Read nande 1 Abanya Tesalonĩka 4 Bible Online

1 Abanya Tesalonĩka 4 - nande bible

1 Abanya Tesalonĩka 4

¹Neryo balĩkyetu, momwiga ũkwʼĩtwe ngoko mutolere erirendera nʼerĩtsemesya Nyamuhanga. Nenyũ mukanakola mutya. Nĩkwa lino tũkababũlaya, nʼeribalemba-lemba busana nʼOmukama Yesu, tuti mukole kwilaba aho.

²Kusangwa mũnasĩ amahano ayo, twabahago omo hamũlĩ yʼomukama Yesu.

³Erĩ ni ʼsonda lya Nyamuhanga, ati anzĩre mubye bandu babũyĩrĩre, nʼeriyihigula oko luteto.

⁴Obuli mundu angaminya erĩhĩkya omũkalĩ omo nzira ĩbũyĩrĩre nʼeyʼerĩsĩkĩbwa.

⁵Siakole omo ngumbu nyibi ngʼEbihanda ko bikakola, ebĩtasĩ Nyamuhanga.

⁶Neryo omundu sĩahalaye uku mũlĩkyabo kutse erĩmũtĩmbako omo myatsi eyĩ. Twabiribabwira erĩmbere nʼeribahana kutsibu tuti, Nyamuhanga akasuyira abandu abakakola emyatsi yosĩ ngʼeyĩ.

⁷Kusangwa Nyamuhanga mwatatubirikira busana nʼerikwama oluteto, nĩkwa mwatubirikira erikwama ebĩbũyĩrĩre.

⁸Neryo oyukagana erĩkangĩrĩrya erĩ, Sialigana bandu, nĩkwa akagana Nyamuhanga oyukabaha Omũlĩmũ Abũyĩrĩre.

⁹Sihali bwaga bwʼeribasakira ebarua busana nʼerianza abalĩkyetu abĩkĩrĩrye, kusangwa Nyamuhanga akabakangĩrĩraya ngoko mwanganzana.

¹⁰Kusangwa mukakola mutya oko balĩkyetu bosĩ omo kihugo kyosĩ kyʼeMakedonĩa. Nĩkwa tukabalemba-lemba, balĩkyetu, tuti mukole mutya kwilaba aho.

¹¹Kandi musonde erĩyĩkalira bolo, nʼerĩyĩhĩra oko mũbĩrĩ wenyũ wowene, nʼeriyikolera omo byala byenyũ, ngoko twabahana.

¹²Neryo imwatoka erĩsĩmwa nʼabatĩkĩrĩrye, kandi simwendisyabya nʼobwaga bwʼekindu.

¹³Balĩkyetu, twanzĩre imwaminya ndeke omwatsi wʼabandu ababirihola, mũkasyakwa obũlĩge ngʼabandi bandu abatawite maha.

¹⁴Kusangwa Wamĩkĩrĩrya ko Yesu mwahola, kandi mwalũbũka. Litya tũkĩkĩrĩraya ko Nyamuhanga asyaleta haguma na Yesu ababirihola ĩbabĩrĩkĩrĩrya Yesu.

¹⁵Kusangwa tukababwira ekĩnywa kyʼomukama tuti ĩtwe, tukiriho, oko kiro kyʼerĩhĩka lyʼomukama, sitwendisyatanga ababirihola.

¹⁶Nĩkwa hasyabya omulenge munene wʼeribirikira, nʼomulenge, wʼomũlaĩka mukulu, nʼomulenge wʼengubi ya Nyamuhanga. NʼOmukama asyandagala akalũa elubula; nʼabahola ĩbabĩrĩkĩrĩrya Kristo basyatsũka erĩlũbũka.

¹⁷Neryo netu ĩtwe tuliho, twasyabalwa haguma nabo omo bĩtũ erĩhĩndana nʼOmukama omo kyanya. Neryo twasyabya haguma nʼOmukama kera na kera.

¹⁸Neryo mũyĩkĩranaye omo bĩnywa ebĩ.