Read nande Yakobo 3 Bible Online

Yakobo 3 - nande bible

Yakobo 3

¹Balĩkyetu, Sihabye abakangĩrĩrya bangi omo katĩkatĩ kenyũ, kusangwa ĩtwe bakangĩrĩrya twasyatswerwa erĩkalĩre kwilaba bandi.

²Kusangwa ĩtwe bosĩ tukatala omo bingi. Omundu oyutetala omo bĩnywa ni mundu ũhĩkene, iniatoka eriyibombeka omo myatsi yosĩ yʼomubiri wuwe gosĩ.

³Nĩkwa tũkahĩra ebyuma omo muno wʼesyosabayĩrĩ isyatoka eritukenga, kandi tukategeka omubiri wasyo gosĩ.

⁴Kandi mũlebaye amato, nomo angabya manene-manene nʼerĩkũnwa nʼerihunga erĩkalĩre, amato ayo akasondolawa nʼengahya nge-nge-nge, neryo akalola eyo mũsondolĩ wago anzĩre.

⁵Ko liri ritya oko lulimi. Nĩ kĩtsũko kyike nĩkwa lukayihalamba omo myatsi minene-minene. Mũlebaye ngoko muliro muke akahĩsaya ekisuki kinene!

⁶Nʼolulimi luli ngʼomuliro, olulimi ni kihugo ekyoswĩre nʼebibi. Olulimi lwĩkere omo katĩkatĩ kʼebĩtsũko byetu, kandi lũkatsandaya omubiri gosĩ. Kandi lũkakaya omuliro omo mitima yetu, omuliro oyo akalũa elĩfero.

⁷Abandu bakabegeraya emihanda yosĩ yʼesyonyama esyʼomolĩ, nʼesyonyonyũ, nʼesyonyama esikakululuka, nʼesyosĩ syʼomo ngetsi, kandi babĩrĩbegerya esyosĩ.

⁸Nĩkwa sihali mundu oyukatoka erĩbegerya olulimi. Kusangwa olulimi ni kibi ekiteluhuka, ĩloswĩre nʼobuti obũkĩta.

⁹Omo lulimi tukapipa Omukama wetu na Tata; kandi mulo tukatakira abandu abahangikawa omo kĩsosekanĩo kya Nyamuhanga!

¹⁰Omo buno buguma mũkalũa eripipa nʼeritakira. Balĩkyetu, emyatsi eyĩ siyangabya itya!

¹¹Engũnũnũko ĩkahũlũkaya omo kyũna kiguma amagetsi awasĩhĩre, nʼamagetsi awakalĩhĩre kwehĩ?

¹²Kandi balĩkyetu, omuti wʼomũtĩnĩ anganatoka eriheta kwʼebĩgũma byʼemĩzeĩtũnĩ kwehĩ? Kutse omũlĩkĩ wʼebĩnyũ anganatoka eriheta kwʼebĩgũma byʼomũtĩnĩ kwehĩ? Litya amagetsi wʼOmũnyũ siangatoka erĩhũlũkya awasĩhĩre.

¹³Nindi omo katĩkatĩ kenyũ oyuwite amenge nʼeriminya kwehĩ? Akanganayebyo omo mibere mibuya yiwe, nʼomo mĩbĩrĩ yiwe eyo akakola nʼomutima molo, nʼowʼamenge.

¹⁴Nĩkwa mwamabya nʼeritsura erĩkalĩhĩre, nʼeriyanza nabi omo mitima yenyũ, Simuyihalambe nʼeribihira omwatsi wʼekwenene.

¹⁵Amenge aya sĩ mũsĩndo owakalũa endata, nĩkwa ni wʼekihugo, kandi ni wʼomubiri, kandi ni wa Satanĩ.

¹⁶Kusangwa ahali eritsura nʼeriyanza nabi, aho hali erinegena nʼerikola ebĩtĩsĩrĩre byosĩ.

¹⁷Nĩkwa amenge awakalũa endata, embere ni mabuya; kandi ni wʼobuholo, kandi ahehere, kandi akowa lũba, oswĩre mwʼeriganyira, nʼemĩbĩrĩ mibuya; kandi sialisombola ndi nandi, kandi sĩalĩyĩtendereraya.

¹⁸Kandi emyatsi eyikaleta ebitunganene ĩkatsũka omo buholo busana nʼabandu abakayira Obuholo.