Read nande 1 Tĩmoteo 4 Bible Online

1 Tĩmoteo 4 - nande bible

1 Tĩmoteo 4

¹Nĩkwa Omũlĩmũ akabũga ndeke ati, Oko migulu yʼenyũma-nyũma abandi basyatswa okwʼĩkĩrĩrya lyabo, ibakakwama ebĩrĩmũ byʼerĩtebya nʼerĩkangĩrĩrya lyʼesyombĩnga.

²Amatebo aya ni wʼabandu abakatũla amabehĩ. Obunya-mutima bwabo bwabĩrĩhĩsĩbwa nʼekyuma kĩhũhĩre kutsibu.

³Abandu aba bakaganaya erĩhĩkanĩa, kandi bakaganaya erirya ebindi byalya, ebyo Nyamuhanga ahangika busana nʼeriribwa nʼewasĩngya busana nʼabandu ababĩrĩkĩrĩrya nʼeriminya omwatsi wa kwenene.

⁴Kusangwa ebyosĩ ebyo Nyamuhanga ahangika byowene, sibyangaganwa. Nĩkwa byangangirirwa nʼewasĩngya.

⁵Kusangwa bikahigulawa omo kĩnywa kya Nyamuhanga, nʼerisaba lyʼewasĩngya.

⁶Wamahana abalĩkyetu emyatsi eyĩ, wasyabya mugombe mubuya wa Yesu Kristo, mũnasĩkĩre ndeke omo bĩnywa byʼomwatsi wʼerĩkĩrĩrya nʼerĩkangĩrĩrya lyʼekwenene ebyo Wamakwama.

⁷Nĩkwa Usage ebihaniriro bitya-bitya ebyʼekihugo ebitawite mugaso. Nĩkwa ũyĩkalakalaye busana nʼerikenga Nyamuhanga.

⁸Erĩyĩkala-kalya lyʼomubiri liwite omugaso muke, nĩkwa erĩyĩkala-kalya lyʼomutima omwʼikenga lya Nyamuhanga, liwite omugaso busana nʼemyatsi yosĩ, kusangwa likalaga engebe busana na lino, kandi busana nʼengebe eyikandisyasa.

⁹Erĩbũga erĩ ni ryʼekwenene, kandi ryangalĩgwa ndeke.

¹⁰Ekyo kikaleka itwakola kutsibu nʼerinuba, kusangwa twabĩrĩhĩra amaha wetu uku Nyamuhanga oyuliho, kandi oyuli Mũlamya wʼabandu bosĩ, nĩkwa nĩ Mũlamya kutsibu ukwʼaho busana nʼabĩkĩrĩrye.

¹¹Uhane nʼerĩkangĩrĩrya emyatsi eyĩ.

¹²Suleke mundu akakupona busana nʼobũlwana bwawe, nĩkwa ũyĩkangaye embere syʼabĩkĩrĩrye ngʼolulengo lubuya lwʼebĩnywa, nʼemikolere, nʼomo lwanzo, nʼomwʼĩkĩrĩrya, nʼomo mutima ate kwʼebibi.

¹³Neryo erĩhĩka aho nasyasira, Uyihe oko mũbĩrĩ wʼerisomera abandu ekitabu kya Nyamuhanga, kandi Uyihe Okwʼihana, nʼerĩkangĩrĩrya.

¹⁴Subye ukapona olũsũnzo lwʼOmũlĩmũ, oluli omo mutima wawe. Wahabawa olũsũnzo olo omwʼĩbũga lyʼabamĩnyererĩ, omugulu abakulu bakũhĩra kwʼebyala.

¹⁵Ukole emyatsi eyĩ, ukwamirireyo, erĩlolya embere ryawe liminyikale oko bosĩ.

¹⁶Ũyĩtegaye, kandi ũtegaye erĩkangĩrĩrya lyawe. Kandi uyitsinge omo myatsi eyĩ, kusangwa Wamakola utya wasyayĩlamya haguma nʼabakakuhulikirira.