Read nande 2 Abanya Tesalonĩka 2 Bible Online

2 Abanya Tesalonĩka 2 - nande bible

2 Abanya Tesalonĩka 2

¹Neryo balĩkyetu, omo mwatsi wʼerĩhĩka lyʼomukama wetu Yesu Kristo, nʼerĩhĩndana lyetu haguma naye, tukabalemba-lemba tuti,

²Sĩmũsũkasũkanĩbawe omo malengekanĩa wenyũ, kutse simuleke omutima wenyũ akalũa omo nda, busana nʼekĩrĩmũ, kutse busana nʼeriambuka ambu nĩ kĩnywa kyetu, kutse ebarua yetu biti, Ekiro kyʼomukama kyabĩrĩhĩka.

³Simuleke mundu akabatebya omo mwatsi nʼomuguma. Kusangwa Ekiro ekyo sikyendisyasa eripona nʼerisuba enyũma bite byahĩka, nʼomubi Oyo ate abutuka, oyo wasyaherĩbwa.

⁴Iye akalwa nʼesyosĩ esyo abandu bakahula mo nyamuhanga, nʼebyosĩ abandu bakaramaya. Asyayĩhamya endata oko syosĩ, nʼeriya omo Hekalũ ya Nyamuhanga, nʼerĩĩkala oko kĩtũmbĩ omo Hekalũ, nʼeriyahula mo Nyamuhanga.

⁵Simulyibuka ngoko nababwira emyatsi eyĩ omugulu nabya nyikine nenyũ kwehĩ?

⁶Kandi mũnasĩ ekĩkamũkakĩraya lino, erĩhĩka oko mugulu Omundu Mubi oyo asyabĩsũlwa.

⁷Nĩkwa Obubi obũbĩsĩre bukakola na lino, nĩkwa oyũkakakĩrĩrayabo asyakakĩrya erĩhĩka oko mugulu asyalũsĩbwaho.

⁸Neryo Omundu Mubi oyo asyabĩsũlwa, nʼOmukama Yesu asyamwĩta omo muka wʼobuno buwe, nʼerĩmũtogotya omo lukengerwa lwʼerihuluka liwe.

⁹Neryo Omundu Mubi oyo asyasa omo bũtokĩ bwʼeSatanĩ nʼerikola ebitiko-tiko byʼemĩsĩndo yosĩ nʼebĩmĩnyĩsyo byʼamabehĩ, nʼebyʼeriswekera.

¹⁰Kandi asyakola omo mĩsĩndo yosĩ yʼeriteba nabi busana nʼabakandisyahera. Nabo basyahera kusangwa mobatangirira kutse erianza ekwenene, eyangaleka ĩbalamĩbwa.

¹¹Busana nʼomwatsi oyũ, Nyamuhanga akatumirabo eriteba erĩkalĩre, erikaleka ĩbĩkĩrĩrya ebyʼamabehĩ.

¹²Neryo kyasyaleka abosĩ abatĩkĩrĩrye oko mwatsi wʼekwenene, nĩkwa bakatsemera ebibi, ĩbasĩngwa.

¹³Nĩkwa litutolere eriha Nyamuhanga yʼewasĩngya emigulu yosĩ, busana nʼĩnywe balĩkyetu, ĩnywe banze bʼOmukama. Kusangwa Nyamuhanga ayisoga nywe erĩmbere eribana erilama busana nʼOmũlĩmũ oyukabahigula, kandi kusangwa mwabĩrĩkĩrĩrya omwatsi wʼekwenene.

¹⁴Nyamuhanga mwababirikira busana nʼekĩ omugulu twabakangĩrĩraya Engulu Yowene, imwatoka eribana olukengerwa lwʼOmukama wetu Yesu Kristo.

¹⁵Neryo balĩkyetu, muhangane ĩmũnasĩkĩre, kandi muhambe ndeke emyatsi yʼekwenene eyo twabakangĩrĩraya, omo bĩnywa byetu nʼomo barua yetu.

¹⁶Neryo Omukama wetu ye Yesu Kristo, na Nyamuhanga Tata wetu, oyo watwanza, nʼerituha busana nʼolukogo luwe erĩsĩbĩkya lyʼerikota nʼamaha mabuya,

¹⁷asĩbĩkaye emitima yenyũ, nʼerĩbasĩkya omo buli mwatsi mubuya mukakola kutse mũkabũga.