Read nande Yosũa 18 Bible Online

Yosũa 18 - nande bible

Yosũa 18

¹Kandi endeko yosĩ yʼabana ba Ĩsraelĩ mobayĩhĩndanĩa haguma, mobasingikaho ehema yʼerĩhĩndanamo. Nʼekihugo mokyakĩndwa embere syabo.

²Kandi mohasĩgalira omo katĩkatĩ kʼabana ba Ĩsraelĩ ebihanda birinda, abate bĩmya omwandu wabo.

³Na Yosũa mwabwira abana ba Ĩsraelĩ, ati, Omugulu gungahi mwasyalindirira eriingira nʼerĩsĩgalya ekihugo, ekyo Mwami Mukulu, Nyamuhanga wʼabotata-kulu wenyũ, abiribaha kwehĩ?

⁴Muyahulire abandu basatu omo buli kihanda; nage nasyatumabo, nabo basyahangana, nʼerirendera omo kihugo, nʼeriyitomakyo ngʼomwandu wabo kwʼali; neryo basyasa kwĩngye.

⁵Nabo basyagabakyo mo mbibi sirinda. Yũda asyĩkala omo mutano wuwe elutambi, nʼekĩtũnga kya Yosefũ kyasyĩkala omo mutano wakyo elutambi lwʼendata.

⁶Mwasyayitoma ekihugo mo mbibi sirinda, nʼerireta amatomo go hano kwĩngye. Nage bagerekera hano embere syʼOmwami Mukulu Nyamuhanga wetu.

⁷Kusangwa Abalawĩ sibawite erĩgabo omo katĩkatĩ kenyũ; kusangwa obũhererĩ bwʼomwami Mukulu bo mwandu wabo. Na Gadĩ na Rũbenĩ nʼekihande kyʼekihanda kya Manase babiritola omwandu wabo wʼeyisirya wʼeYorodanĩ ebwanga bwʼendata, eyo Musa omugombe wʼOmwami Mukulu ahabo.

⁸Nʼabandu abo mobahangana mobahongoka; na Yosũa mwakangirira abagenda eriyitoma ekihugo, ati, Mugende mulendere omo kihugo, nʼeriyitomakyo, neryo mwase kandi kwingye; nage nasyabagerekera hano embere syʼOmwami Mukulu eSĩlo.

⁹Nʼabandu abo mobagenda mobalaba omo kihugo, mobasaka omo kitabu oko mĩyĩ mo magabo alinda; kandi mobasa uku Yosũa omo kilaliriro eSĩlo.

¹⁰Na Yosũa mwagerekerabo eSĩlo embere syʼOmwami Mukulu; neryo Yosũa mwagabira ekihugo oko bana ba Ĩsraelĩ ngʼemiganzo yabo kwʼiri.

¹¹Nʼomugereko wʼekihanda kyʼabana ba Benyamĩna mwawa ngʼebĩtũnga byabo. Nʼomutano wʼomugereko wabo mwahulukira omo katĩkatĩ kʼabana ba Yũda nʼabana ba Yosefũ.

¹²Nʼomutano wabo oko luhande lwʼelutambi lwʼendata abya atsũkĩre eYorodanĩ; nʼomutano mwahetuka oko luhande lwʼeYerĩko elutambi lwʼendata, kandi mwahetuka omo kihugo byʼebitwa ebwanga bwʼeyĩkwa; nʼesyombulukiro syago syabya oko mbwarara yʼeBetĩ-awenĩ.

¹³Nʼomutano mwalaba atya erĩlũa eyo erĩhĩka eLũzĩ, erĩhĩka oko mũsĩke wʼeLũzĩ (eyo ye Betĩelĩ), ebwanga bwʼelutambi lwʼeyĩkwa; nʼomutano ĩnĩandagalĩre eAtarotĩ-Adarĩ, oko kitwa ekiri oko lutambi lwʼeyĩkwa lwʼeBetĩ-Horonĩ yʼeyĩkwa.

¹⁴Nʼomutano mwalaba, kandi mwabinduka oko luhande lwʼeyĩkwa erilola elutambi lwʼeyĩkwa erĩtsũka oko kitwa ekiri embere wʼeBetĩ-Horonĩ oko luhande lwʼelutambi lwʼeyĩkwa; erihuluka lyago lyabya eKĩrĩatĩ-baalĩ (eyo ye Kĩrĩatĩ-yearĩmũ), omũyĩ wʼabana ba Yũda. Oyũ abya ebwanga bwʼeyĩkwa.

¹⁵Nʼoluhande lwʼelutambi lwʼeyĩkwa atsũka oko ndũlĩ yʼeKĩrĩatĩ-yearĩmũ; nʼomutano mwalaba ebwanga bwʼeyĩkwa, mwahulukira okwʼĩsoko yʼamagetsi wʼeNeftoa.

¹⁶Nʼomutano mwandagala oko ndũlĩ yʼekitwa ekiri omo musya wʼomugala wa Hĩnomũ, owali omo musya wa Refaĩmũ oko bwanga bwʼelutambi lwʼendata; iniatogere omo musya wa Hĩnomũ, oko bwandagala bwʼOmũyebũsĩ erilola elutambi lwʼeyĩkwa, kandi ĩnĩandagalĩre eEnĩ-Rogelĩ.

¹⁷Kandi inialolere eluhande lwʼelutambi lwʼendata, ĩnĩahũlũkĩre eEnĩ-semesĩ, kandi ĩnĩahũlũkĩre eGelĩlotĩ, eyisirya yʼerihetuka lya Adũmĩmũ, kandi iniandagalira oko lĩbwe lya Bohanĩ mugala wa Rũbenĩ.

¹⁸Kandi ĩnĩalabĩre oko luhande olũsamalĩre eAraba ebwanga bwʼelutambi lwʼendata, kandi iniandagalira eAraba.

¹⁹Nʼomutano mwalaba oko mũsĩke wʼeBetĩ-Hogla oko bwanga bwʼelutambi lwʼendata; nʼobuhulukiro bwʼomutano bwabya oko mugera wʼelutambi lwʼendata wʼEngetsi yʼomũnyũ, oko ndũlĩ yʼelutambi lwʼeyĩkwa lwʼeYorodanĩ. Oyo abya mutano wʼelutambi lwʼeyĩkwa.

²⁰NʼeYorodanĩ lwabya mutano wakyo oko luhande lwʼendata. Oyo go mwandu wʼabana ba Benyamĩna, oko mitano eyĩtĩmbĩre kukyo, ngʼebĩtũnga byabo ko biri.

²¹Neryo emĩyĩ yʼekihanda kyʼabana ba Benyamĩna ngʼebĩtũnga byabo yabya eYerĩko, nʼeBetĩ-Hogla, nʼeEmekĩKesĩsĩ,

²²nʼeBetĩ-Araba, nʼeZemaraĩmũ, nʼeBetĩelĩ,

²³nʼeAwĩmũ, nʼePara, nʼeOfũra,

²⁴nʼeKefarĩ-Amonĩ, nʼeOfũnĩ, nʼeGeba; emĩyĩ erĩkũmĩ nʼeyĩbĩrĩ nʼemikondo yayo.

²⁵Gĩbeonĩ, nʼeRama, nʼeBerotĩ,

²⁶nʼeMĩsĩpe, nʼeKefĩra, nʼeMoza,

²⁷nʼeRekemũ, nʼeĩrĩpelĩ, nʼeTarala,

²⁸nʼeZela, nʼeElefũ, nʼeYebũsĩ (eyo ye Yerũsalema), eGĩbeatĩ, nʼeKĩrĩatĩ; emĩyĩ erĩkũmĩ nʼeyĩnĩ nʼemikondo yayo. Oyo go mwandu wʼabana ba Benyamĩna ngʼebĩtũnga byabo.