Read nande Abanya Kolosaĩ 3 Bible Online

Abanya Kolosaĩ 3 - nande bible

Abanya Kolosaĩ 3

¹Neryo kusangwa mwabĩrĩlũbũkĩbwa haguma na Kristo, mũhĩre emitima yenyũ oko myatsi yʼendata aho Kristo ĩkere oko luhande lwʼamali lwa Nyamuhanga.

²Mũhĩre obũlengekanĩa bwenyũ oko myatsi yʼendata, butsira oko myatsi ya muna-kihugo.

³Kusangwa mwabirihola, na lino engebe yenyũ ĩbĩseme haguma na Kristo omwisi wa Nyamuhanga.

⁴Kristo ni ngebe yenyũ, neryo omugulu asyamĩnyĩkalĩbwa nenyũ mwasyamĩnyĩkalĩbwa haguma naye omo lukengerwa.

⁵Neryo mwĩte esyongumbu syenyũ syʼekihugo, syesĩ: erĩsĩngĩra, ebĩtĩsĩrĩre, engumbu nyibi, erisonda ibi, nʼobururu bʼomũsĩndo wʼerikwama esyosanamu.

⁶Busana nʼemyatsi ngʼeyĩ erihitana lya Nyamuhanga lĩkahĩka oko bandu abatĩowa.

⁷Nenyũ momwabya mukakola ngʼabo, omugulu mwahĩra emitima yenyũ, oko myatsi eyo.

⁸Nĩkwa lino, nenyũ mugane eyosĩ eyĩ: erihitana, eriagalirwa, ekĩnĩga, eritsuma; kandi Sĩmũbũge ebĩtĩsĩrĩre.

⁹Muleke eribihirana, kusangwa mwabirigabana nʼomundu wa kera nʼemĩbĩrĩ yiwe.

¹⁰Kandi mwabiriambala omundu muhya-muhya, oyo Nyamuhanga, mũhangĩkĩ wuwe akabindula, itwatoka erimusosa nʼerimuminya ndeke.

¹¹Neryo sihakiri kandi omundu wʼEbihanda nʼOmũyũda, kutse oyubwene nʼoyutabwene kutse omũyĩra, kutse mundu wʼomolĩ, kutse omukobe, kutse owʼobwĩranda, nĩkwa Kristo ni mukulu wʼabosĩ, kandi Kristo ali omwisi Wʼebyosĩ.

¹²Neryo muli bandu ba Nyamuhanga. Abiribanza, abiriyisoga nywe. Busana nʼekyo muyire emitima yʼeriganyira, omutima wʼobubuya, owʼerĩyĩkehya, owʼobolo, owʼeriyibombeka.

¹³Neryo muganyirane, mubuyirane omugulu omundu awite omwatsi oko gundi. Ngoko Mukama ababuyira, nenyũ ko mwangabuyira abandi bo mutya.

¹⁴Kandi kwilaba ebyosĩ, muyire omutima wʼolwanzo olũkahĩkanaya ebyosĩ haguma omo buguma.

¹⁵Neryo muleke Obuholo bwa Kristo butabale emitima yenyũ. Kusangwa mwabiribirikirwa na Nyamuhanga eribya nʼobuholo obo haguma, omo mubiri muguma. Kandi mubye bandu bʼewasĩngya.

¹⁶Ebĩnywa bya Kristo, omo bubuya bwabyo bosĩ, bĩkale omo mitima yenyũ. Mũkangĩrĩranaye, nʼerihana obuli mundu mũlĩkyabo omo menge gosĩ. Mwimbe esyonyimbo, esyonyimbo syʼeripipa, nʼesyonyimbo syʼerĩramya, mwimbire Nyamuhanga nʼemitima yʼewasĩngya.

¹⁷Nʼebyosĩ mukakola, omo kĩnywa, kutse omo mũbĩrĩ, mukole ebyosĩ omo lĩna lyʼomukama Yesu, imunemuha ewasĩngya uku Tata Nyamuhanga busana na Yesu.

¹⁸Abakalĩ, mowe abĩba nywe, ngoko litolere imwakola ngʼAbakristo.

¹⁹Abĩba, mwanze abakalĩ benyũ, simukale kubo.

²⁰Abana, mowe ababũtĩ benyũ omo myatsi yosĩ, kusangwa ekĩ kĩkatsemesaya Omukama.

²¹Ĩnywe abotata, sĩmũhĩtanaye abana benyũ, bakasyaluha.

²²Abakobe, mowe abakama benyũ ba muna-kihugo omo myatsi yosĩ. Simukole kusangwa bakabasamalira, imuli ngʼabakatsemesaya abandu basa, nĩkwa mukole nʼomutima owene, imukakenga Omukama Yesu.

²³Ebyosĩ mukakola, mukole nʼomutima gʼomuhwa, nga mukakolera Omukama, butsira bandu.

²⁴Ĩmũnasĩ ngoko Mukama asyabahemba. Mwasyangirira ebyo abĩkĩre busana nʼabandu buwe. Kusangwa Omukama Kristo, yo mukakolera.

²⁵Nʼoyukakola nabi asyalihwa busana nʼebibi biwe, butsira butaga.