Read nande 2 Tĩmoteo 2 Bible Online

2 Tĩmoteo 2 - nande bible

2 Tĩmoteo 2

¹Neryo nawe mwana wage, ukale omo lukogo oluli busana netu erimatikana na Kristo Yesu.

²Wĩmaye ebĩnywa ebyo wowa ngabũga embere syʼabalangĩrĩ banene, ũkangĩrĩrayebyo oko bandi bandu abateregula, abakatoka erĩkangĩrĩrya abandi bandu.

³Usangire nage omo malĩge, ngʼomũsĩrĩkanĩ mubuya wa Kristo Yesu.

⁴Omũsĩrĩkanĩ oyukakola omũbĩrĩ, anzĩre erĩtsemesya omukulu wuwe, neryo sĩalĩyĩgobaya omo myatsi yʼabandi bandu.

⁵Oyukatsanga omo matangwa sĩalĩsĩnga atekwama ebihano byʼamatangwa.

⁶Omũlĩmĩ Oyukalima kutsibu atolere erĩtsũka erirya oko bikera.

⁷Ũganĩraye ebyo ngabũga, kusangwa Omukama asyakuha eriminya emyatsi yosĩ.

⁸Wibuke Yesu Kristo, oyo walũbũkĩbawa oko baholĩ, kandi ogʼomo kĩtũnga kya Dawĩdĩ, ngʼEngulu Yowene eyo ngatũla ĩkabũga.

⁹Neryo ngagalawa kusangwa ngatũla Engulu Yowene, kandi ngabohawa omo mahulula ngʼomundu mubi. Nĩkwa ekĩnywa kya Nyamuhanga Sĩkĩbohĩre.

¹⁰Kandi busana nʼomwatsi oyũ, ngayĩyĩnaya omo byosĩ busana nʼabandu abayisogawa na Nyamuhanga, nabo batoke eribana erilama lya Kristo Yesu, haguma nʼolukengerwa lwʼerikota.

¹¹Ebĩnywa ebĩ ni byʼekwenene, biti, Twamabya twabirihola haguma naye, Twasyabyaho haguma naye nibya;

¹²Twamayĩyĩnĩa, twasyatabala nibya haguma naye; Twamamugana, naye asyatugana;

¹³Twamalegula, iye akabya butsira eriregula, Kusangwa sialitoka eriyigana.

¹⁴Kandi wĩbũkaye abandu bawe emyatsi eyĩ, kandi uhanebo kutsibu embere sya Nyamuhanga, sibanegene busana nʼebĩnywa. Erilwa eryo siririkola ndeke, nĩkwa lĩkatsandaya abandu abakahulikirira.

¹⁵Uyire omũhwa erĩsĩmwa embere sya Nyamuhanga ngʼomũkolĩ wʼomũbĩrĩ oyutehemuka busana nʼomũbĩrĩ wuwe. Kandi oyũkakangĩrĩraya ndeke-ndeke omwatsi wʼekwenene wa Nyamuhanga.

¹⁶Usage ebĩnywa bitya-bitya ebitekenga Nyamuhanga, kusangwa bikatwala abandu eritendiswakenga Nyamuhanga.

¹⁷Kusangwa erĩkanĩa lyabo likandisyatanda ngʼekironda kibi. Ababiri oko bakangĩrĩrya aba nĩ Hĩmeneo na Fĩleto.

¹⁸Ababiri aba babiritala oko mwatsi wʼekwenene, ĩbakabũga bati erĩlũbũka lyabirilaba, ĩbabĩrĩtsandya erĩkĩrĩrya lyʼabandi bandu.

¹⁹Nĩkwa ekibanza ekyo Nyamuhanga ahĩmba kĩsĩkĩre ndeke, kandi kĩsakĩreko ebĩnywa ebĩ biti, Omukama anasĩ abandu buwe nga ni bahi. Kandi, Obuli mundu oyũkabũga ati ni wʼOmukama aleke ebibi.

²⁰Omo nyũmba nene muli ebibindi nʼebĩbo byʼemihanda yosĩ. Ebindi nĩ byʼekĩtsĩpa nʼebyʼesyamagetsi, kandi ebindi ni byʼomuti kutse eribumba. Ebindi ni byʼomũbĩrĩ owene, nʼebindi ni byʼomũbĩrĩ mutya-mutya.

²¹Omundu amera oko myatsi mibi eyĩ, asyabya ngʼekibindi kyʼemĩbĩrĩ yowene, iniabirihigulwa erigasira Omukama wuwe, neryo abĩrĩsĩka busana nʼobuli mũbĩrĩ owene.

²²Usage esyongumbu syʼobũlwana, ukwamirire ekitunganene, erĩkĩrĩrya, olwanzo, Obuholo, haguma nʼabandu abakalakira Omukama omo mutima owate mo bibi.

²³Nĩkwa Usage ebĩnywa bĩkĩrũ ebite nʼamenge, ebyʼobuhaka, kusangwa ũnasĩ kwʼebĩnywa ebĩ bikaleta erinegena.

²⁴Kandi omugombe wʼOmukama siatolere erinegena, nĩkwa abye mubuya oko bosĩ, abye oyo wasĩ erĩkangĩrĩrya, iniakayibombeka omugulu akakolawa nabi.

²⁵Kandi ahehere omugulu akakunga abakalwa naye. Mbino Nyamuhanga asyahabo eribindula emitima yabo erireka ebibi, nʼeriminya omwatsi wʼekwenene.

²⁶Neryo basyaswabana obũlengekanĩa bowene nʼeribala ekitego kya Dĩabolo, oyukahambabo busana nʼerikola erisonda lyayo.