Read nande Yosũa 6 Bible Online

Yosũa 6 - nande bible

Yosũa 6

¹Nĩkwa Abanya Yerĩko mobakinga esyongyo syo kutsibu busana nʼabana ba Ĩsraelĩ; isihali mundu ukahuluka, kandi isihali mundu ukingiramo.

²Neryo Omwami Mukulu mwabũga na Yosũa ati, Ũlebaye, nabĩrĩhĩra eYerĩko omo byala byawe, nʼomwami wako, nʼabandu bʼobũtokĩ esyombangĩ.

³Nenyũ mwasyatĩmba oko mũyĩ, abandu bosĩ bʼamalwa, erĩtĩmba oko mũyĩ engendo nguma. Wasyakola utya ebiro ndatu.

⁴Nʼabahererĩ balinda basyaheka esyongubi sirinda syʼamahembe wʼesyombangale embere syʼerĩsandũko eryo; nʼekiro kyʼakalinda mwasyatĩmba oko mũyĩ esyongendo sirinda, nʼabahererĩ basyabuha esyongubi.

⁵Neryo omugulu basyabuha nʼomugulu mũkowa omulenge wʼengubi, abandu bosĩ basyabũgya olukanda lunene; nʼolũhĩmbo lwʼomũyĩ lwasyaterera ahisi, nʼabandu basyahetukiramo obuli mundu embere siwe.

⁶Kandi Yosũa omugala wa Nũnĩ mwabirikira abahererĩ, mwabwirabo ati, Muheke erĩsandũko lyʼendagano, nʼabahererĩ balinda baheke esyongubi sirinda syʼamahembe wʼesyombangale embere syʼerĩsandũko lyʼOmwami Mukulu.

⁷Nabo mobabwira abandu bati, Mulabe, mũtĩmbe oko mũyĩ, nʼabandu abambite ebindu byʼamalwa balabe embere wʼerĩsandũko lyʼOmwami Mukulu.

⁸Neryo mokyabya kitya, omugulu Yosũa amabĩbũga nʼabandu, abahererĩ balinda ĩbanahekĩre esyongubi sirinda syʼamahembe wʼesyombangale embere syʼOmwami Mukulu mobalaba, mobabuha esyongubi; nʼerĩsandũko lyʼendagano yʼOmwami Mukulu molyakwamaʼbo.

⁹Nʼabandu abambite ebindu byʼamalwa mobaya embere wʼabahererĩ ababuha esyongubi, nʼabʼenyũma mobakwama erĩsandũko, ibanemubuha esyongubi bakagenda.

¹⁰Kandi Yosũa mwahana abandu ati, Sĩmũsyebũgaya olukanda, kutse emirenge yenyũ sĩyĩsyogũbawa, kutse Sihasyebya ekĩnywa kĩkalũa omo buno bwenyũ, erĩhĩka aho nasyababwirira nyiti mũbũgaye olukanda; neryo mwasyabũya olukanda.

¹¹Neryo mwatĩmbya erĩsandũko lyʼOmwami Mukulu oko mũyĩ, ĩbanemũtĩmbako engendo nguma; kandi mobasuba omo kilaliriro, mobagotsera omo kilaliriro.

¹²Kandi Yosũa mwabuka omo ngyakya-ngyakya, nʼabahererĩ mobaheka erĩsandũko lyʼOmwami Mukulu.

¹³Nʼabahererĩ balinda ĩbanahekĩre esyongubi sirinda syʼamahembe wʼesyombangale mobaya embere syʼerĩsandũko lyʼOmwami Mukulu ibanemuyitsingira olugendo, mobabuha esyongubi; nʼabandu abambite ebindu byʼamalwa mobatangirira; nʼabʼenyũma mobakwamirira erĩsandũko lyʼOmwami Mukulu, ibakagenda ibanemubuha esyongubi.

¹⁴Nʼekiro kyʼakabiri mobatĩmba oko mũyĩ ko ngendo nguma, kandi mobasuba omo kilaliriro; mobakola batya ebiro ndatu.

¹⁵Neryo oko kiro kyʼakalinda, mobatsinduka omo ngyakya-ngyakya omo mwĩtsange, mobatĩmba oko mũyĩ ngoko babya bakayira engendo sirinda; kiguma kisa oko kiro ekyo mobatĩmba oko mũyĩ esyongendo sirinda.

¹⁶Neryo oko ngendo yʼakalinda, omugulu abahererĩ babuha esyongubi, Yosũa mwabwira bandu, ati, Mũbũgaye olukanda; kusangwa Omwami Mukulu abiribaha omũyĩ.

¹⁷Nʼomũyĩ oyo asyabya owatakĩre oko Mwami Mukulu, igo nʼebyosĩ ebirimo; Rahabũ mũmalaya ĩyowene asyabyaho, iye nʼabosĩ abali haguma naye omo nyũmba, kusangwa mwabĩsa abakwenda abo twatuma.

¹⁸Nĩkwa ĩnywe, mũyĩtegaye oko bindu ebĩtakĩrwe, mukasyabya kwʼeritakira busana nʼebyo mũlyatũlako; mukasyayira ekilaliriro kya Ĩsraelĩ mo kitakirwa, mũkalolyakyo oko malĩge.

¹⁹Nĩkwa ebĩtsĩpa byosĩ, nʼesyamagetsi, nʼebindu byʼemiringa nʼebyʼebyuma, bĩbũyĩrĩre oko Mwami Mukulu; byasyahĩka omo kigona kyʼOmwami Mukulu.

²⁰Neryo abandu mobabũgya olukanda, nʼabahererĩ mobabuha esyongubi; neryo amugulu abandu bowa omulenge wʼengubi, abandu mobabũgya olukanda lunene, nʼolũhĩmbo molwaterera ahisi, nʼabandu mobahetukira omo mũyĩ, obuli mundu embere siwe, mobahũnga omũyĩ.

²¹Kandi mobaherya ebyosĩ byʼomo mũyĩ byo kutsibu abalume nʼabakalĩ, abalere nʼabakulu, nʼesyonde, nʼesyombũlĩ, nʼesyopunda, omo boya bwʼomũyalĩ.

²²Neryo Yosũa mwabwira abandu babiri abalinga ekihugo ati, Mugende omo nyũmba yʼomũmalaya, mũlũsaye mʼomũkalĩ oyo, nʼebyosĩ awite, ngoko mwamũlahĩrĩraya.

²³Neryo abalwana abalĩngĩ abo mobingira, mobahũlũkya Rahabũ, nʼĩse, na nyĩnya, nʼabagala babo, nʼebyosĩ abya awite; mobahũlũkya ekĩtũnga kiwe kyosĩ; mobahĩrabo ekyaswa kyʼekilaliriro kya Ĩsraelĩ.

²⁴Neryo mobahĩsya omũyĩ gʼomo muliro, nʼebyosĩ ebyabyamo! ebĩtsĩpa bisa nʼesyamagetsi, nʼebindu byʼemiringa nʼebyʼebyuma, mobahĩrabyo omo kigona kyʼenyũmba yʼOmwami Mukulu.

²⁵Nĩkwa Yosũa mwabalya Rahabũ Omũmalaya, nʼekĩtũnga kyʼĩse, nʼebyosĩ abya awite; naye mwĩkala omo katĩkatĩ ka Ĩsraelĩ erĩhĩka hatya, kusangwa mwabĩsa abakwenda, abo Yosũa atuma eriyalinga eYerĩko.

²⁶Kandi Yosũa mwalahĩrya omwʼĩlahĩrya oko mugulu oyo ati, Omundu oyo atakirawe embere syʼOmwami Mukulu, oyũkahanganaya nʼerĩhĩmba omũyĩ oyũ wʼeYerĩko; asyahĩra ekibanza kyago omwʼĩkwa lyʼakambere kuwe, kandi asyasingika esyongyo syago omwʼĩkwa lyʼakatũngo kuwe.

²⁷Neryo Omwami Mukulu abya haguma na Yosũa; nʼengulu yiwe moyagenderana omo kihugo kyosĩ.