Read nande Yosũa 11 Bible Online

Yosũa 11 - nande bible

Yosũa 11

¹Neryo omugulu Yabĩnĩ omwami wʼeHazorĩ owago, mwatumira uku Yobabũ omwami wʼeMadonĩ, nʼoko mwami wʼeSĩmronĩ, nʼoko mwami wʼeAksafũ,

²nʼoko bami ababya elutambi lwʼendata, omo kihugo kyʼebitwa, nʼomo Araba, elutambi lwʼeyĩkwa lwʼeKĩneretĩ, nʼomwʼĩbanda, nʼoko bitwa byʼeDorĩ oluhande lwʼeyĩkwa,

³nʼoko Mukanana oluhande lwʼendata nʼoko luhande lwʼeyĩkwa, nʼoko Mũamorĩ, nʼoMũhĩtĩ, nʼoMũperezĩ, nʼoMũyebũsĩ omo kihugo kyʼebitwa, nʼoMũhĩvĩ eyĩkwa oko Hermonĩ omo kihugo kyʼeMĩsĩpa.

⁴Neryo mobahuluka ibo nʼemilondo yabo yosĩ yʼabasĩrĩkanĩ haguma nabo, abandu bangi, ngʼemisege eyiri oko mũsĩke wʼengetsi oko bungi bwabo, haguma nʼesyosabayĩrĩ nʼesyogalĩ nyingi kutsibu.

⁵Abami bosĩ aba mobahĩndana haguma; mobahuluka, mobateka ekilaliriro haguma oko magetsi wʼeMeromĩ, erilwa nʼAbaĩsraelĩ.

⁶Neryo Omwami Mukulu mwabwira Yosũa, ati, Sigubahebo; kusangwa engyakya oko ndambĩ ngʼeno nasyahĩrabo abosĩ ĩbamabĩkwa omo byala bya Ĩsraelĩ; wasyatwa emĩsĩsa yʼamagulu wʼesyosabayĩrĩ syabo, nʼerĩhĩsya esyogalĩ syabo omo muliro.

⁷Neryo Yosũa mwasa, nʼabandu bosĩ bʼamalwa haguma naye, eribambirabo mwabũlĩkĩranĩabo nʼeribambirabo hakũhĩ nʼamagetsi wʼeMeromũ, mobawa kubo.

⁸Kandi Omwami Mukulu mwahĩrabo omo byala bya Ĩsraelĩ, mobaswĩryabo, kandi mobahigabo erĩhĩka eSĩdonĩ nene, nʼoko Mĩserofotĩ-maĩmũ, nʼoko musya wʼeMĩsĩpa oluhande lwʼendata; mobaswĩryabo, erĩhĩka aho batasĩgĩra nʼomuguma wa kubo.

⁹Na Yosũa mwakolabo ngoko Mwami Mukulu amubwira. Mwatwa emĩsĩsa yʼesyosabayĩrĩ syabo, kandi mwahĩsya esyogalĩ syabo syʼomo muliro.

¹⁰Kandi Yosũa mwasuba enyũma oko mugulu oyo, mwĩmya eHazorĩ, mwĩta omwami wako omo mũyalĩ; kusangwa eHazorĩ erĩmbere yabya mũyĩ mukulu wʼamami gosĩ ayo.

¹¹Kandi mwĩta abandu bosĩ ababyamo omo boya bwʼomũyalĩ, nʼerĩheryabo kutsibu; sihabya oyũsĩgere oyukahumula; kandi mwahĩsya eHazorĩ omo muliro.

¹²Kandi Yosũa mwĩmya emĩyĩ yosĩ yʼabami abo, nʼabami bayo bosĩ, kandi mwĩtabo omo boya bwʼomũyalĩ, mwaheryabo ndeke; ngoko Musa omugombe wʼOmwami Mukulu ahana.

¹³Nĩkwa busana nʼemĩyĩ eyabya yimene oko hitwa, Abaĩsraelĩ mobatahĩsya nʼomuguma wa kuyo, ye nʼeHazorĩ ĩyoyene; Yosũa mwahĩsyago.

¹⁴Kandi eminyego yosĩ yʼemĩyĩ eyo, nʼebihangulo, abana ba Ĩsraelĩ mobayĩmĩryabyo mo minyego; nĩkwa mobĩta obuli mundu omo boya bwʼomũyalĩ, erĩhĩka aho bamabĩhereryabo, kutse mobatasĩga oyukahumula nʼomuguma.

¹⁵Ngoko Mwami Mukulu ahana Musa omugombe wuwe, Musa mwahana Yosũa atya; kandi Yosũa mwakola atya; mwatasĩga ekindu ekyo atetakola omo byosĩ Omwami Mukulu ahana Musa.

¹⁶Na Yosũa mwĩmya ekihugo kyosĩ ekyo kyʼatya, ekihugo kyʼebitwa, nʼekyosĩ kyʼelutambi lwʼeyĩkwa nʼekihugo kyosĩ kyʼeGosenĩ, nʼomwʼĩbanda lyakyo, nʼekyʼeAraba, nʼekihugo kyʼebitwa kya Ĩsraelĩ nʼerĩbanda lyakyo;

¹⁷erĩtsũka oko kitwa kyʼeHalakĩ, ekikahetukira eSeĩrĩ, erĩhĩka oko Baal-gadĩ omo musya wʼeLebanonĩ eyĩkwa oko kitwa kyʼeHermonĩ; kandi mwĩmya abami bosĩ babyo, mwaswĩryabo, mwĩtabo.

¹⁸Yosũa mwalwa oko mugulu muli nʼabami bosĩ abo.

¹⁹Sihabya omũyĩ owasangana nʼabana ba Ĩsraelĩ, bate iba nʼAbahĩvĩ esyondũlanĩ syʼeGĩbeonĩ. Mobahamba eyosĩ yʼomo malwa.

²⁰Kusangwa lyabya lyʼOmwami Mukulu erĩkalya emitima yabo eribambira Ĩsraelĩ omo malwa, iniatoka erĩheryabo kutsibu, sibaganyirawe, nĩkwa abane erĩheryabo, ngoko Mwami Mukulu ahana Musa.

²¹Kandi Yosũa mwasa oko mugulu oyo, mwĩta Abaanakĩ oko kihugo kyʼebitwa, erĩlũa eHebũronĩ, nʼerilũa eDebĩrĩ, nʼerĩlũa eAanabũ, nʼerĩlũa oko kihugo kyosĩ kyʼebitwa kyʼeYũda, nʼerĩlũa oko kihugo kyosĩ kyʼebitwa kya Ĩsraelĩ. Yosũa mwaheryabo kutsibu haguma nʼemĩyĩ yabo.

²²Sihabya nʼomuguma oyo wasigala oko Baanakĩ omo kihugo kyʼabana ba Ĩsraelĩ; ye nʼeGaza, omo Gatĩ; nʼomo Asdodĩ, abandi mobasĩgalira.

²³Na Yosũa mwĩmya ekihugo kyosĩ kyʼatya, ngʼebyosĩ ebyo Mwami Mukulu abũga na Musa; kandi Yosũa mwahakyo Ĩsraelĩ mo mwandu ngoko babya bagabene omo bihanda byabo. Nʼekihugo mokyaluhuka oko malwa.