Read nande Yosũa 1 Bible Online

Yosũa 1 - nande bible

Yosũa 1

¹Neryo enyũma wʼoluholo lwa Musa omugombe wʼOmwami Mukulu, Omwami Mukulu mwabũga na Yosũa mugala wa Nũnĩ, omugombe wa Musa ati,

²Musa mugombe wage aholĩre; neryo lino uhangane, usoke eYorodanĩ eyĩ, uwe nʼabandu bosĩ aba, oko kihugo ekyo ngaha abana ba Ĩsraelĩ.

³Ehosĩ obulyatiro bwʼekisando kyenyũ kikalyatanga, namabahaho, ngoko nabwira Musa.

⁴Erĩtsũka embwarara, nʼeLebanonĩ eyĩ, erĩhĩka oko lũsĩ lunene, olũsĩ Efũratĩ ekihugo kyʼAbahĩtĩ, nʼerĩhĩka oko ngetsi nene ebwanga bwʼerirenga lyʼeryuba, ho hasyabya Omutano wenyũ.

⁵Sihendisyabya mundu nʼomuguma oyo wasyatoka erihangana embere syawe ebiro byosĩ byʼeribyaho lyawe; ngoko nabya na Musa, ko nasyabya haguma nawe nyitya; sindiendĩsyakũhũtatira, kutse erĩkũsĩganĩa.

⁶Ubye nʼamaka nʼeriyisiga; kusangwa wasyalĩsya abandu aba bʼomwandu wʼekihugo ekyo nalahĩrĩraya abotata-kulu wabo eriha kyobo.

⁷Ekigumakisa ubye nʼamaka nʼeriyisiga kutsibu, ukwamirire erikola emigambo yosĩ, eyo mugombe wage Musa akuhana; suteruke kuyo oko byala byʼamali, kutse ebyʼamalembe, iwatoka eribya nʼomũyĩsa ehosĩ ukaya.

⁸Ekitabu ekĩ kyʼemigambo sĩkĩlũe omo buno bwawe, nĩkwa wasyaganĩryakyo omo musibo nʼomo kiro, iwabana erikwamirira erikola ebyosĩ ebĩsakĩre mukyo; neryo wasyayira enzira yawe mo mũyĩsa, kandi wasyatoka ndeke.

⁹Sinditakuhana kwehĩ? Ubye nʼamaka, uyisige ndeke; Sigubahe kutse erĩhahũkya omutima; kusangwa Omwami Mukulu Nyamuhanga wawe ali haguma nawe ehosĩ ukaya.

¹⁰Neryo Yosũa mwahana abasondolĩ bʼabandu ati,

¹¹Mulabe omo katĩkatĩ kʼekilaliriro, muhane abandu muti, Mũhũke endanda; kusangwa omo biro bisatu mwasyasoka eYorodanĩ eyĩ, eriingira erĩsĩgalya ekihugo, ekyo Mwami Mukulu Nyamuhanga wenyũ akabaha erĩsĩgalyakyo.

¹²Kandi Yosũa mwabũga nʼAbarũbenĩ, nʼAbagadĩ, nʼoluhande lwʼekihanda kya Manase ati,

¹³Mwibuke ekĩnywa ekyo Musa mugombe wʼOmwami Mukulu abahana ati, Omwami Mukulu Nyamuhanga wenyũ akabaha erihumula, kandi asyabaha ekihugo ekĩ.

¹⁴Abakalĩ benyũ, abana benyũ, nʼebihangulo byenyũ, basyĩkala omo kihugo ekyo Musa abaha eyisirya wʼeYorodanĩ; nĩkwa ĩnywe mwasyasoka embere syʼabagala benyũ ĩmũnayĩkangatĩre, abalume bosĩ bʼamaka, esyombangĩ, kandi mwasyawatĩkyabo;

¹⁵erĩhĩka aho Mwami Mukulu abiriha abagala benyũ erihumula, nga nywe, nabo ĩbamabĩsĩgalya ekihugo ekyo Mwami Mukulu akahabo; neryo mwasyasuba omo kihugo ekyo mwabĩrĩsĩgalya, ĩmwasĩgalyakyo, ekyo Musa mugombe wʼOmwami Mukulu abaha eyisirya oko Yorodanĩ erilola eyikasira eryuba.

¹⁶Nabo mobasũbĩrya Yosũa bati, Ebyosĩ wabirituhana twasyakolabyo, nʼeyo ukatutuma twasyayayo.

¹⁷Ngoko twabirihulikirira Musa omo myatsi yosĩ, ko tukandisyakuhulikirira tutya; ekiguma kisa, Omwami Mukulu abye nawe, ngoko abya na Musa.

¹⁸Omundundi oyo wasyapona erihana lyawe, nʼerĩtĩndĩowa ebĩnywa byawe omo byosĩ ukamuhana, asyĩtwa; ekiguma kisa ubye nʼamaka kandi uyisige ndeke.