Read nande Tĩto 3 Bible Online

Tĩto 3 - nande bible

Tĩto 3

¹Wĩbũkaye abandu bawe, bayolobeke oko batabalĩ, nʼabʼehamũlĩ, nʼerikengabo, kandi babye ĩbasĩkĩre erikola obuli mũbĩrĩ owene.

²Kandi sibatsume mundu, sibalwe, bakangaye obwĩra, nʼerĩkanganĩa omutima molo oko bandu bosĩ.

³Kusangwa netu twabya bakĩrũ erĩmbere, isitulikenga, ĩtũkatebĩbawa. Twabya bakobe bʼesyongumbu nʼebyʼerĩyĩtsemesya, ebyʼemĩsĩndo yosĩ, itukasiba omo myatsi mibi, nʼeritsura, ĩtũkakwa abandi bʼekĩnĩga, nʼerikwama obusu.

⁴Nĩkwa omugulu Obugenge bwa Nyamuhanga Omũlamya wetu, nʼolwanzo luwe busana nʼabandu byahuluka,

⁵Nyamuhanga mwatũlamya. Si busana nʼemĩbĩrĩ itunganene twakola, nĩkwa busana nʼeriganyira liwe, Omũlĩmũ Abũyĩrĩre ĩnĩakatweraya, kandi akatubuta bubya-buhya, nʼerituha engebe nyihyanyihya.

⁶Nyamuhanga mwatũtũlĩrako ndeke-ndeke Omũlĩmũ Abũyĩrĩre, busana na Yesu Kristo Omũlamya wetu,

⁷itwatoka eriyirwa mo batunganene busana nʼolukogo luwe, nʼeribana engebe yʼerikota, eyo tũkahĩra kwʼamaha.

⁸Ekĩ nĩ kĩnywa kyʼekwenene. Kandi nyanzĩre ĩwabũga emyatsi eyĩ ndeke-ndeke, neryo ababĩrĩkĩrĩrya Nyamuhanga babye nʼomũhwa wʼerisiba bakakola emĩbĩrĩ yowene. Emĩbĩrĩ eyĩ ni mibuya kandi ikaleta omugaso oko bandu.

⁹Nĩkwa Usage emyatsi mĩkĩrũ yʼobuhaka, nʼeriahula amena wʼaboso-kulu, nʼerinegena, nʼerilwa busana nʼEmigambo. Emyatsi eyĩ ni ya busa, siyiwite ndũndĩ.

¹⁰Omundu oyukaleta obuhaka busana nʼerĩkangĩrĩrya lyawe, umukunge esyongendo ĩbĩrĩ, neryo iwamugana.

¹¹Kusangwa ũnasĩ kʼomundu ngʼoyũ atsandĩre, kandi ebibi biwe bĩkamũsĩnga.

¹²Ekiro nasyakutumira Artema kutse Tĩkĩko, ulenge kutsibu erĩnyĩhĩkako eNĩkopolĩ, kusangwa nabirisoha erisibayo oko mugulu wʼeritsuku.

¹³Ulenge kutsibu eritsindika embũyĩ ye Zenasĩ na Apolo omo nzira yabo. Ũlebaye sibabule kindu.

¹⁴Kandi abandu betu bige erisiba erikola emĩbĩrĩ yowene, nʼerĩwatĩkya ahali obwaga, ibabya bandu bʼendũndĩ.

¹⁵Abandu bosĩ abali haguma nage bakakũkeraya. Ũkeraye abatwanzĩre omwʼĩkĩrĩrya Engulu Yowene. Olukogo lwa Nyamuhanga lubye nenyũ, ĩnywe bosĩ.