Read nande 2 Tĩmoteo 3 Bible Online

2 Tĩmoteo 3 - nande bible

2 Tĩmoteo 3

¹Nĩkwa Uminye ekĩ! Oko biro byʼenyũma-nyũma hasyabya emigulu ĩkalĩre.

²Kusangwa abandu basyabya abakayanza, nʼerianza ebindu, abakayipipa, abakayiheka, abatsũmĩ, abatĩowa ababũtĩ babo, abate nʼewasĩngya, abatesoma.

³Basyabya bʼomutima akalĩre, isibeganyira, abakalega abandi, abʼomwaga, abatsibu, abatanzĩre ekibuya,

⁴basyabya batebya, abatetsomana, abʼomutwe abĩmbĩre, abanzĩre erĩyĩtsemesya, ĩsĩbanzĩre Nyamuhanga;

⁵bakwamĩre omuhanda wʼekisomo, nĩkwa bakagana obũtokĩ bwakyo. Usage abandu ngʼaba.

⁶Kusangwa abandi ba kubo bakingira omo manyũmba nʼeriteba abakalĩ bakĩrũ, abali kwʼebibi binene, abakahekawa nʼesyongumbu mĩsĩndo-mĩsĩndo.

⁷Abakalĩ aba bakiga ebiro byosĩ, nĩkwa sibalitoka erĩhĩka okwʼiminya omwatsi wʼekwenene.

⁸Neryo ngoko Yane na Yambũre balwa na Musa, litya abandu aba bakalwa nʼomwatsi wʼekwenene. Abandu aba sĩbeganĩraya, kandi babiritsanda omo myatsi yʼekisomo.

⁹Nĩkwa sĩbendĩsyahĩka hali, kusangwa obũkĩrũ bwabo bwasyaminyikala oko bandu bosĩ, ngoko bwahĩka uku Yane na Yambũre.

¹⁰Nĩkwa uwe wabirikwama ndeke erĩkangĩrĩrya lyage, nʼemikolere yage, nʼerĩyĩsũnza lyage; kandi wabirikwama erĩkĩrĩrya lyage, nʼeriyibombeka lyage, nʼolwanzo lwage, nʼerĩyĩyĩnĩa lyage.

¹¹Ũnasĩ erĩendererĩbwa lyage nʼamalĩge wage. Kandi ũnasĩ emyatsi yosĩ eyanyĩhĩkako eAntĩokĩa, nʼeĨkonĩo, nʼeLĩstra, nʼerĩendererya lĩnene eryo nagalawamo! Nĩkwa Omukama mwanyĩlamya omo byosĩ.

¹²Kandi abosĩ abanzĩre erikwama engebe yʼerikenga Nyamuhanga nʼerimatikana na Kristo Yesu, basyendererĩbwa.

¹³Nĩkwa bandu babi, nʼabatebya, basyakanyirira eribya babi, ibakateba abandi nʼerĩtebĩbwa ĩbobene.

¹⁴Nĩkwa uwe ukwamirire omo myatsi eyo wakangĩrĩrĩbawa, nʼeyo Wĩkĩrĩrye ndeke. Kusangwa ũnasĩ abakangĩrĩrya bawe nga babya bahi.

¹⁵Kandi ũnasĩ erĩtsũka omo bwana bwawe wabiriminya Amasako Abũyĩrĩre, awakatoka erikuha amenge wʼerikutwala okwʼilamĩbwa busana nʼerĩkĩrĩrya Kristo Yesu.

¹⁶Kusangwa Amasako gosĩ Nyamuhanga yo wategekanayago. Kandi ali nʼendũndĩ busana nʼerĩkangĩrĩrya omwatsi wʼekwenene, kandi busana nʼerikunga erihaba, kandi busana nʼerihabula, nʼerĩkangĩrĩrya abandu erikwama ekitunganene.

¹⁷Neryo omundu wa Nyamuhanga ahĩkane, nʼerĩtokesĩbwa erikola obuli mũbĩrĩ owene.