Read nande 1 Tĩmoteo 1 Bible Online

1 Tĩmoteo 1 - nande bible

1 Tĩmoteo 1

¹Ĩngye Paũlo, omukwenda wa Kristo Yesu busana nʼerihana lya Nyamuhanga Omũlamya wetu, nʼerya Kristo Yesu, oyuli maha wetu.

²Ngakusakira uwe Tĩmoteo, omugala wage kwenene omwʼĩkĩrĩrya lyʼEngulu Yowene. Olukogo, nʼeriganyira, nʼobuholo, bibye ukʼuwe, bĩkalũa uku Nyamuhanga Tata, na Kristo Omukama wetu.

³Nyanzĩre iwabya eEfeso, ngoko nanakuhatikana omugulu nabya ngaya eMakedonia. Iwatoka eritegeka abandu balebe baleke erĩkangĩrĩrya eyindi myatsi eyʼamabehĩ.

⁴Ubwirebo uti, baleke eriahula emitsye ya kera nʼamena wʼaboso-kulu, ebikaleta obuhaka. Ebĩ sĩbyewatĩkaya omũbĩrĩ wa Nyamuhanga, owakahangana omwʼĩkĩrĩrya.

⁵Nĩkwa enzumwa yʼerihana lyetu ni lwanzo olũkalũa omo mutima owerĩre, nʼobunya-mutima bubuya, nʼerĩkĩrĩrya lyʼekwenene.

⁶Abandi bandu babĩrĩsĩga emyatsi eyĩ, babirikitira ehandi nʼerikwama omũkanĩa mutya-mutya.

⁷Aba bakasonda eribya bakangĩrĩrya bʼEmigambo ya Nyamuhanga, nĩkwa sibeminya ebyo bakabũga, kutse emyatsi eyo bakahula, nʼerihatikanayo.

⁸Nĩkwa ĩtwe tũnasĩ Emigambo ko yowene, omundu amakwamayo ngoko litolere.

⁹Kusangwa tũnasĩ Emigambo moyĩtahĩrwa busana nʼomundu utunganene, nĩkwa busana nʼabakagana erihanwa, nʼabakapona, kandi busana nʼabatekenga Nyamuhanga, nʼabakola-nabi, kandi busana nʼabatesoma, nʼabakaseka ekisomo; kandi busana nʼabakĩta tata wabo kutse koyo wabo; kandi abĩtĩ bʼabandu,

¹⁰kandi busana nʼabasĩngĩrĩ, kutse busana nʼabalume abakatetana, kutse abĩbĩ bʼabandu, nʼababehĩ, nʼabandu abakalega bandi, nʼeyindi myatsi yosĩ eyikagana erĩkangĩrĩrya lyʼekwenene.

¹¹Erĩkangĩrĩrya erĩ likabanika omo Ngulu Yowene eyo Nyamuhanga amba erĩtũlayo, kandi ĩkalũa uku Nyamuhanga wʼolukengerwa nʼowʼomũyĩsa.

¹²Ngaha Kristo Yesu Omukama wetu yʼewasĩngya, oyo wabirinyiha amaka busana nʼomũbĩrĩ wage. Kusangwa mwanyiganza ngʼoyuteregula, nʼerĩnyĩhĩra oko mũbĩrĩ wuwe.

¹³Kera nabya nga mũtsũmĩ, nʼoyũkamwendereraya, nʼerimuletera omwaga. Nĩkwa Nyamuhanga mwanyiganyira kusangwa nakola omo butaminya, ĩsĩndĩnĩkĩrĩrya.

¹⁴Neryo Omukama mwanyĩkangya olukogo lunene kutsibu, kandi mwamba erĩkĩrĩrya, nʼolwanzo, ebikabanĩka ukwʼabo bakamatikana na Kristo Yesu.

¹⁵Ekĩ nĩ kĩnywa kyʼekwenene ekitolere erĩrĩgwa kiti, Kristo Yesu mwasa omo kihugo busana nʼerĩlamya abakola-nabi. Nage indi mukola-nabi kwilaba bosĩ.

¹⁶Nĩkwa busana nʼomwatsi oyũ Nyamuhanga mwanyiganyira, neryo Yesu Kristo atoke erĩkangya eriyibombeka liwe busana nage, ĩngye mukola-nabi kwilaba abosĩ. Nyibye ekĩmĩnyĩsyo busana nʼabosĩ abasyĩkĩrĩrya Kristo nʼeribana engebe yʼerikota.

¹⁷Neryo erĩsĩkya nʼolukengerwa bya kera na kera bibye oko Mwami Wʼerikota, oyutehola, kandi oyutelolawako, ye Nyamuhanga ĩyowene-wene. Amina.

¹⁸Uwe Tĩmoteo, mwana wage, ngakũhĩrako erihana erĩ. Nalyo likakwama ebĩnywa byʼobũmĩnyererĩ ebyo byakwahula erĩmbere. Ebyo byasyaleka iwalwa amalwa owene.

¹⁹Ũtegaye erĩkĩrĩrya lyawe nʼobunya-mutima bubuya. Kusangwa abandi babirigana erihulikirira Obunya-mutima bwabo, neryo babĩrĩtsandya erĩkĩrĩrya lyabo.

²⁰Hĩmeneo na Alesandũro bali batya, neryo nage nabirihabo uku Satanĩ, ibatoka erĩkangĩrĩrĩbwa nʼerireka eritsuma emyatsi ya Nyamuhanga.