Read nande 1 Tĩmoteo 3 Bible Online

1 Tĩmoteo 3 - nande bible

1 Tĩmoteo 3

¹Ekĩnywa ekĩ ni kyʼekwenene, kiti, Omundu amanza eribya oko mũbĩrĩ wʼobukulu bwʼekanĩsa, ĩnĩakayĩtsũtsa omũbĩrĩ mubuya.

²Neryo omukulu, atolere iniabya butsira kahinira, atolere iniabya nʼomũkalĩ muguma musa, kandi sĩakũnde, ayĩtegaye, ayitondeke, abye oyũkakokaya abagenĩ, kandi atoke erĩkangĩrĩrya.

³Kandi siabye mũtamĩrĩ, kutse owʼomururu, nĩkwa abye mugenge, abye mundu wʼobuholo, siabye oyo wanzĩre ebindu.

⁴Abye mundu oyukategeka ndeke abʼomuwe, nʼabana buwe ibakayolobeka nʼerimukenga.

⁵Kusangwa omundu amataluka eritegeka abʼomuwe bo ndeke, angateya ekanĩsa ya Nyamuhanga ati kwehĩ?

⁶Kandi syabye Mukristo muhya-muhya, akasyayiheka nʼeritoga, nʼerĩsĩngwa ngʼeSatanĩ ko yasĩngawa.

⁷Kandi abye mundu Oyũkasĩmawa nʼabandu abate omo kanĩsa, akasyahulwa mo mundu mubi, nʼeritogera omo kitego kyʼeSatanĩ.

⁸Abawatĩkya bʼomo kanĩsa batolere babye abasĩkĩbwe, abate bʼotulimi tubiri, kutse Sibabye abakakũnda, kutse abʼomururu.

⁹Nĩkwa babye bʼobunya-mutima bowene, abandu abakakwama ekyʼekwenene ekyʼerĩkĩrĩrya, ekyabĩrĩbĩsũlwa.

¹⁰Kandi batsũke erirengwa, neryo bamatendibanika oko mwatsi, bakole omũbĩrĩ wʼomũwatĩkya.

¹¹Abakalĩ nabo bangabya abasĩkĩbwe, Sibabye abakatonga abandi, nĩkwa babye abatekũnda, abateregula omo myatsi yosĩ.

¹²Abawatĩkya bʼomo kanĩsa babye abandu bʼomũkalĩ muguma musa, kandi abakategeka ndeke abana babo, nʼabali omo manyũmba wabo.

¹³Neryo abawatĩkya bʼomo kanĩsa abakakola ndeke bakabana erĩsĩkĩbwa ndeke, kandi bakatoka eritondeka embere syʼabandu bosĩ omwatsi wʼerĩkĩrĩrya eryo tuwite busana nʼerimatikana na Kristo Yesu.

¹⁴Ngakusakira emyatsi eyĩ, inyine nʼamaha wʼeriyakulolako lũba.

¹⁵Nĩkwa namamala ndambĩ, ngakusakira iwatoka eriminya ngoko abandu bangayĩtondekanĩa omo kĩtũnga kya Nyamuhanga, ekiri ekanĩsa ya Nyamuhanga oyuliho. Ekanĩsa eyo nĩ ndũyĩ nʼeyĩkasĩkaya omwatsi wʼekwenene.

¹⁶Sihali oyo wangagana obukulu bwʼerĩkũmbo lyʼekisomo kyetu tuti, Mwabutuka omo mubiri wʼabandu, Mwasĩngana ngʼomutunganene omo Mũlĩmũ, Kandi mwalolwako nʼabamalaĩka, Mwatũlaganĩbwa omo katĩkatĩ kʼebihanda, Mwĩkĩrĩrĩbwa omo kihugo, Mwatwalwa omo lukengerwa lwʼelubula.