Read nande Abaebrania 9 Bible Online

Abaebrania 9 - nande bible

Abaebrania 9

¹Endagane yʼerĩmbere yabya nʼekihano busana nʼerĩramya nʼahabũyĩrĩre ha muna-kihugo.

²Kusangwa mobahanganĩa eHema yʼeyĩhya eyirimo omutagala owakahamba esyotala, nʼemesa, nʼamandu abũyĩrĩre; hano ho hahulawa mo Habũyĩrĩre.

³Neryo enyũma wʼekĩsũkũlĩryo kyʼakabiri, mohabya eHema eyikahulawa mo Ahabũyĩrĩre Kutsibu.

⁴Kandi ho habya ekiherero kyʼesyamagetsi ekyʼerĩhĩsya kwʼobukwa, kandi erĩsandũko eryʼendagano eryabiribambwako ehosĩ esyamagetsi. Kandi omo rĩsandũko eryo mwabya akalega kʼesyamagetsi akali mwʼamana, kandi omũtso wa Harũnĩ owalasaya amasasa, nʼehisayi hibiri hyʼamabwe ehyasakawako esyondagane.

⁵Nʼendata oko lĩsandũko habya amakerũbĩ wʼolukengerwa, awakasũkũlĩraya Aheriganyira. Nĩkwa hano sitwangahula lino ebyosĩ mo kiguma kiguma.

⁶Neryo emyatsi eyĩ yabere yabĩkokotĩbwa, abahererĩ mobabya bakingira ebiro byosĩ omo hema yʼeyĩhya erikola omũbĩrĩ wabo wʼekisomo.

⁷Nĩkwa Omũhererĩ Mukulu oko bahererĩ bosĩ ĩyowene mwabya akingira omo Hema yʼAhabũyĩrĩre Kutsibu engendo nguma nyisa oko buli mwaka. Abya akaheka omusasi haguma naye, owakaha Nyamuhanga busana naye, nʼakandi busana nʼebibi byʼabandu, ebyo bakola omo butaminya bwabo.

⁸Omũlĩmũ Abũyĩrĩre akakangaya omo myatsi eyĩ ngoko enzira yʼeriya Ahabũyĩrĩre Kutsibu siritalĩbũkala omugulu ehema yʼeyĩhya ikinahangene.

⁹Omwatsi oyũ ali ngʼekĩsosekanĩo kyʼomugulu ono. Akakangaya ngoko olũsũnzo nʼamahere ebyo abandu bakaha Nyamuhanga sibyangatoka erĩerya obunya-mutima bwʼoyukasoma.

¹⁰Kusangwa bikahula ebyalya, nʼerĩpũlya nʼeriyikosa mĩsĩndo-mĩsĩndo. Ebĩ ni bihano byʼerikwama erĩhĩka oko mugulu wʼerĩtũngananĩa emyatsi yosĩ.

¹¹Nĩkwa Kristo abĩrĩhĩka ngʼomũhererĩ Mukulu oko bahererĩ bosĩ wʼemyatsi mibuya eyabĩrĩhĩka. Akakola omo Hema nene kwilaba eyindi, eyĩhĩkene kwilaba. Ni Hema eyitalukawa nʼebyala byʼabandu, kandi si yʼerihangika lyʼekihugo kino.

¹²Yesu mwatingira Ahabũyĩrĩre Kutsibu nʼomusasi wʼesyombene nʼowʼebyana byʼesyonde, nĩkwa mwingira engendo nguma nyisa nʼomusasi wuwe ĩyowene-wene, iniakabana erilama lya kera na kera busana netu.

¹³Kusangwa kumbe omusasi wʼesyombene, nʼesyonume, haguma nʼerĩbũ lyʼenyana bĩkalagalĩrĩbawa oko bandu ababĩrĩhalya, bikahigulabo nʼerĩerya emibiri yabo,

¹⁴kumbe kwilaba aho, omusasi wa Kristo akeraya. Kristo omo Mũlĩmũ Wʼerikota mwayiha uku Nyamuhanga ngʼobuhere obute ko kĩtĩngũ. Omusasi wuwe oyo, akeraya obunyamutima bwetu oko mĩbĩrĩ eyĩkatwĩta, itwatoka erikolera Nyamuhanga oyuliho.

¹⁵Busana nʼomwatsi oyũ, Yesu nĩ mũsanganĩa wʼendagane nyihya-nyihya. Kusangwa oluholo lwʼomundu lwabĩrĩtongolya abandu abahalaya omo ndagane yʼerĩmbere. Neryo lino ababiribirikirwa na Nyamuhanga bakatoka eribana omũyĩsa Wʼerikota ogo Nyamuhanga alaga.

¹⁶Kusangwa ahali endagane yʼebindu, litolere ihabya oluholo lwʼoyo walaga ebindu ebyo.

¹⁷Kusangwa erilaga lyʼomwandu likabererera omo luholo lwʼoyo walaga. Omugulu omundu oyo akineho, erilaga eryo siriri kwʼendũndĩ.

¹⁸Neryo endagane yʼerĩmbere moyahangana busana nʼomusasi

¹⁹Kusangwa Musa, abere abĩkanganĩa oko bandu bosĩ obuli kihano kyʼEmigambo, mwĩmya omusasi wʼesyonyana haguma nʼamagetsi, nʼobweya bwʼesyombũlĩ bwʼengula nʼehĩsopo, neryo mwalagalĩryago oko kitabu kyʼEmigambo nʼoko bandu bosĩ.

²⁰Mwabũga ati, Oyũ ni musasi wʼendagane eyo Nyamuhanga abiribahana.

²¹Kandi mwalagalĩrya omusasi gʼoko Hema nʼebindu byosĩ byʼekisomo.

²²Kandi omo myatsi yʼEmigambo, hakũhĩ nʼebindu byosĩ, bĩkerĩbawa omo musasi, kandi ebibi sibyebuyirawa ahate erĩũtĩka lyʼomusasi.

²³Neryo lyabya litolere ebĩsosekanĩo ebĩ byʼebindu byʼelubula, ĩbyerĩbwa omo nzira eyĩ, nĩkwa ebyʼelubula bitolere amahere awalabĩre aya.

²⁴Kusangwa Yesu mwatingira Ahabũyĩrĩre ahakokotĩbawa nʼebyala byʼabandu, ahabya ekĩsosekanĩo kyʼAhabũyĩrĩre hʼekwenene, nĩkwa mwingira elubula aho akabanika embere sya Nyamuhanga busana netu.

²⁵Nĩkwa Kristo mwatayiha esyongendo nyingi. Ngʼomũhererĩ Mukulu oko bahererĩ bosĩ abya akingira Ahabũyĩrĩre obuli mwaka haguma nʼomusasi owate wuwe.

²⁶Kumbe Kristo ngʼabiriagalwa ngendo nyingi erĩtsũka ekiro ekihugo kyahangikawa nʼerĩhĩka lino. Nĩkwa lino oko ndũlĩ yʼemigulu, abiriminyikala ngendo nguma eriyiha busana nʼerĩlũsya ebibi.

²⁷Kandi kyahĩrawa busana nʼabandu bosĩ bahole ngendo nguma, nʼenyũma wʼaho Nyamuhanga atswerebo.

²⁸Litya Kristo nibya mwahabwa ngendo nguma eriheka ebibi byʼabandu bangi. Kandi asyaminyikala engendo yʼakabiri butsira eriheka ebibi, nĩkwa busana nʼerĩlamya abakamulindirira.