Read nande Tĩto 1 Bible Online

Tĩto 1 - nande bible

Tĩto 1

¹Ĩngye Paũlo, omugombe wa Nyamuhanga, nʼomukwenda wa Yesu Kristo, Ĩngye nayisogawa, kandi natumawa erĩwatĩkya erĩkĩrĩrya lyʼabandu Nyamuhanga ayisoga. Kandi erĩwatĩkyabo eriminya ekyʼekwenene omo kisomo kyetu kyʼerikenga Nyamuhanga.

²Kihangane omo maha wʼengebe yʼerikota eyo Nyamuhanga oyutebiha atulaga oko migulu ya kera-kera.

³Nĩkwa oko mugulu atolere mwakũmbũla engebe eyĩ omo kĩnywa kiwe. Kandi mwamba ekĩnywa ekyo, nage ngabũgakyo ngoko Nyamuhanga Omũlamya wetu abirinyihana.

⁴Ĩngye ngakusakira uwe Tĩto, omugala wage kũndũ omwʼĩkĩrĩrya lyetu; Nyamuhanga Tata, na Kristo Yesu Omũlamya wetu, bakuhe olukogo nʼobuholo.

⁵Monakũsĩga eKrete busana nʼerĩtegekanĩa emyatsi eyasĩgalira, kandi busana nʼerĩhĩra abakulu bʼekanisa omo buli mũyĩ, ngoko nakuhana.

⁶Omukulu atolere iniabya butsira kahinira, abye na mũkalĩ muguma musa, nʼabana buwe babye ababĩrĩkĩrĩrya Omukama, Sibabye bʼomwaga kutse abatekenga.

⁷Kusangwa omukulu Oyukasondola omũbĩrĩ wa Nyamuhanga, litolere iniabya butsira kahinira. Siabye oyukayiheka, kutse oyukahitana lũba, kutse eribya mũkũndĩrya, kutse wʼomwaga, kutse oyuli nʼomwĩso.

⁸Nĩkwa abye oyũkakokaya abagenĩ, ĩnĩanzĩre ekibuya. Atolere iniabya oyukayihana, oyutunganene, oyũbũyĩrĩre, oyũkayĩtegaya.

⁹Kandi abye Oyukahamba ndeke ekĩnywa kyʼekwenene, kyʼerĩkangĩrĩrya lyetu. Neryo atoke erihana abandi omwʼikangĩrĩrya litunganene, kandi iniatoka erĩsĩnga abali nʼobuhaka.

¹⁰Kusangwa hali bangi abakapona nʼeriteba abandi omo bĩnywa bitya-bitya, nʼabandi ba kubo bakalũa oko Bayũda abakabana.

¹¹Litolere erĩhũneryabo, kusangwa bakatsandaya amalengekanĩa wʼabandu abʼawandi manyũmba, ĩbakakangĩrĩrayabo ebitatolere, busana nʼeribana endũndĩ yabo nyibi.

¹²Omukrete muguma, omũmĩnyererĩ wabo, mwabũga ati, Abanya Krete nĩ babehĩ ebiro byosĩ, bali nga nyama nyibi syʼomolĩ, ni bʼomururu, nʼabagata.

¹³Nĩkwa mwahulabo kwenene. Busana nʼomwatsi oyũ, ukungebo kutsibu, ibatoka erĩsĩka omwʼĩkĩrĩrya litunganene.

¹⁴Kandi Sibakwame ebihaniriro byʼAbayũda, kutse ebihano byʼabandu ababĩrĩsĩganĩa omwatsi wʼe kwenene.

¹⁵Oko babuya, ebyosĩ ni bibuya. Nĩkwa oko batsandĩre nʼabatĩkĩrĩrye, sihali kindu kibuya, kusangwa obũlengekania bwabo nʼobunya-mutima bwabo byabiritsanda.

¹⁶Bakabũga bati banasĩ Nyamuhanga, nĩkwa emĩbĩrĩ yabo ikamugana. Ibo ni nye, sibekenga, kandi sibatolere nʼahake busana nʼobuli mũbĩrĩ owene.