Read nande Yakobo 5 Bible Online

Yakobo 5 - nande bible

Yakobo 5

¹Neryo muhulikirire lino, ĩnywe bandu bʼebindu! Mulire, muyilakire busana nʼamalĩge awakandĩsyabahĩkako.

²Ebindu byenyũ byabirihonda, nʼesyongimba syenyũ syabiriribwa nʼehinyurugunzu.

³Esyamagetsi nʼebĩtsĩpa byenyũ, byabĩrĩhwa amakenge, nʼamakenge wabyo asyabya mũlangĩrĩ wenyũ, kandi asyalya emĩnyokũ yenyũ ngʼomuliro. Mwabiriyibikira ebindu byenyũ omo biro byʼenyũma-nyũma.

⁴Mũlebaye, simwetaliha abandu abahingira omo malima wenyũ, nʼabandu abasolomago. Nabo bakabatsongera. Nʼerilaka lyabo lyabĩrĩhĩka omo matwĩ wʼOmukama wʼAmaka Gosĩ.

⁵Mwabirisiba muna-kihugo ngʼabami, nʼerĩyĩtsemesya ndeke. Mwabĩrĩnenehya emitima yenyũ busana nʼekiro kyʼerikerwa.

⁶Mwabĩrĩsĩnga nʼerĩĩta omundu mutunganene; naye sialilwa nenyũ.

⁷Neryo balĩkyetu, muyibombeke erĩhĩka oko kiro kyʼeriasa lyʼomukama. Mũlebaye ngoko mũlĩmĩ akayibombeka, eririnda eriera lyʼebĩgũma byʼenzwere nene byʼekitaka, iniakayibombeka erĩhĩka oko kiro embũla yʼerĩmbere nʼeyʼerĩnyũma ikawa.

⁸Nenyũ nibya, muyibombeke! Mũsĩkaye emitima yenyũ, kusangwa ekiro kyʼeriasa lyʼomukama kiri hakũhĩ.

⁹Balĩkyetu, simutongane, mukasyatswerwa na Nyamuhanga. Mũlebaye, omũtswerĩ imene oko lũkyo.

¹⁰Balĩkyetu mwibuke abamĩnyererĩ, ababũga omo lĩna lyʼomukama. Muganzebo ngʼolulengo lwʼerĩyĩyĩnĩa, nʼeriyibombeka omo bũlĩge.

¹¹Mũlebaye, tukaganza abayĩyĩnaya mo bandu bʼobutseme. Mwabĩrĩowa engulu yʼerĩyĩyĩnĩa lya Yobũ, kandi mwabirilangira ebyo Mukama asala amukolera. Kusangwa Omukama ni wʼeriganyira kutsibu, kandi akaganyira abandu.

¹²Nĩkwa kwilaba ebyosĩ, balĩkyetu, omugulu mukalaga, sĩmũlahĩraye kutse omo lubula, kutse omo kihugo, kutse omo lindi erĩlahĩrya. Nĩkwa ega yenyũ ibye ega, nʼeyihi yenyũ ibye iyihi, Nyamuhanga siabatswere.

¹³Hali mundu omo katĩkatĩ kenyũ akagalawa kwehĩ? Asabe. Hali Oyukatsema kwehĩ? Imbe nʼeripipa.

¹⁴Hali oyulwere omo katĩkatĩ kenyũ kwehĩ? Abirikire abakulu bʼekanĩsa, bamusabire, nʼerĩmũhakabya amagũta omo lĩna lyʼomukama.

¹⁵Nʼerisaba erĩ lyʼerĩkĩrĩrya lyasyalamya Omũkonĩ, nʼOmukama asyamũsũbya. Kandi amabya abirikola ebibi, asyabuyirwabyo.

¹⁶Neryo mũkangananaye ebibi byenyũ, nʼerisabirana, imwatoka erĩlamĩbwa. Erisaba lyʼomundu mutunganene likatoka omwatsi munene.

¹⁷Elĩa abya mundu nga twe, neryo mwasaba nʼomũhwa ati, embũla siyiwe. Neryo embũla moyitawa oko kihugo emyaka ĩsatu nʼemikera ndatu.

¹⁸Neryo mwaswasaba neryo olubula molwawĩsya embũla, nʼekitaka mokyalasya esyombuto.

¹⁹Balĩkyetu, hamabya mundu omo katĩkatĩ kenyũ oyukatala nʼerĩlũa omo kwenene, nʼogundi akamũsũbũlya;

²⁰muminye omwatsi ono, oyũkasũbũlaya omukola-nabi erĩmũlũsya okwʼitala liwe, akalamaya omutima wʼomukola-nabi oyo okwʼihola, kandi akaleka ebibi binene ibyabuyirwa.