Read nande Abanya Galatĩa 5 Bible Online

Abanya Galatĩa 5 - nande bible

Abanya Galatĩa 5

¹Kristo mwatubohola, tubane obwĩranda! Neryo muhangane, mũsĩke, simuleke mukaswabohwa ngʼabakobe.

²Mũlebaye! Ĩngye Paũlo, ngababwira nyiti, Mwamabanĩbwa, Kristo siendisyabakolerakĩ.

³Kandi, ngatũlago, oko buli mundu oyũkabanĩbawa nyiti, kwʼatolere erikwama atya Emigambo yosĩ.

⁴Ĩnywe mũkayĩtũngananaya omo Migambo, mũkayĩlũsaya uku Kristo. Simukiri oko lukogo lwa Nyamuhanga.

⁵Nĩkwa ĩtwe busana nʼOmũlĩmũ tukalinda nʼamaha erĩtũngananĩbwa busana nʼerĩkĩrĩrya Kristo.

⁶Kusangwa omugulu tumatikene na Kristo Yesu, erĩbanĩbwa si kindu. Nʼerĩ tendĩbanĩbwa si kindu. Omwatsi munene nĩʼkĩrĩrya erikakola omo lwanzo.

⁷Mwabya mukalendera ndeke; nindi wabakakĩraya erĩowa omwatsi wʼekwenene kwehĩ?

⁸Eribinduka erĩ molĩtalũa uku Nyamuhanga, oyo wababirikira.

⁹Ekĩhamya kike kĩkahamaya obundu bosĩ.

¹⁰Ngayiketera nywe omwisi wʼOmukama nyiti, simwendisyakwama obundi bũlengekanĩa. Nĩkwa oyũkabatsenga-tsengaya nomo angabyandi asyatswerwa na Nyamuhanga.

¹¹Nĩkwa ĩngye, balĩkyetu, namabya ngakangĩrĩraya eribana, busana nakĩ abandu bakanyendereraya kwehĩ? Kyamabya kitya neryo erĩtũla omwatsi wʼomusalaba sĩryangatwĩkalya mundu.

¹²Kumbe abandu abo bakabahahũkaya omutima, kumbe bakayibandanga.

¹³Kusangwa balĩkyetu, ĩnywe mwabĩrĩkĩrĩrya eribya nʼobwĩranda. Nĩkwa simuleke obwĩranda bwenyũ bũkabakolesya esyongumbu syʼomubiri; nĩkwa mukolerane omo lwanzo.

¹⁴Kusangwa Emigambo yosĩ ĩkahĩkana omo kĩnywa kiguma kiti, Wanze mũlĩkyenyũ ngoko ũyanzĩre.

¹⁵Nĩkwa mwamalumangana nʼeriryana, ehee, isimukandisyabugana!

¹⁶Nĩkwa ngabũga nyiti, Mulendere omo mibere yʼOmũlĩmũ, simwendĩsyaberererya esyongumbu syʼomubiri.

¹⁷Kusangwa esyongumbu syʼomubiri sikalwa nʼOmũlĩmũ, nʼOmũlĩmũ akalwa nʼomubiri; kusangwa hali obũyĩgũ omo katĩkatĩ kabo, sulitoka erikola ebyo wanzĩre.

¹⁸Nĩkwa mwamasondolĩbwa nʼOmũlĩmũ, suli oko hamũlĩ yʼEmigambo.

¹⁹Neryo erikola lyʼomubiri liminyikere ndeke, lyerĩ: erĩsĩngĩra, obũkĩne, amaragane,

²⁰erisaba esyosanamu, erilagula, obũyĩgũ, erilwa, obũha, erihitana, erinegena, erĩkangĩrĩrya lyʼamabehĩ,

²¹eritsura, erĩkũnda, eritamira, nʼemyatsi yosĩ eyiri ngʼeyĩ. Ngababwira ndeke kandi nyiti, abakakola ebiri ngʼebĩ sibendisyabana omwanya omo Bwami bwa Nyamuhanga.

²²Nĩkwa emikolere eyĩkalũa oko Mũlĩmũ yeyĩ: olwanzo, obutseme, Obuholo, eriyibombeka, obwenge, obubuya, eritendiregula,

²³omutima molo, nʼerĩyĩteya. Sihali omugambo owakalwa nʼemyatsi eyĩ.

²⁴Neryo abali uku Kristo Yesu babiribamba oko musalaba emyatsi yosĩ yʼomubiri, haguma nʼesyongumbu nʼerisonda lyago.

²⁵Omũlĩmũ amaleka itwabyaho, tuleke Omũlĩmũ oyo atusondole.

²⁶Situyitendere buyira, kutse erisondana kwʼomwaga, nʼeritsurana.