Read nande Abanya Efeso 2 Bible Online

Abanya Efeso 2 - nande bible

Abanya Efeso 2

¹Erĩmbere ĩnywe mwabya baholĩ omo bĩrĩmũ byenyũ busana nʼamalolo nʼebibi byenyũ.

²Oko mugulu oyo mwabya mukalendera omo nzira nyibi yʼekihugo kino; mwabya mũkowa omũtabalĩ wʼobũtokĩ bʼobwami bwʼekyanya. Naye nĩ kĩrĩmũ ekikasondola abandu abatĩowa Nyamuhanga.

³Netu twabya ngʼabo, itukakwama esyongumbu syʼemibiri yetu, itukakola erisonda lyʼemibiri yetu nʼobũlengekanĩa bwetu. Netu nibya ngʼabandu bosĩ, twabya tutolere erihitana nʼeritswera lya Nyamuhanga.

⁴Nĩkwa Nyamuhanga awite eriganyira ĩnene, nʼolwanzo luwe busana netu ni lunene.

⁵Omugulu twabya tũholĩre omo malolo wetu, Nyamuhanga mwatuha engebe haguma na Kristo; mwabĩrĩlamĩbwa busana nʼolukogo lwa Nyamuhanga.

⁶Kandi, itumatikene na Kristo Yesu, abiritusumba nʼerĩtwĩkalya haguma na Kristo Yesu omo myanya yʼelubula.

⁷Nyamuhanga mwakola atya erĩkangya omo migulu yosĩ eyikandisyasa obubuya bunene bwʼolukogo luwe; olo atũkangaya omo lwanzo luwe busana na Kristo Yesu.

⁸Kusangwa mwabĩrĩlamĩbwa omo lukogo lwa Nyamuhanga omo nzira yʼerĩkĩrĩrya, nʼerilama eryo siʼkola lyenyũ, nĩ lũsũnzo lwa Nyamuhanga.

⁹Omundu siayipipe, kusangwa sĩ mũbĩrĩ wʼomundu.

¹⁰Kusangwa Nyamuhanga atubumba, nʼerĩtũmatĩkanĩa na Kristo Yesu, abirituhangika ati tukole emĩbĩrĩ yowene eyo akokotaya kera, ati tubye tukakolayo.

¹¹Neryo mwibuke ngoko mwabya erĩmbere abʼEbihanda oko mubiri. Abayũda ababwene, bakabahula mo batabwene omo mwatsi owakakolawa omo mubiri.

¹²Oko mugulu oyo mwabya hali uku Kristo, mwabya balũa-hali; isimuli oko ndagane eyo Nyamuhanga alaga abandu buwe. Kandi mwabya butsira amaha, imukasiba omo kihugo kino isimuwite Nyamuhanga.

¹³Nĩkwa lino, kusangwa tumatikene na Kristo, ĩnywe mwabya hali, mwabiriretwa hakũhĩ na Kristo busana nʼomusasi wa Kristo.

¹⁴Kusangwa Kristo ni buholo bwetu, iniabiriyira Abayũda, nʼEbihanda, mo kihanda kiguma. Omo mubiri wuwe, Kristo mwaterya olũhĩmbo olwagababo, olwayirabo mo nzĩgũ.

¹⁵Kristo mwalũsya Emigambo yʼAbayũda haguma nʼebihano byabo, iniatoka eriyira omwisi wuwe ekihanda kiguma kihya-kihya omwʼabo ababya kera ebihanda bibiri, busana nʼerimatikana nabo. Neryo mwaleta Obuholo bwʼatya.

¹⁶Kristo mwalũsya obũyĩgũ obwabya omo katĩkatĩ kabo, omo luholo luwe oko musalaba. Mwasanganĩabo uku Nyamuhanga, nʼeriyirabo mo muguma.

¹⁷Litya Kristo mwasa nʼerĩtũla Engulu Yowene yʼobuholo ũkwʼĩnywe Ebihanda ebyabya hali, nʼoko Bayũda ababya hakũhĩ naye.

¹⁸Kusangwa busana na Kristo ĩtwe bosĩ, Abayũda nʼEbihanda, tukabana enzira yʼerĩhĩka uku Tata Nyamuhanga busana nʼOmũlĩmũ Abũyĩrĩre muguma.

¹⁹Neryo ĩnywe abʼEbihanda, simukiri ba hali kutse abʼekindi kihanda; lino muli esyondũlanĩ haguma nʼabandu ba Nyamuhanga, muli abʼekĩtũnga kya Nyamuhanga!

²⁰Kandi mwabĩrĩhĩmbwa oko kibanza ekyo abakwenda nʼabamĩnyererĩ batsũka, kandi Kristo nĩʼbwe ĩnene erĩkawataya engonde yʼenyũmba.

²¹Iye Kristo akahĩndanaya enyũmba yosĩ eyo haguma, nʼerĩũsũlyayo, ibye hekalũ yĩbũyĩrĩre busana nʼOmukama.

²²Busana nʼerimatikana na Kristo, nenyũ nibya mũkahĩmbawa eribya obwĩkalo bwa Nyamuhanga busana nʼOmũlĩmũ Abũyĩrĩre.