Read nande Yosũa 22 Bible Online

Yosũa 22 - nande bible

Yosũa 22

¹Neryo Yosũa mwabirikira Abarũbenĩ, nʼAbagadĩ, nʼekihande kyʼekihanda kya Manase,

²mwabwirabo ati, Mwabĩrĩteya ebyosĩ ebyo Musa omugombe wʼOmwami Mukulu abahana, kandi mwabirihulikirira omulenge wage omo byosĩ ebyo nabahana.

³Momũtasĩganĩa abagala benyũ ebiro byosĩ ebĩ erĩhĩka mũnabwĩre, nĩkwa mwabĩrĩteya emilage yʼerihana lyʼOmwami Mukulu Nyamuhanga wenyũ.

⁴Na lino Omwami Mukulu Nyamuhanga wenyũ abiriha bagala benyũ obuluhuke, ngoko abwirabo; neryo lino musubule, mugende oko mahema wenyũ, oko kihugo kyʼesyombibi syenyũ, esyo Musa omugombe wʼOmwami Mukulu abaha eyisirya wʼeYorodanĩ.

⁵Ekiguma kisa mũtegaye kutsibu erikola erihana nʼebihano ebyo Musa omugombe wʼOmwami Mukulu abahana erianza Omwami Mukulu Nyamuhanga wenyũ, nʼerigendera omo nzira siwe, nʼerĩteya ebihano biwe, nʼerimumakirirako, nʼerimukolera nʼomutima wenyũ gosĩ nʼekĩrĩmũ kyenyũ kyosĩ.

⁶Neryo Yosũa mwatsumulabo atya, mwahongokyabo; nabo mobaya oko mahema wabo.

⁷Nĩkwa Musa abya iniabiriha ekihande kyʼekihanda kya Manase omwandu eBasanĩ; nĩkwa Yosũa mwaha ekindi kihande omo katĩkatĩ kʼabagala babo eyisirya wʼeYorodanĩ ebwanga bwʼeyĩkwa. Kandi Yosũa abere abĩhongokyabo eriya omo mahema wabo, mwatsumulabo,

⁸mwabwirabo ati, Musube omo mahema wenyũ nʼebindu bingi, nʼesyonde nyingi kutsibu, nʼebĩtsĩpa, nʼesyamagetsi, nʼemiringa, nʼebyuma, nʼesyongimba nyingi kutsibu; mugabe eminyego yʼesyonzĩgũ syenyũ haguma nʼabagala benyũ.

⁹Nʼabana ba Rũbenĩ nʼabana ba Gadĩ nʼekihande kyʼekihanda kya Manase mobasubula, mobalũa oko bana ba Ĩsraelĩ eSĩlo, omo kihugo kyʼeKanana, eriya oko kihugo kyʼeGĩleadĩ, oko kihugo kyʼerĩsĩgalya lyabo, ekyo basĩgalaya ngʼerihana lyʼOmwami Mukulu omo buno bwa Musa.

¹⁰Kandi omugulu bahĩka oko mbande syʼeYorodanĩ, esiri omo kihugo kyʼeKanana, abana ba Rũbenĩ nʼabana ba Gadĩ nʼekihande kyʼekihanda kya Manase mobahĩmba ekiherero hakũhĩ nʼeYorodanĩ, erilolwako kyabya ini kiherero kinene.

¹¹Neryo abana ba Ĩsraelĩ mobowa engulu ambu, Lebaya, abana ba Rũbenĩ nʼabana ba Gadĩ nʼekihande kyʼekihanda kya Manase bamabĩhĩmba ekiherero embere syʼekihugo kyʼeKanana, omo kihugo kĩtĩmbĩre eYorodanĩ, oko luhande lwʼabana ba Ĩsraelĩ.

¹²Nʼomugulu abana ba Ĩsraelĩ bowa engulu eyĩ, endeko yosĩ yʼabana ba Ĩsraelĩ mobayikuma-kumira eSĩlo, eriyalwa nabo.

¹³Nʼabana ba Ĩsraelĩ mobatuma Fĩnehasĩ omugala wʼomũhererĩ Eleazarĩ oko bana ba Rũbenĩ nʼabana ba Gadĩ nʼekihande kyʼekihanda kya Manase, omo kihugo kyʼeGĩleadĩ,

¹⁴haguma naye abakulu ĩkũmĩ, omukulu muguma busana nʼobuli kĩtũnga kyʼabotata oko buli kihanda kya Ĩsraelĩ; nabo abosĩ babya bakama bʼebĩtũnga byʼabotata wabo omo maelfu wa Ĩsraelĩ.

¹⁵Mobahĩka oko bana ba Rũbenĩ nʼoko bana ba Gadĩ, nʼoko kihande kyʼekihanda kya Manase, omo kihugo kyʼeGĩleadĩ, mobabwirabo bati,

¹⁶Endeko yosĩ yʼOmwami Mukulu iti, Erĩ nĩ ʼlolo lyahi mwabĩrĩhalya uku Nyamuhanga wa Ĩsraelĩ, nʼerireka mũnabwĩre erikwama Omwami Mukulu, nʼerĩyĩhĩmbĩra ekiherero, mukayisamambula mũnabwĩre oko Mwami Mukulu kwehĩ?

¹⁷Erĩlolo lya Peorĩ sĩ rĩnene kwĩtwe ĩsĩtwetwayerya erĩhĩka mũnabwĩre, nʼomo kĩhũnzo ekyasa oko ndeko yʼOmwami Mukulu,

¹⁸muti mukaleka mũnabwĩre erikwama Omwami Mukulu kwehĩ? Kandi kusangwa mukayisamambula oko Mwami Mukulu mũnabwĩre, omo ngyakya asyahitana oko ndeko yosĩ ya Ĩsraelĩ.

¹⁹Nĩkwa ekihugo ekyo mwasĩgalaya kyamabya kibi, neryo musokere omo kihugo kyʼerĩsĩgalya kyʼOmwami Mukulu, aho eHema yʼOmwami Mukulu yĩkere, mwĩmaye erĩsĩgalya omo katĩkatĩ ketu; nĩkwa simuhone oko Mwami Mukulu, kutse simuhone ũkwʼĩtwe erĩyĩhĩmbĩra ekiherero ekite kiherero kyʼOmwami Mukulu Nyamuhanga wetu.

²⁰Akana mugala wa Zera mwatahalya omo kindu kyatakirawa nʼerihitana molitatogera endeko yosĩ ya Ĩsraelĩ kwehĩ? Nʼomundu oyo mwatahera ĩyowene omo kibi kiwe.

²¹Neryo abana ba Rũbenĩ nʼabana ba Gadĩ nʼabana bʼekihande kyʼekihanda kya Manase mobasũbya, mobabwira abakulu bʼamaelfu wa Ĩsraelĩ,

²²bati, Omũtokĩ, Nyamuhanga, Omwami Mukulu, Omũtokĩ, Nyamuhanga Omwami Mukulu! Iye anasĩ, na Ĩsraelĩ naye aminye. Kumbe lyabya ni ʼhona, kutse lyabya eriregula oko Mwami Mukulu sũtũlamaye mũnabwĩre!

²³Twamabya twabĩrĩyĩhĩmbĩra ekiherero erireka erikwama Omwami Mukulu; kutse erihereraho obuhere bwʼerĩokererya kutse obuhere bwʼeyĩsyano yʼengano, kutse erihererako esyohongo syʼamahere wʼobuholo, Omwami Mukulu ĩyowene atswerekyo.

²⁴Nĩkwa kwenene twabirikola omwatsi oyũ busana nʼerĩyĩtegererya, busana nʼomwatsi, tuti, Oko mugulu akasa abana benyũ banganabũga nʼabana betu, bati, Muwitekĩ ekyʼerikola nʼOmwami Mukulu Nyamuhanga wa Ĩsraelĩ kwehĩ?

²⁵Kusangwa Omwami Mukulu abiriyira eYorodanĩ mo mutano omo katĩkatĩ ketu nenyũ, ĩnywe bana ba Rũbenĩ nʼabana ba Gadĩ; simuwite erĩgabo omo Mwami Mukulu. Litya abana benyũ ibaleka abana betu ibatasyubaha Omwami Mukulu.

²⁶Kyaleka ĩtwabũga tuti, Lino tũhĩmbe ekiherero, hate obuhere bwʼerĩokererya, kutse busana nʼehongo;

²⁷nĩkwa hasyabya erĩtũlago omo katĩkatĩ ketu nenyũ, nʼomo katĩkatĩ kʼesyondengo syetu syʼenyũma, itwabana erikola omũbĩrĩ wʼOmwami Mukulu embere siwe omo mahere wetu wʼerĩokererya, nʼomo syohongo syetu, nʼomo mahere wetu wʼobuholo; abana benyũ ĩsĩbangabũga nʼabana betu oko mugulu akasa, bati, Simuwite ĩgabo omo Mwami Mukulu.

²⁸Kyaleka ĩtwabũga tuti, Hasyabya, omugulu basyatubwira ebĩ kutse basyabwira esyondengo syetu oko biro bikasa, neryo twasyabũga tuti, Talebaya ekĩsosekanĩo kyʼekiherero kyʼOmwami Mukulu ekyo abotata-kulu betu bakola, butsira kyʼobuhere bwʼerĩokererya, kutse kyʼehongo; nĩkwa nĩ kyʼerĩtũlago omo katĩkatĩ ketu nenyũ.

²⁹Kibye hali kwĩtwe erihona oko Mwami Mukulu, nʼerireka mũnabwĩre erikwama Omwami Mukulu, erĩhĩmba ekiherero busana nʼobuhere bwʼerĩokererya, busana nʼobuhere bwʼeyĩsyano, kutse busana nʼehongo, ekite kiherero kyʼOmwami Mukulu Nyamuhanga wetu ekiri embere syʼAherĩĩkala liwe.

³⁰Neryo omugulu omũhererĩ Fĩnehasĩ nʼabasondolĩ bʼendeko, abakulu bʼamaelfu wa Ĩsraelĩ ababya haguma naye, bowa ebĩnywa byʼabana ba Rũbenĩ nʼabana ba Gadĩ nʼabana ba Manase ebyo babũga, mobyatsemesyabo ndeke.

³¹Na Fĩnehasĩ omugala wʼomũhererĩ Eleazarĩ mwabwira bana ba Rũbenĩ, nʼabana ba Gadĩ, nʼabana ba Manase, ati, Mũnabwĩre tũnasĩ ko Mwami Mukulu ali omo katĩkatĩ ketu, kusangwa sĩmwetahalya oko Mwami Mukulu. Lino mwabĩrĩlamya abana ba Ĩsraelĩ omo byala byʼOmwami Mukulu.

³²Na Fĩnehasĩ mugala wʼomũhererĩ Eleazarĩ nʼabasondolĩ, mobasubula erĩlũa oko bana ba Rũbenĩ nʼabana ba Gadĩ, erĩlũa omo kihugo kyʼeGĩleadĩ, erĩhĩka oko kihugo kyʼeKanana, nʼoko bana ba Ĩsraelĩ, mobatũlĩrabo omwatsi.

³³Nʼomwatsi oyo mwatsemesya abana ba Ĩsraelĩ; nʼabana ba Ĩsraelĩ mobasĩma Nyamuhanga, mobataswabũga omwatsi wʼeriyalwa nabo, erĩherya ekihugo aho abana ba Rũbenĩ nʼabana ba Gadĩ babya bĩkere.

³⁴Nʼabana ba Rũbenĩ nʼabana ba Gadĩ, mobaluka ekiherero ekyo mo Erĩtũlago; kusangwa, nĩ ʼtũlago omo katĩkatĩ ketu, ngoko Mwami Mukulu ni Nyamuhanga.