Read nande Abanya Fĩlĩpĩ 1 Bible Online

Abanya Fĩlĩpĩ 1 - nande bible

Abanya Fĩlĩpĩ 1

¹Ĩtwe Paũlo na Tĩmoteo, abagombe ba Kristo Yesu, tukabasakira, ĩnywe bandu bosĩ ba Nyamuhanga abĩkere eFĩlĩpĩ, abĩkĩrĩrye Kristo Yesu, haguma nʼabateya nʼabawatĩkya.

²Nyamuhanga Tata wetu nʼOmukama Yesu Kristo, abahe olukogo nʼobuholo.

³Ngaha Nyamuhanga wage ewasĩngya busana nʼĩnywe bosĩ, emigulu yosĩ ngabibuka.

⁴Nʼemigulu yosĩ ngabasabira ĩnywe bosĩ, ngasaba nʼobutseme.

⁵Kusangwa mwabirisangira nage omo mũbĩrĩ wʼEngulu Yowene, erĩtsũka ekiro kyʼerĩmbere nʼerĩhĩka na lino.

⁶Neryo nyĩnasĩ mwatsi muguma oyũ, nyiti, oyo watsũka omũbĩrĩ owene omwisi wenyũ, ye Nyamuhanga, asyaberereryago erĩhĩka oko kiro kya Kristo Yesu.

⁷Litolere ĩnaganĩrya nyitya busana nʼĩnywe bosĩ, kusangwa muli oko mutima wage. Kusangwa ĩnywe bosĩ mwabirisangira nage omo mũbĩrĩ ogo Nyamuhanga abirimba omo lukogo luwe, omugulu indi omo mũlĩkĩ, kandi omugulu nabya ngalwira nʼerĩhanganĩa Engulu Yowene.

⁸Kusangwa Nyamuhanga anasĩ ngoko ĩnywe bosĩ ngabakwa olukando lunene omo lwanzo lwa Kristo Yesu.

⁹Ngabasabira nyiti, olwanzo lwenyũ lukanyirire kutsibu haguma nʼamenge nʼeriminya enzumwa yʼomwatsi.

¹⁰Imwatoka erĩsĩma ebibuya. Litya mukandisyatoka eribya babuya, butsira ekyangakungwa, erĩhĩka oko kiro kya Kristo.

¹¹Kandi emitima yenyũ yasyũsũla omo myatsi itunganene eyĩkalũa uku Yesu Kristo. Emyatsi eyĩ yasyaleta olukengerwa nʼeripipa uku Nyamuhanga.

¹²Nyanzĩre muminye, balĩkyetu, nyiti emyatsi eyo yambĩkako ĩkawatĩkaya erĩtũla Engulu Yowene.

¹³Yabirireka abateya bosĩ bʼekikali, haguma nʼabandi bosĩ, ibaminya ko ndi omo mũlĩkĩ busana na Kristo.

¹⁴Kandi abalĩkyetu bangi babiriyiketera erikwama Omukama busana nʼomũlĩkĩ wage. Kandi babirihanda omutima erĩbũga ekĩnywa kya Yesu butsira eriubaha.

¹⁵Abandi bakatũla omwatsi wa Kristo busana nʼeritsura nʼomwaga. Nĩkwa abandi bakakangĩrĩraya nʼomutima owene,

¹⁶kusangwa bawite olwanzo, kandi banasĩ ko nahĩrawa erilwira Engulu Yowene.

¹⁷Abandi sĩbekanganaya Kristo omo kwenene, nĩkwa omo mutima wʼerĩyĩhamya, ĩbakaganĩraya erĩnyagalya omo mĩrĩkĩ yage.

¹⁸Si mwatsi! Ngatsema, kusangwa omo syonzira syosĩ Kristo anemũkanganĩbwa, nomo lyangabya omo mutima owene kutse omo mutima wʼomwaga. Kandi ngandisyaswatsema,

¹⁹kusangwa nyĩnasĩ nasyaboholwa busana nʼerisaba lyenyũ na busana nʼerĩwatĩkya erĩkalũa oko Mũlĩmũ wa Yesu Kristo.

²⁰Kusangwa erisonda lyʼomutima wage, nʼamaha wage biti, sinyihemulawe omo mwatsi nʼomuguma embere sya Nyamuhanga. Nĩkwa nyikole emigulu yosĩ, na lino, omo butubaha, Kristo ahamĩbawe omo mubiri wage, kutse omwʼibyaho lyage, kutse omo luholo lwage.

²¹Kusangwa ũkwʼĩngye, engebe ni Kristo, nʼomwʼihola muli ndũndĩ!

²²Nĩkwa lyamabya ngabyaho omo mubiri, nanganakola omũbĩrĩ mubuya. Sĩnyasĩ ekyo nangayisoga.

²³Ngahatatanĩbawa omo katĩkatĩ kʼebibiri. Nyanzĩre erigenda nʼeribya na Kristo, kusangwa ekyo kyowene kwilaba.

²⁴Nĩkwa eribyaho eno omo mubiri, lyo litolere kutsibu busana nenyũ.

²⁵Kusangwa nabiriminya ekĩ, ngandĩsĩgala, nʼeribya haguma nʼĩnywe bosĩ busana nʼerĩbalolya emuliro omwʼĩkĩrĩrya lyenyũ, nʼobutseme bwenyũ.

²⁶Mwasyatoka erĩyĩsyandira ndeke omwisi wa Kristo busana nage namaswabahĩkako.

²⁷Omwatsi munene goyũ, emikolere yenyũ ibye itolere Engulu Yowene ya Kristo. Neryo, namaya eyo eribalolako, kutse ndeho, nasyowa engulu yenyũ, ngoko mũsĩkĩre omo bũlengekanĩa buguma, imunemulwa nʼomutima muguma busana nʼEngulu Yowene yʼerĩkĩrĩrya Kristo.

²⁸Simubahe nʼahake esyonzĩgũ syenyũ, ekĩ kĩkamĩnyĩsayabo ngoko bakandisyahera. Nĩkwa ĩnywe mukandisyalama, kusangwa ebyosĩ bĩkalũa ewa Nyamuhanga.

²⁹Busana na Kristo mwabirihabwa obubuya obũ obwʼerĩmwĩkĩrĩrya, nĩkwa butsira erĩ risa, nĩkwa obubuya bwʼeriagalwa busana naye.

³⁰Imunemulwa amalwa ago mwalangira ngalwa, na lino mũkowa ngalwa.