Read nande Yosũa 5 Bible Online

Yosũa 5 - nande bible

Yosũa 5

¹Neryo abami bosĩ bʼAbaamorĩ, ababya eyisirya oko Yorodanĩ ebwanga bwʼeyĩkwa, nʼabamĩ bʼAbanya Kanana, ababya oko ngetsi, omugulu bowa ngoko Mwami Mukulu ũmaya amagetsi wʼeYorodanĩ embere syʼabana ba Ĩsraelĩ, erĩhĩka aho twamabisokera, emitima moyasendekerera, neryo emitima yabo moyageruka, busana nʼabandu ba Ĩsraelĩ.

²Oko mugulu oyo Omwami Mukulu mwabũga na Yosũa ati, Muyikolere emihamba yʼerĩbwe, mũbanaye abana ba Ĩsraelĩ.

³Na Yosũa mwayikolera emihamba yʼerĩbwe, mwabanĩa abana ba Ĩsraelĩ oko Katwa kʼObũsonĩ.

⁴Nʼoyũ go mwatsi owaleka Yosũa ĩnĩabanĩabo; abandu bosĩ abalũa eMĩsĩrĩ, ababya balume, nʼabandu bosĩ bʼamalwa, mobaholera omo mbwarara omo nzira, babĩlũa eMĩsĩrĩ.

⁵Kusangwa abandu bosĩ abalũayo ĩbabĩrĩbanĩbwa; nĩkwa ababutirawa omo mbwarara omo nzira bakalũa eMĩsĩrĩ, mobatabanĩbwa.

⁶Kusangwa abana ba Ĩsraelĩ mobagenda omo mbwarara emyaka makũmĩ ani, erĩhĩka aho ekihanda kyosĩ, ba balume bʼamalwa abalũa eMĩsĩrĩ, ĩbamabĩtogotĩbwa kusangwa mobatahulikirira omulenge wʼOmwami Mukulu, abo Mwami Mukulu alahĩrĩraya sĩangalĩga bakalangira ekihugo ekyo Mwami Mukulu alahĩrĩraya abotata-kulu wabo erituhakyo, ekihugo ekyoswĩre mwʼamasabũ nʼobuki.

⁷Nʼabana babo abo ahanganaya omo mwanya wabo, bo Yosũa abanaya; kusangwa isibabwene, kusangwa mobatabanĩryabo omo nzira.

⁸Neryo babere babibuga erĩbanĩa ekihanda kyosĩ, mobĩkala aho wabo omo kilaliriro, erĩhĩka aho balamira.

⁹Kandi Omwami Mukulu mwabũga na Yosũa, ati, Mũnabwĩre nabĩrĩkũmbagalya eriponwa lyʼeMĩsĩrĩ erĩlũa kwĩnywe. Kyaleka erĩna lyʼaho iryahulwa mo Gĩlgalĩ, erĩhĩka hatya.

¹⁰Nʼabana ba Ĩsraelĩ mobalalirira eGĩlgalĩ; kandi mobateya Erikiruka oko kiro kyʼerĩkũmĩ nʼebini kyʼomukera omwʼĩgolo-golo omo bwerere bwʼeYerĩko.

¹¹Neryo mobalya oko byalya byʼekihugo engyakya enyũma wʼEkiro Kikulu kyʼErikiruka, ehitole ehite mo kĩhamya nʼesyombuto syʼengano esĩkalangĩre oko kiro ekyo.

¹²Nʼamana mũmbya omo ngyakya, ibamabirya esyombuto syʼekihugo ekyo; neryo abana ba Ĩsraelĩ mobataswabya nʼamana kandi; nĩkwa mobalya ebĩgũma byʼekihugo kyʼeKanana oko mwaka oyo.

¹³Neryo mokyabya, omugulu Yosũa abya hakũhĩ nʼeYerĩko, mwasumba ameso wuwe, neryo mwalangira ihali omundu oyo wimene erĩlolya eyo ali nʼomũyalĩ owakũlĩre omo byala biwe; neryo Yosũa mwaya eyo ali, mwabũga naye ati, Uli wa kwĩtwe, kutse gʼoko syonzĩgũ syetu kwehĩ?

¹⁴Naye mwabũga ati, Iyihi; nĩkwa namasa ngʼomunya-mwami wʼemilondo yʼOmwami Mukulu. Neryo Yosũa mũnamya obũsũ buwe bʼoko kitaka, kandi mwaramya, mwabũga naye ati, Omukama wage akabũgakĩ nʼomugombe wuwe kwehĩ?

¹⁵Nʼomunya-mwami wʼemilondo yʼOmwami Mukulu mwabũga na Yosũa ati, Lũsaya engendero yawe yʼoko kisando kyawe; kusangwa aho wimene habũyĩrĩre. Neryo Yosũa mwakola atya.