Read nande 1 Abanya Tesalonĩka 2 Bible Online

1 Abanya Tesalonĩka 2 - nande bible

1 Abanya Tesalonĩka 2

¹Nenyũ, balĩkyetu, mũnasĩ ndeke, ngoko erĩhĩka lyetu ewenyũ molitabya busa.

²Neryo kandi mũnasĩ, nomo twanagalawa nʼeritsumwa eFĩlĩpĩ, erĩmbere, Nyamuhanga mwatuha obulume-lume eribabwira Engulu Yowene ya Nyamuhanga, nomo bandu banatulwira kutsibu.

³Kusangwa erĩkangĩrĩrya lyetu si ryʼamabehĩ, kutse busana nʼendũndĩ eyitatolere, kutse si busana nʼeriteba bandu.

⁴Nĩkwa, tũkakangĩrĩraya ngoko Nyamuhanga anzĩre ĩtwabũga, ngʼabandu abakasĩmawa na Nyamuhanga erĩtũla Engulu Yowene. Sĩtwetsemesaya bandu, nĩkwa tũkatsemesaya Nyamuhanga Oyũkalebaya emitima yetu.

⁵Kusangwa mũnasĩ ndeke, motũtabahĩkako omo bĩnywa byʼekĩsehya, kutse omo bĩnywa byʼerĩyĩtendererya erĩbĩsa obururu. Nyamuhanga nĩ mũlangĩrĩ wetu!

⁶Motutasonda eripipwa nʼabandu, kutse ĩnywe, kutse abandi, nomo twanabya nʼehamũlĩ ngʼabakwenda ba Kristo.

⁷Nĩkwa motwayibombeka omo katĩkatĩ kenyũ nʼerĩkangya obolo obo nyĩnya akakangaya omugulu akalembera abana buwe.

⁸Neryo kusangwa twabya tũbanzĩre kutsibu twabya twanzĩre erisangira nenyũ butsira Engulu Yowene ĩyoyene, nĩkwa nʼesyongebe syetu nibya. Mwabya banze betu kutsibu!

⁹Balĩkyetu, nenyũ mukibuka erikola lyetu nʼendũhĩ yetu, ngoko twakola omo kiro nʼomo musibo tuti, sĩtũbalũhaye omugulu twabakangĩrĩraya Engulu Yowene ya Nyamuhanga.

¹⁰Inywe muli balangĩrĩ betu, na Nyamuhanga nibya, ngoko emikolere yetu omo katĩkatĩ kenyũ ĩnywe mũkĩkĩrĩraya, ngoko yabya ĩbũyĩrĩre, nʼeyitunganene, nʼeyite mo kahinira.

¹¹Mũnasĩ ngoko twabakolera, obuli mundu omo katĩkatĩ kenyũ ngʼĩse kwʼakakolera abana buwe.

¹²Motwabahana, motwabahamĩrya, motwabalemba-lemba, tuti imwalendera ngoko litolere embere sya Nyamuhanga, oyukababirikira erisangira obwami buwe nʼolukengerwa luwe.

¹³Kandi busana nʼomwatsi oyũ, tukaha Nyamuhanga yʼewasĩngya emigulu yosĩ. Tuti, omugulu twabaletera ekĩnywa kya Nyamuhanga, momũtowakyo nʼeriangirirakyo ngʼekĩnywa kyʼabandu, nĩkwa ngoko kiri kwenene, ekĩnywa kya Nyamuhanga. Kusangwa ni Nyamuhanga oyukakola omo katĩkatĩ kenyũ ĩnywe mũkĩkĩrĩraya.

¹⁴Kusangwa balĩkyetu, emyatsi eyo yahĩka omo makanĩsa wa Nyamuhanga eYũdea, nʼoko bandu ba Kristo Yesu eyo; emyatsi eyo yamabahĩkako nenyũ. Momwalola oko malĩge omo byala byʼabandu bʼekihugo kyenyũ, ngoko nabo mobagalwa omo byala byʼAbayũda.

¹⁵Abayũda mobĩta Omukama Yesu, nʼabamĩnyererĩ, kandi mobatwendererya. Sĩbetsemesaya Nyamuhanga, kandi bali nʼobũyĩgũ oko bandu bosĩ.

¹⁶Bakalenga erĩtũkakĩrya erĩkangĩrĩrya abandu bʼEbihanda omwatsi owangaleterabo erilama. Neryo bakaberereraya olulengo lwʼebibi byabo. Nĩkwa erihitana lya Nyamuhanga lyamasala lyahĩka kubo ko kutsibu.

¹⁷Nĩkwa ĩtwe, balĩkyetu, omugulu twalũsĩbawa ũkwʼĩnywe omo katambĩ kake omo mubiri nĩkwa butsira omo mutima, twabya nʼolukando lunene eribalolako.

¹⁸Motwanza kutsibu erĩbahĩkako. Ĩngye Paũlo, monalenga kandi nʼakandi, nĩkwa Satanĩ moyatũkakĩrya.

¹⁹Kusangwa amaha wetu nindi, nʼobutseme bwetu nindi, kutse akakĩra akʼeriyihalambira nindi kwehĩ? Sĩ nĩna nywe omugulu tuli embere syʼOmukama wetu Yesu okwʼĩhĩka liwe kwehĩ?

²⁰Kwenene ĩnywe muli lukengerwa nʼobutseme bwetu.