Read nande Yosũa 9 Bible Online

Yosũa 9 - nande bible

Yosũa 9

¹Neryo omugulu abami bosĩ abali eyisirya wʼeYorodanĩ, omo kihugo kyʼebitwa, nʼomwʼĩbanda, nʼoko mũsĩke gosĩ wʼEngetsi Nene embere wʼeLebanonĩ, Omũhĩtĩ, nʼOmũamorĩ, nʼOmukanana, nʼOmũperezĩ, nʼOmũhĩvĩ, nʼOmũyebũsĩ, bowayo;

²mobayĩhĩndanĩa haguma nʼomutima muguma erilwa na Yosũa na Ĩsraelĩ.

³Nĩkwa omugulu esyondũlanĩ syʼeGĩbeonĩ syowa ebyo Yosũa akolera eYerĩko nʼeAĩ,

⁴mobakola nʼamenge, mobagenda nʼeriyihindula mo bakwenda, mobahĩra esyongunza ngulu oko syopunda syabo, nʼebihu byʼebĩnyũ ebikulukulu ebĩtobongokĩre nʼebĩlandĩre.

⁵Nʼesyongendero ngulu-kulu esĩlandĩre oko bisando byabo, ibambite nʼesyongimba esĩkũlĩre; nʼamandu gosĩ wʼendanda yabo abya ũmĩre nʼerĩkwa embuhu.

⁶Mobaya eyiri Yosũa eGĩlgalĩ mobamubwira nʼabandu ba Ĩsraelĩ bati, Tũkalũa omo kihugo kyʼehali; lino uyire endagano netu.

⁷Nʼabandu ba Ĩsraelĩ mobabũga nʼAbahĩvĩ bati, Mbino mwĩkere omo katĩkatĩ ketu; twasyayira endagano nenyũ yo tuti kwehĩ?

⁸Kandi Abahĩvĩ mobabũga na Yosũa bati, Ĩtwe tuli bagombe benyũ. Neryo Yosũa mwabuga nabo ati, Muli bahi kwehĩ? Kandi mũkalũahi?

⁹Nabo mobamubwira bati, Abagombe bawe bakalũa omo kihugo mo hali busana nʼengulu yʼOmwami Mukulu Nyamuhanga wawe; kusangwa twabĩrĩowa erĩkũmayira liwe, nʼebyosĩ akola eMĩsĩrĩ,

¹⁰nʼebyosĩ akolera abami babiri bʼAbaamorĩ, ababya eyisirya wʼeYorodanĩ, Sĩhonĩ omwami wʼeHesĩbonĩ, na Ogĩ omwami wʼeBasanĩ, oyo wabya eAstarotĩ.

¹¹Nʼabakulu betu nʼesyondũlanĩ syosĩ syʼekihugo kyetu mobatubwira bati, Muheke endanda omo byala byenyũ busana nʼolugendo, mũyahĩndane nabo, mubabwire muti, Tuli bagombe benyũ; na lino muyire endagano netu.

¹²Aya wa mandu wetu twalũsaya omo manyũmba wetu ĩnĩanahũhĩre busana nʼendanda yetu ekiro twahongoka eriasa ũkwʼĩnywe; nĩkwa lino, lebaya, ũmĩre, abĩrĩkwa embuhu.

¹³Nʼebihu ebĩ byʼebĩnyũ, twasa ibine bihya-bihya; neryo lebaya, byabirisatangika; nʼesyongimba syetu esĩ nʼesyongendero syetu syabirikula busana nʼolugendo luli.

¹⁴Nʼabandu mobĩmya oko ndanda yabo, mobatabũlya erihana oko Mwami Mukulu.

¹⁵Na Yosũa mwalagana nabo nʼobuholo, mwayira endagano nabo, alekebo babyeho. Nʼabasondolĩ bʼendeko mobalahĩrĩrya kubo.

¹⁶Neryo ebiro bisatu byabere byabikya ibamabikola endagano haguma nabo, mobowa ko bahererenĩe nabo, ĩbĩkere omo katĩkatĩ kabo.

¹⁷Kandi abana ba Ĩsraelĩ mobahongoka mobahĩka oko mĩyĩ yabo oko kiro kyʼebisatu. Neryo emĩyĩ yabo yabya Gĩbeonĩ, na Kefĩra, na Berotĩ, na Kĩrĩatĩ-yearĩmũ.

¹⁸Nʼabana ba Ĩsraelĩ mobatĩtabo, kusangwa abakama bʼendeko ĩbabĩrĩlahĩrĩryabo oko Mwami Mukulu Nyamuhanga wa Ĩsraelĩ. Nʼendeko yosĩ moyayitonga oko bakama.

¹⁹Nĩkwa abakama bosĩ mobabũga nʼendeko bati, Twabĩrĩlahĩrĩryabo omo Mwami Mukulu Nyamuhanga wa Ĩsraelĩ; lino Sitwangatoka erĩtũla kubo.

²⁰Ekyo tukandikolerabo lye nʼerirekabo ĩtũtĩtabo; erihitana likasyabya ũkwʼĩtwe, busana nʼerĩlahĩrya twalahĩrĩrayabo.

²¹Kandi abakama mobabwirabo bati, Mulekebo babyeho. Neryo mobabya basenyĩ bʼesyongwĩ nʼabayĩ bʼoko lũsĩ busana nʼendeko yosĩ, ngoko abakama babwirabo.

²²Neryo Yosũa mwabirikirabo, mwabũga nabo ati, Busana nakĩ mwatuteba muti, Tuli ba hali kwĩnywe kwehĩ? Ĩmwĩkere omo katĩkatĩ ketu.

²³Lino muli batakirwa, sihendisyabula ũkwʼĩnywe oyukabya mukobe, abasenyĩ bʼesyongwĩ nʼabayĩ bʼoko lũsĩ busana nʼenyũmba ya Nyamuhanga wage.

²⁴Nabo mobasũbĩrya Yosũa bati, Kusangwa abagombe bawe babwirawa ndeke, ngoko Mwami Mukulu Nyamuhanga wawe ahana Musa omugombe wuwe eribaha ekihugo kyosĩ, nʼerĩherya esyondũlanĩ syosĩ syʼekihugo embere syenyũ; kyaleka itubaha kutsibu busana nʼesyongebe syetu busana nenyũ, neryo motwayira tutya.

²⁵Na lino, lebaya, tuli omo byala byawe; utukole ekyo ũkasĩma eribya kibuya nʼekitunganene eritukola.

²⁶Neryo mwakolabo atya, mwalamyabo omo byala byʼabana ba Ĩsraelĩ, ati sĩbĩtebo.

²⁷Kandi Yosũa mwayirabo mo basenyĩ bʼesyongwĩ nʼabayĩ bʼoko lũsĩ busana nʼendeko, na busana nʼekiherero kyʼOmwami Mukulu erĩhĩka mũnabwĩre, aho asyayisoga.