Read nande Abanya Fĩlĩpĩ 4 Bible Online

Abanya Fĩlĩpĩ 4 - nande bible

Abanya Fĩlĩpĩ 4

¹Neryo, balĩkyetu banze, ngabakwa olukando eribalolako. Muli butseme bwage, kandi mukanyiretera erĩyĩsyandira. Abanze bage, mũsĩke erikwama Omukama.

²Ngahatikana Eodĩa na Sĩntĩke babye nʼobũlengekanĩa buguma ngʼabalĩkyetu bʼOmukama.

³Ega, nawe mũlĩkyetu, ngakusaba nyiti, ũwatĩkaye abakalĩ aba. Kusangwa babiriyitsinga kutsibu omo mũbĩrĩ wʼerĩgenda-gendya Engulu Yowene, haguma na Klementĩ, nʼabandi balĩkyetu, abawite amena wabo omo kitabu kyʼengebe kya Nyamuhanga.

⁴Mutseme omo migendere yenyũ busana nʼOmukama emigulu yosĩ; kandi ngababwira nyiti, Mutseme!

⁵Mũmĩnyĩkalaye eriyibombeka lyenyũ oko bandu bosĩ, Omukama ali hakũhĩ!

⁶Sĩmũhanga-hangaye emitima yenyũ, nĩkwa omo buli mwatsi mubwire Nyamuhanga obwaga bwenyũ, imukamusaba nʼerimuhatikana, imunemuha ewasĩngya.

⁷Nʼobuholo bwa Nyamuhanga, Obũlabĩre amenge gosĩ, bwasyateya emitima yenyu nʼamaganĩrya wenyũ omwisi wa Kristo Yesu.

⁸Ego, balĩkyetu, mũsũlaye amalengekanĩa wenyũ omo myatsi mibuya nʼeyangapipwa. Emyatsi eyo yeyĩ: ebyʼekwenene, ebyʼerĩsĩkĩbwa, ebitunganene, ebĩbũyĩrĩre, ebyanganzwa, ebyʼerĩsĩmwa.

⁹Mubye mukakola emyatsi eyo mwiga, nʼeyo mwangirira ewage, kandi emyatsi eyo mowa, nʼeyo mwalolako ngakola. Neryo Nyamuhanga Omwenye Obuholo asyabya nenyũ.

¹⁰Nĩkwa monatsema kutsibu busana nʼOmukama, kusangwa enyũma wʼomugulu muli mwamasyanyibuka. Kwenene mwabya mukanyibuka, nĩkwa omwanya mwabula.

¹¹Sĩndĩbũga nyiti ngabula kindu; kusangwa nabiriminya eritsema omo bike kutse omo bingi.

¹²Nyĩnasĩ eribyaho omo bindu bike, kandi nyĩnasĩ eribyaho omwʼikanya lyʼebindu. Nabiriga erĩkũmbo liti, lye ritsema omo myatsi yosĩ nʼoko migulu yosĩ, namabya nyĩgũtĩre, kutse nyĩkwĩre enzala; kandi namabya ngwite bingi kutse eribulabyo.

¹³Nyĩtokĩre erikola ebyosĩ busana nʼamaka wa Kristo oyũkanyĩtokesaya.

¹⁴Nĩkwa mwamakola ndeke erĩnyĩwatĩkya omo malĩge wage.

¹⁵Nenyũ, Banya Fĩlĩpĩ, mũnasĩ ndeke, omugulu natsũka erĩtũla Engulu Yowene, nabĩlũa eMakedonĩa, sihali eyindi kanĩsa eyanyĩwatĩkaya, ĩnywebene mo mwasangira nage omo kĩbo, haguma nʼerĩhĩtya nʼeribula ebindu.

¹⁶Omugulu nabya eTesalonĩka nabya nʼobwaga, momwabya mukanyitumira olũsũnzo.

¹⁷Sĩndĩbũga nyiti ngasonda olũsũnzo, nĩkwa ngasonda endũndĩ eyikakanyirira busana nenyũ embere wa Nyamuhanga.

¹⁸Nĩkwa nabiribana ebyosĩ, ngwite bingi; sindibula nʼekindu busana nʼolũsũnzo lwenyũ, olo Epafrodito aleta. Nĩ ʼhĩtya erikakumba ndeke, embere wa Nyamuhanga obuhere obutolere, obũkatsemesaya Nyamuhanga yo ndeke.

¹⁹Nyamuhanga wage asyabaha ebyosĩ ebyo muli nabyo bwaga, kusangwa awite obuteke bunene buwe, obwʼerĩkangabasanĩa, obukabanika busana na Kristo Yesu.

²⁰Neryo olukengerwa lubye uku Nyamuhanga Tata wetu, kera na kera. Amina.

²¹Mũkeraye obuli mundu wa Nyamuhanga oyuli wa Kristo Yesu. Abalĩkyetu abali haguma nage bakabakeraya.

²²Abandu bosĩ ba Nyamuhanga bakabakeraya. Nʼabali omo kikali kya Kaĩsarĩ.

²³Olukogo lwʼOmukama Yesu Kristo lubye nʼemitima yenyũ.