheryayo.

¹⁴Nabya inabirilaba abangi bʼomo lulengo lwage omo myatsi yʼAbayũda. Iningabya nʼomũhwa munene busana nʼemitsye yʼabotata wetu.

¹⁵Nĩkwa Nyamuhanga, omo lukogo luwe, mwayisoga ngye inyikine omo nda ya koyo, mwanyibirikira erimukolera.

¹⁶Kusangwa omugulu byatsemesaya Nyamuhanga erĩnyĩbĩsũlĩra Omugala wuwe, inatoka erĩtũla Engulu ya Kristo omo katĩkatĩ kʼEbihanda, mondakanĩa nʼabandu.

¹⁷Kandi mondahetukira eYerũsalema ukwʼabo babya bakwenda embere syage. Nĩkwa monaya eArabĩa, kandi monasuba eDamaseke.

¹⁸Neryo enyũma wʼemyaka ĩsatu monahetukira eYerũsalema eriyabana Petero, monasiba naye ebiro erĩkũmĩ nʼebitanu.

¹⁹Nĩkwa mondalangira ogundi gʼoko bakwenda, nina Yakobo, ye mugala wabo Mukama.

²⁰Ebyo ngasaka ni kwenene. Ngayisema kwenene omwisi wa Nyamuhanga nyiti sindibiha.

²¹Neryo monaya omo bihugo byʼeSũrĩa nʼeKĩlĩkĩa.

²²Oko mugulu oyo mondalolwako nʼamakanĩsa wa Kristo eYũdea.

²³Nĩkwa babya bakowa lisa ambu, Oyo wabya akatwendererya, lino akatũla Engulu Yowene yʼerĩkĩrĩrya Kristo, eyo abya akalenga erĩherya.

²⁴Neryo babya bakapipa Nyamuhanga busana nage.