Read nande Abanya Efeso 3 Bible Online

Abanya Efeso 3 - nande bible

Abanya Efeso 3

¹Busana nʼomwatsi oyũ, ĩngye Paũlo ngasaba Nyamuhanga, ĩngye mundu wʼomũlĩkĩ wa Kristo Yesu busana nenyũ, abandu bʼEbihanda.

²Kusangwa mwabĩrĩowa ngoko Nyamuhanga omo lukogo luwe abirimba omũbĩrĩ wʼerĩbawatĩkya.

³Nyamuhanga mwabĩsũla erĩkũmbo liwe nʼerĩnyĩmĩnyĩsyalyo, ngoko nabasakira erĩmbere omo bĩnywa bike.

⁴Neryo mwamasoma ebyo mwasyaminya ebyo nyasĩ omwʼĩkũmbo lya Kristo.

⁵Omo migulu yalaba Nyamuhanga mwatamĩnyĩsya abandu bʼerĩkũmbo erĩ; nĩkwa lino omo Mũlĩmũ Abũyĩrĩre abĩrĩbĩsũlĩralyo abakwenda buwe babũyĩrĩre nʼabamĩnyererĩ.

⁶Erĩkũmbo eryo liti, busana nʼEngulu Yowene, Ebihanda bakabya nʼomũyĩsa haguma nʼAbayũda, kandi omo kĩtũnga kiguma bakasangira ebyo Nyamuhanga alagabo omwisi wa Kristo Yesu.

⁷Nyamuhanga omo lũsũnzo lwʼolukogo luwe mwanyĩhĩra mo mugombe wʼerĩtũla Engulu Yowene. Kandi mwambalo omo bũtokĩ buwe bunene.

⁸Ĩngye indi muke kutsibu omo katĩkatĩ kʼabandu ba Nyamuhanga, nĩkwa omo lukogo luwe Nyamuhanga mwamba omũbĩrĩ gowene oyũ wʼerĩtũlĩra Ebihanda engulu yʼobuteke obũlengĩre, obwa Kristo, nabo bũlabĩre obũlengekanĩa.

⁹Kandi mwamba omũbĩrĩ wʼerĩmĩnyĩsya abandu bosĩ ngoko Nyamuhanga akatondekanaya omwatsi wʼerĩkũmbo erĩ. Nyamuhanga oyo wahangika ebindu byosĩ, mwabĩsa omwatsi oyo gʼoko migulu yosĩ yalaba,

¹⁰iniatoka, oko mugulu ono, omo kanĩsa yiwe, erĩkangya oko batabalĩ nʼabʼehamũlĩ omo kyanya, amenge wuwe mũsĩndo-mũsĩndo.

¹¹Nyamuhanga mwakola ebĩ ngoko ayĩsũnza kera na kera, neryo lino abĩrĩberereryabyo omwisi wa Kristo Yesu Omukama wetu.

¹²Kusangwa tumatikene naye, kandi kusangwa twabĩrĩmwĩkĩrĩrya, tuli nʼobwĩranda bwʼerĩhĩka embere wa Nyamuhanga butsira buba.

¹³Kikaleka inabahatikana nyiti, simuluhe busana nʼamalĩge wage busana nenyũ; kusangwa amalĩge ayo nĩ ndũndĩ busana nenyũ.

¹⁴Busana nʼekĩ ngakũkamira Tata.

¹⁵Iye akahula obuli kĩtũnga omo lĩna lyakyo, ekiri omo lubula nʼekiri munakihugo.

¹⁶Ngamusaba nyiti, omo lukengerwa luwe lunene, abahe obũtokĩ bwʼOmũlĩmũ wuwe Abũyĩrĩre imwatoka eribana amaka omo mitima yenyũ.

¹⁷Kandi ngasaba nyiti, Kristo ĩkale omo mitima yenyũ busana nʼerĩkĩrĩrya lyenyũ; kandi nyiti, muhande emĩrĩhĩ yʼolwanzo lwenyũ, ĩmũnasĩkĩre omo lwanzo olo.

¹⁸Imwatoka haguma nʼabandu bosĩ ba Nyamuhanga eriminya ndeke obunene bʼolwanzo luwe, nʼobugali bwalo, nʼobuli bwalo, nʼobuli bwʼendata bwalo, nʼobuli bwʼeyĩkwa bwalo.

¹⁹Kandi mutoke eriminya kutsibu olwanzo lwa Kristo olũlabĩre eriminya lyʼabandu. Kandi nyiti, imwatoka erĩũsũlĩbwa omwʼĩhĩkana lyosĩ lya Nyamuhanga.

²⁰Olukengerwa lubye ukwʼiye oyuwite obũtokĩ bwʼerikola ebyosĩ ebyo tũkabũlaya kutse ebyo tũkalengekanaya, ngʼobũtokĩ obukakola omwisi wetu.

²¹Olukengerwa lubye ukwʼiye omo kanĩsa nʼomwisi wa Kristo Yesu oko migulu yosĩ, kera na kera. Amina.