Read nande Abanya Galatĩa 3 Bible Online

Abanya Galatĩa 3 - nande bible

Abanya Galatĩa 3

¹Ĩnywe Banya Galatĩa bakĩrũ, obusaki obukabateba ni bwahi kwehĩ? Nenyũ mwakangĩrĩrĩbawa ndeke-ndeke ngoko Kristo abambawa oko musalaba embere syʼabandu bosĩ.

²Muleke ngatababũlaya kiguma, momwangirira Omũlĩmũ busana nʼerikola Emigambo, kutse busana nʼerĩowa nʼerĩkĩrĩrya Engulu Yowene kwehĩ?

³Busana nakĩ mukabya bakĩrũ kwehĩ? Mwamabĩtsũka omo Mũlĩmũ wa Nyamuhanga, mũkahĩkana lino busana nʼomubiri kwehĩ?

⁴Mwabiriagalwa omo myatsi yosĩ eyĩ mo buyira kwehĩ? Muti, siyabya mo buyira!

⁵Omugulu Nyamuhanga akabaha Omũlĩmũ, nʼerikola ebitiko-tiko omo katĩkatĩ kenyũ, akakola ebĩ kusangwa mukakola Emigambo, kutse kusangwa mũkowa nʼerĩkĩrĩrya Engulu Yowene kwehĩ?

⁶Ngoko kĩsakĩre busana na Abrahamũ kiti, Mwĩkĩrĩrya Nyamuhanga, neryo busana nʼerĩkĩrĩrya liwe, Nyamuhanga mwamuganza mo mutunganene.

⁷Neryo, muminye ngoko abandu ababĩrĩkĩrĩrya Engulu Yowene, nabo ni bana ba Abrahamũ.

⁸Neryo Amasako mwaminya erĩmbere ngoko Nyamuhanga asyatũngananĩa Ebihanda busana nʼerĩkĩrĩrya, neryo mwatũla Engulu Yowene uku Abrahamũ ati, Omwisi syawe, ĩngye Nyamuhanga nasyatsumula Ebihanda byosĩ.

⁹Neryo abosĩ abakĩkĩrĩraya bakabana omũyĩsa ogo Abrahamũ abana busana nʼerĩkĩrĩrya liwe.

¹⁰Kusangwa abosĩ abakayiketera erikola Emigambo babiritakirwa; kusangwa kĩsakĩre kiti, Obuli mundu oyuteyitsinga omo myatsi yosĩ eyĩsakĩre omo kitabu kyʼEmigambo, nʼerikolayo, omundu oyo abiritakirwa.

¹¹Nĩkwa kiminyikere ko hate mundu oyukayirawa mo mutunganene embere sya Nyamuhanga busana nʼEmigambo, Kusangwa kĩsakĩre kiti, Omutunganene asyabyaho busana nʼerĩkĩrĩrya.

¹²Nĩkwa Emigambo siyirihangana okwʼĩkĩrĩrya, nĩkwa kĩsakĩre kiti, Oyukakola Emigambo asyabyaho busana nayo.

¹³Kristo abĩrĩtũtongolya okwʼitakirwa lyʼEmigambo, iniabiritakirwa omo mwanya wetu, kusangwa kĩsakĩre kiti, Obuli mundu oyũhanĩkĩrwe oko muti abye mutakirwa.

¹⁴Kusangwa Kristo mwakola atya neryo abʼEbihanda ibatoka eribana omũyĩsa omwisi wa Kristo Yesu, ogo Abrahamũ abana. Netu itwatoka eribana Omũlĩmũ ogo Nyamuhanga alaga busana nʼerĩkĩrĩrya lyetu.

¹⁵Balĩkyetu, ngabakangaya ekikakolawa nʼabandu. Endagane yʼabandu babiri yamabĩgomerĩbwa, sihali bandu bangabindulayo kutse eritomekera kuyo.

¹⁶Neryo. Nyamuhanga mwaha esyondagane siwe uku Abrahamũ nʼoko lubuto luwe. Sĩalĩbũga ati, oko bana buwe, eriahula bangi, nĩkwa akabũga ati, oko lubuto lwawe mundu muguma, iniakahula Kristo.

¹⁷Ekyo ngabũga kyekĩ, endagane eyagomerĩbawa na Nyamuhanga siyangabindulwa nʼEmigambo eyahĩka emyaka amagana ani nʼamakũmĩ asatu enyũma. Neryo Emigambo sĩyangalĩmya erilaga liwe.

¹⁸Nyamuhanga amabya akatuha ebyo atulaga busana nʼerikola Emĩgambo, sialituhabyo busana nʼerilaga liwe; kusangwa Nyamuhanga mwahabyo uku Abrahamũ kusangwa mwamulagabyo.

¹⁹Neryo Emigambo ni busana nakĩ kwehĩ? Emigambo yahĩrawa busana nʼerĩkangya amalolo erĩhĩka aho mwana wuwe asyahĩkĩra. Endagane eyo yahabawa oko mwana oyo. Emigambo yaletawa nʼabamalaĩka omo byala byʼomũsanganĩa.

²⁰Nĩkwa ahali omundu muguma musa sihali mũsanganĩa, na Nyamuhanga ni muguma.

²¹Neryo Emigambo ikagana erilaga lya Nyamuhanga kwehĩ? Iyehe nʼahake! Kusangwa kumbe Nyamuhanga aha omugambo owangatoka eriha engebe, kumbe ebitunganene byangabanika omo Migambo.

²²Nĩkwa Amasako mwahĩra abandu bosĩ ngʼabakola-nabi, neryo erilaga lihabawe oko bosĩ abakĩkĩrĩraya Yesu Kristo.

²³Nĩkwa embere wʼerĩhĩka lyʼerĩkĩrĩrya, Emigambo moyatuyira ngʼabandu bʼomũlĩkĩ erĩhĩka oko kiro kyʼerĩbĩsũla erĩkĩrĩrya.

²⁴Neryo Emigambo yabya ngʼomũlemberĩ wetu erĩhĩka aho Kristo asyasira, itwatoka erĩtũngananĩbwa embere sya Nyamũhanga omwʼĩkĩrĩrya.

²⁵Nĩkwa lino erĩkĩrĩrya lyabĩrĩhĩka, situkiri oko mũlemberĩ.

²⁶Kusangwa busana nʼerĩkĩrĩrya, ĩnywe bosĩ muli bagala ba Nyamuhanga nʼerimatikana na Kristo Yesu.

²⁷Kusangwa ĩnywe bosĩ mwabatĩsĩbawa erimatikana na Kristo mwabiriambala emibere ya Kristo.

²⁸Sihali Omũyũda nʼOmũgĩrĩkĩ, sihali omukoba nʼogʼobwĩranda, sihali wʼobulume kutse wʼobũkalĩ; kusangwa ĩnywe bosĩ muli muguma erimatikana na Kristo Yesu.

²⁹Neryo mwamabya muli Bakristo, muli bana ba Abrahamũ, mwasyabana ebyosĩ Nyamuhanga alaga.