Read nande Abanya Kolosaĩ 2 Bible Online

Abanya Kolosaĩ 2 - nande bible

Abanya Kolosaĩ 2

¹Nyanzĩre imwaminya ngoko nabiriyitsinga kutsibu busana nenyũ, na busana nʼabandu bʼeLaodĩkĩa, kandi busana nʼabandu bosĩ abatebanyilolako nʼerinyiminya.

²Nyiti kumbe bahande emitima yabo, ibabohana omo lwanzo, ibatoka erĩowa ndeke-ndeke nʼeriminya kutsibu ngoko Kristo nĩ kũmbo lya Nyamuhanga.

³Kusangwa obuteke bosĩ bwʼamenge, nʼeriminya bĩbĩseme omo byala bya Kristo.

⁴Busana nʼekĩ ngababwira Sihabye omundu oyũkabatebaya omo bĩnywa byʼekĩsehya.

⁵Nomo nangabya isindi eyo omo mubiri, nĩkwa indi haguma nenyũ omo kĩrĩmu, kandi ngatsema erilangira ngoko mũsĩkĩre nʼerihangana ndeke omwʼĩkĩrĩrya lyenyũ uku Kristo.

⁶Neryo, kusangwa mwabiriangirira Kristo Yesu mo Mukama, mumukwame nʼerimatikana naye.

⁷Muhande emĩrĩhĩ yenyũ omwisi wuwe. Mũsĩkaye erĩkĩrĩrya lyenyũ ngoko mwakangĩrĩrĩbawa. Mubye nʼomutima oswĩre nʼewasĩngya.

⁸Mũtegaye, Sihabye mundu oyukabanyega omo menge wʼabandu nʼeriteba buyira erĩkalũa oko mitsye yʼabandu, nʼoko myatsi yʼebĩrĩmũ ebikatabala oko bihugo, eyĩtalũa uku Kristo.

⁹Kusangwa erimatikana na Kristo liwite erĩhĩkana lyosĩ lya Nyamuhanga omo mubiri.

¹⁰Kandi mũhĩkene busana nʼerimatikana na Kristo. Kristo ni mukulu oko buli mũtabalĩ kutse oko mwenye hamũlĩ.

¹¹Erimatikana na Kristo mwabanĩbawa, butsira eribana eryo bandu bakayira, nĩkwa omwʼibana eryo Kristo akakola eribohola omundu oko maka wʼomubiri.

¹²Kusangwa omwʼĩbatĩsĩbwa lyenyũ momwatabwa haguma na Kristo. Kandi omwʼĩbatĩsĩbwa lyenyũ, mwalũbũkĩbawa haguma na Kristo busana nʼerĩkĩrĩrya lyenyũ omo bũtokĩ bwa Nyamuhanga, obwalũbũkaya Kristo oko luholo.

¹³Nenyũ mwabya baholĩ busana nʼamalolo wenyũ, kandi busana nʼeribya bandu bʼEbihanda bitawite Migambo. Nĩkwa Nyamuhanga abiribaha engebe haguma na Kristo. Naye abiritubuyira amalolo wetu gosĩ.

¹⁴Kandi abirisangula emyatsi eyabya ĩsakĩre, eyikatuhandikirira. Nyamuhanga mwalũsya yoho, nʼerikongomererayo oko musalaba.

¹⁵Neryo oko musalaba oyo Kristo mwasingula abatabalĩ nʼabʼehamũlĩ, kandi mwahemulabo, nʼerĩnũbyabo embere syʼabandu.

¹⁶Neryo simuleke omundu eribatswera omo myatsi yʼakalyo, kutse erĩpũlya, kutse busana nʼekiro kikulu, kutse ekiro kyʼomukera muhya-muhya, kutse ekiro kyʼeSabato.

¹⁷Emyatsi eyĩ nĩ kyũtsũtsũ kyʼebyo ebikandisyasa. Nĩkwa ebyʼekwenene ni Kristo.

¹⁸Simuleke omundu eribatswera nʼeribateba ati abirilota esyonzolĩ, kutse oyo wanzĩre erĩyĩkehya, nʼerĩramya abamalaĩka. Omundu oyũ akayĩhamaya buyira busana nʼobũlengekanĩa buwe.

¹⁹Siakihambana na Kristo, oyuli mutwe. Ye Kristo akaleka omubiri gosĩ erĩtũwa nʼerilukwa haguma busana nʼesyonungo nʼemĩsĩsa; omubiri oyũ iniakula ngoko Nyamuhanga anzĩre akakula.

²⁰Mwamabya mwabirihola haguma na Kristo oko mitsye yʼabandu nʼeyʼabalĩmũ, abakatabala oko bihugo, busana nakĩ mukinakwama ebihano nʼamalengekanĩa wʼekihugo kwehĩ?

²¹Bati, Suwate Ũkwʼekĩ, kutse sũgeraye kirya, kutse sũtũle Ũkwʼekĩ.

²²Ebyosĩ Ebĩ, bikahera omwʼikola lyabyo kusangwa ni bihano nʼerĩkangĩrĩrya byʼabandu.

²³Ebĩ biri nga biwite amenge omo myatsi yʼerĩramya abamalaĩka, nʼerĩyĩkehya, nʼerĩkaramya omubiri. Nĩkwa sibyetoka esyongumbu syʼomubiri.