Read nande Yosũa 4 Bible Online

Yosũa 4 - nande bible

Yosũa 4

¹Neryo ekihanda kyosĩ kyabere kyabisoka eYorodanĩ yo ndeke, Omwami Mukulu mwabũga na Yosũa ati,

²Musombole abandu ĩkũmĩ nʼababiri omo bandu, omundu muguma omo buli kihanda,

³uhanebo uti, Mutole omo katĩkatĩ kʼeYorodanĩ, aho ebisando byʼabahererĩ byahangana ndeke, amabwe erĩkũmĩ nʼawabiri, mũsokayego haguma nenyũ, mwĩkayego omo kilaliriro, aho mukandilalirira ekiro ekĩ.

⁴Neryo Yosũa mwabirikira abandu ĩkũmĩ nʼababiri, abo asombola oko bana ba Ĩsraelĩ, omundu muguma omo buli kihanda.

⁵Kandi Yosũa mwabũga nabo ati, Mulabire embere syʼerĩsandũko lyʼOmwami Mukulu Nyamuhanga wenyũ omo Yorodanĩ, muheke obuli mundu erĩbwe oko kitigo kiwe, ngʼemiganzo yʼebihanda byʼabana ba Ĩsraelĩ.

⁶Ekĩ kitoke eribya kiminyikalo omo katĩkatĩ kenyũ, neryo omugulu abana benyũ basyabũlya kera bati, Amabwe aya nĩ ʼbũga ambũkĩ kwehĩ?

⁷Neryo mwasyabwirabo muti, Kusangwa amagetsi wʼeYorodanĩ mwatũbwa embere syʼerĩsandũko lyʼendagano yʼOmwami Mukulu omugulu lyasoka eYorodanĩ, amagetsi wʼeYorodanĩ mwatũbwa. Nʼamabwe aya asyabya busana nʼekĩbũkyo oko bana ba Ĩsraelĩ kera na kera.

⁸Nʼabana ba Ĩsraelĩ mobakola batya ngoko Yosũa ahamula, mobĩmya amabwe erĩkũmĩ nʼawabiri omo katĩkatĩ kʼeYorodanĩ, ngoko Mwami Mukulu abwira Yosũa, ngʼemiganzo yʼebihanda byʼabana ba Ĩsraelĩ; mobahekago haguma nabo, nʼaho balalirira mobĩkyago aho.

⁹Kandi Yosũa mwasingika amabwe erĩkũmĩ nʼawabiri omo katĩkatĩ kʼeYorodanĩ, aho ebisando byʼabahererĩ abaheka erĩsandũko lyʼendagano byahangana; nago aneho erĩhĩka mũnabwĩre.

¹⁰Kusangwa abahererĩ abaheka erĩsandũko mobahangana omo katĩkatĩ kʼe Yorodanĩ, erĩhĩka aho obuli kindu ekyo Mwami Mukulu ahana Yosũa eribwira abandu kyahwera, ngʼebyosĩ ebyo Musa ahana Yosũa: Nʼabandu mobanguha, mobasoka.

¹¹Neryo mokyabya, abandu bosĩ babere babisoka ndeke, neryo erĩsandũko lyʼOmwami Mukulu molyasoka nʼabahererĩ, omo meso wʼabandu.

¹²Nʼabana ba Rũbenĩ, nʼabana ba Gadĩ, nʼoluhande lwʼekihanda kya Manase, mobasoka ibanambite ebindu byʼamalwa embere syʼabana ba Ĩsraelĩ, ngoko abwirabo.

¹³Nga elfu makũmĩ ani (40,000) ibanambite ebindu byʼamalwa ĩbayĩtegekenĩe oko malwa, mobasoka embere syʼOmwami Mukulu eriya oko malwa, omo bwerere bwʼeYerĩko.

¹⁴Oko kiro ekyo, Omwami Mukulu mwahamya Yosũa omo meso wʼAbaĩsraelĩ bosĩ; kandi mobamubaha, ngoko bubaha Musa, ebiro byosĩ byʼengebe yiwe.

¹⁵Neryo Omwami Mukulu mwabũga na Yosũa ati,

¹⁶Uhane abahererĩ abakaheka erĩsandũko lyʼerĩtũlago, basabuke balũe omo Yorodanĩ.

¹⁷Neryo Yosũa mwahana abahererĩ ati, Musabuke mũlũe omo Yorodanĩ.

¹⁸Neryo abahererĩ abaheka erĩsandũko lyʼendagano lyʼOmwami Mukulu, babere babisabuka omo Yorodanĩ, nʼobulyatiro bwʼebisando byʼabahererĩ ibwamabiryata oko kitaka kyũmĩre, amagetsi wʼeYorodanĩ mwasuba aho wago, kandi mwabwaga oko syombambalyo syago, ngʼerĩmbere.

¹⁹Nʼabandu bosĩ mobasabuka omo Yorodanĩ oko kiro kyʼerĩkũmĩ kyʼomukera wʼerĩtsũka, mobalalirira eGĩlgalĩ, oko mutano wʼendata wʼeYerĩko.

²⁰Nʼamabwe ayo erĩkũmĩ nʼawabiri ago batola omo Yorodanĩ, Yosũa mwasingikago eGĩlgalĩ.

²¹Neryo mwabũga nʼabana ba Ĩsraelĩ ati, Omugulu abana benyũ basyabũlya abotata wabo oko mugulu akandisyasa, bati, Amabwe aya nĩ ʼbũga ambũkĩ kwehĩ?

²²Neryo mwasyamĩnyĩsya abana benyũ muti, Ĩsraelĩ mwasoka eYorodanĩ eyĩ oko kitaka kyũmĩre.

²³Kusangwa Omwami Mukulu Nyamuhanga wenyũ mũmya amagetsi wʼeYorodanĩ embere syenyũ, erĩhĩka aho mwamabisokera, ngoko Mwami Mukulu Nyamuhanga wenyũ akola oko Ngetsi yʼEngula, eyo ũmaya embere syetu, erĩhĩka aho twasokera;

²⁴abandu bosĩ bʼekihugo batoke eriminya ebyala byʼOmwami Mukulu, ko biri byʼobũtokĩ; imwatoka eriubaha Omwami Mukulu Nyamuhanga wenyũ kera na kera.