Read nande Abanya Fĩlĩpĩ 2 Bible Online

Abanya Fĩlĩpĩ 2 - nande bible

Abanya Fĩlĩpĩ 2

¹Kristo akatuma imwahanda emitima kwehĩ? Kutse olwanzo luwe lũkakĩranaya emitima yenyũ kwehĩ? Kandi Omũlĩmũ akasangira haguma nenyũ kwehĩ? Kandi muwite olwanzo lwa Nyamuhanga nʼeriganyira liwe kwehĩ?

²Byamabya bitya, mũsũlaye, omutima wage nʼobutseme. Mubye nʼamalengekanĩa maguma, mubye nʼolwanzo luguma, mubye nʼomutima muguma, nʼobũlengekanĩa buguma.

³Simukole mwatsi omo mwaga wʼobutimane, kutse busana nʼeriyipipa, nĩkwa mũyĩkehaye, imukaganza obuli mundu mo mubuya kwilaba ĩnywe.

⁴Mũtegaye ebindu byʼabandi butsira erilwira ebyawe bisa.

⁵Mubye nʼobũlengekanĩa obũ bwa Kristo Yesu,

⁶oyũ, nomo anabya Nyamuhanga kwenene, mwatayilwira eriringirirana na Nyamuhanga.

⁷Nĩkwa mwayĩtũtũla olukengerwa luwe, mwayiyira ngʼomugombe, mwabutwa ngʼabandu, mwaminyikala omo kĩsosekanĩo kyʼomundu.

⁸Neryo mwayĩkehya, mwabya akowa, erĩhĩka oko luholo, lo luholo lwʼomusalaba.

⁹Kyaleka Nyamuhanga ĩnĩamũhamya kutsibu, nʼerimuha erĩna erĩlabĩre awandi mena.

¹⁰Neryo abosĩ basyakũkamira erĩsĩkya erĩna lya Yesu, abali omo lubula, nʼomo kihugo, nʼabali eyĩkwa oko kihugo.

¹¹Obuli mundu asyatũlaganĩa ko Yesu Kristo ni Mukama, busana nʼeriha olukengerwa uku Nyamuhanga Tata.

¹²Neryo, abanze bage, ngoko mwabya mũkowa emigulu yosĩ omugulu nabya nenyũ, nĩkwa lino mowe kwilaba omugulu ndeho. Mũberereraye erilama lyenyũ omwʼiubaha nʼerititimana.

¹³Kusangwa ni Nyamuhanga yukakola omwisi wenyũ, imwabya mũkalĩga nʼerikola ebĩkamũtsemesaya.

¹⁴Mukole emyatsi yosĩ butsira eriyitonga kutse buhaka,

¹⁵Imwatoka eribya abakũmayĩre nʼeribya bandu babuya, abana ba Nyamuhanga abate ko mwatsi, abĩkere omo katĩkatĩ kʼekihugo kĩhengemĩre, nʼekyʼomwaga. Nenyũ mukaminyikala ngʼesyotala omo kihugo.

¹⁶Imukahabo ekĩnywa kyʼengebe. Nage inatoka erĩyĩsyandira busana nenyũ oko kiro kya Kristo, isinditaluha buyira kutse erikola buyira.

¹⁷Nomo musasi wage angũtũlĩrwa ngʼobuhere busana nenyũ kusangwa mwabĩrĩkĩrĩrya Nyamuhanga nʼeriyiherera ukwʼiye, ngandisyatsema nʼerisangira obutseme bwage haguma nʼĩnywe bosĩ.

¹⁸Nenyũ nibya, ngabahatikana nyiti, mutseme mutya, kandi musangire nage obutseme bwenyũ.

¹⁹Omukama Yesu amanza, nasyabatumira Tĩmoteo yo lũba, inatoka erihanda omutima wage namabĩowa emyatsi yenyũ.

²⁰Kusangwa singwite ogundi oyuwite omutima ngʼowage, kutse oyũbahĩrĩre kʼomutima wuwe.

²¹Kusangwa abosĩ bakakwama emyatsi yabo butsira emyatsi ya Yesu Kristo.

²²Nĩkwa mũnasĩ ngoko Tĩmoteo abiritoka, kandi ngʼomwana kwʼakakolera ĩse, abirikola haguma nage omo mũbĩrĩ wʼerĩgenda-gendya Engulu Yowene.

²³Neryo namabiminya emyatsi yage nga yamabibya iti, nasyamutuma lũba.

²⁴Kandi ngayiketera Omukama nyiti, ngandisyabahĩkako lũba.

²⁵Nĩkwa monaganĩrya nyiti litolere inabatumira mũlĩkyetu Epafrodĩto, oyukakola haguma netu, kandi tukalwira Omukama haguma, lye ni mukwenda wenyũ erĩnyĩwatĩkya omo bwaga bwage.

²⁶Kandi abakwĩre olukando ĩnywe bosĩ, kandi ali nʼobũlĩge, kusangwa ĩnywe mowa kwʼalwere.

²⁷Kwenene abya alwere hakũhĩ nʼerihola, nĩkwa Nyamuhanga mwamuganyira, nage mwanyiganyira ngasyakwa obũlĩge bunene.

²⁸Kikaleka inasonda erimutuma lũba imwatoka eritsema eriswamulolako, nʼomutima wage iniasuba omo nda.

²⁹Neryo mũmũkokaye nga mũlĩkyetu omwisi wʼOmukama nʼobutseme bosĩ, kandi mũsĩkaye abandu abali nga ye.

³⁰Kusangwa abya akĩsĩya iniahola busana nʼomũbĩrĩ wa Kristo. Kandi mwatalanda oko ngebe yiwe, iniakasonda erĩnyĩwatĩkya umwʼebyo mutatoka erikola busana nage.