Read nande 1 Abanya Tesalonĩka 1 Bible Online

1 Abanya Tesalonĩka 1 - nande bible

1 Abanya Tesalonĩka 1

¹Ĩtwe Paũlo na Sĩlvano na Tĩmoteo, tukasaka ebarua eyĩ oko bandu abʼekanĩsa eyiri eTesalonĩka, abandu ba Nyamuhanga Tata nʼOmukama Yesu Kristo. Olukogo nʼobuholo bibye nenyũ.

²Tukaha ewasĩngya emigulu yosĩ uku Nyamuhanga busana nʼĩnywe bosĩ, kandi itukabahula emigulu yosĩ omwʼisaba lyetu.

³Tukibuka embere sya Nyamuhanga Tata wetu, ngoko mukakola omwʼĩkĩrĩrya nʼomo lwanzo; kandi ngoko mũsĩkĩre omo maha wenyũ busana nʼOmukama wetu Yesu Kristo.

⁴Tũnasĩ, balĩkyetu, ngoko Nyamuhanga abanzĩre, kandi abiriyisoga nywe eribya bandu buwe.

⁵Neryo motwabaletera Engulu Yowene, butsira omo bĩnywa bisa, nĩkwa omo maka, nʼomo Mũlĩmũ Abũyĩrĩre, nʼerĩsĩngana lyʼomwatsi wʼekwenene. Mũnasĩ emikolere yetu omo katĩkatĩ kenyũ; ngoko twakola busana nʼerĩbawatĩkya.

⁶Nenyũ mwatũgerereraya, kandi mwagerereraya Omukama nibya. Nomo mwanabana amalĩge mangi, momwangirira erĩkangĩrĩrya eryo omo butseme obũkalũa oko Mũlĩmũ Abũyĩrĩre.

⁷Neryo momwabya ekĩmĩnyĩsyo busana nʼabandu abĩkĩrĩraya eMakedonĩa nʼekihugo kyʼAbagĩrĩkĩ.

⁸Kusangwa busana nenyũ ekĩnywa kyʼomukama mokyatsungana butsira eMakedonĩa nʼekihugo kyʼAbagĩrĩkĩ hasa, nĩkwa engulu yʼerĩkĩrĩrya lyenyũ uku Nyamuhanga yabiritsungana ehosĩ, neryo siritolere tukahula omwatsi.

⁹Kusangwa abandu bosĩ bakatũlago ngoko mwatũkokaya, kandi ngoko mwaleka esyosanamu nʼeribindukira Nyamuhanga, imwatoka erikolera Nyamuhanga wʼekwenene, oyuliho.

¹⁰Kandi imwatoka eririndirira Omugala wuwe erĩlũa elubula. Omugala wuwe oyo ni Yesu, oyo walũbũkĩbawa oko baholĩ, oyũkatũlamaya okwʼihitana lya Nyamuhanga erikandisyasa.