Read nande 1 Petero 1 Bible Online

1 Petero 1 - nande bible

1 Petero 1

¹Ĩngye Petero, omukwenda wa Yesu Kristo, ngabasakira ĩnywe bandu abo Nyamuhanga ayisoga, abĩkere ngʼabasayĩ, abapanza-panzirawa omo bihugo byʼePonto, nʼeGalatĩa, nʼeKapadokĩa, nʼeAsĩa, nʼeBetanĩa.

²Nyamuhanga Tata, mwabaminya kera nʼeriyisoga nywe. Omũlĩmũ Abũyĩrĩre iniabiribahigula, imwatoka erĩowa Yesu Kristo nʼerĩerĩbwa omo musasi wuwe. Olukogo nʼobuholo bibye nenyũ kutsibu.

³Tupipe Nyamuhanga ye Tata wʼOmukama wetu Yesu Kristo! Busana nʼeriganyira liwe lĩnene, abiriswatubuta kandi nʼerituha engebe eyiri nʼamaha busana nʼerĩlũbũka lya Yesu Kristo oko baholĩ.

⁴Neryo tukalindirira eribana emĩyĩsa mibuya eyo Nyamuhanga akabikira abandu buwe. Abiribabikira emĩyĩsa eyo elubula, aho itehonda kutse eritsanda kutse erikeha.

⁵Emĩyĩsa eyo ni busana nenyũ abakateyĩbawa omo maka wa Nyamuhanga busana nʼerĩkĩrĩrya lyenyũ, imukalindirira erilama eryo likandisyabĩsũlwa oko mugulu wʼenyũma-nyũma.

⁶Ekĩ kikaleka imwatsema kutsibu, na lino litolere ĩmwakwa obũlĩge omwʼirengwako mĩsĩndo-mĩsĩndo.

⁷Neryo erirengwako eryo lĩkamĩnyĩsaya erĩkĩrĩrya lyenyũ. Esyamagetsi sikanahera, nasyo sikalengawako omo muliro. Neryo erĩkĩrĩrya lyenyũ eriwite enzwere nene kwilaba esyamagetsi, litolere iryalengwako. Neryo mwasyabana eripipa nʼolukengerwa, nʼerĩsĩkĩbwa oko kiro ekyo Yesu Kristo asyabĩsũlwa.

⁸Neryo mukanza Yesu Kristo nomo mutetamulolako, kandi mũkamwĩkĩrĩraya nomo mutetamulangira lino, kandi mukatsema kutsibu nʼobutseme obutetoka eriahulwa, obuwite olukengerwa.

⁹Kusangwa mukabana endũlĩ yʼerĩkĩrĩrya lyenyũ, omulamo wʼemitima yenyũ.

¹⁰Abamĩnyererĩ mobasonda-sonda nʼerĩbũlĩrĩrya omwatsi wʼerilama erĩ. Neryo mobaminyerera omwatsi wʼolũsũnzo lwʼolukogo olo Nyamuhanga angabaha.

¹¹Kandi mobalenga eriminya ngʼOmũlĩmũ wa Kristo, omwisi wabo, abya akahula emyatsi yahi kutse mugulu wahi. Kusangwa Omũlĩmũ abya akaminyerera amalĩge wa Kristo, nʼolukengerwa olwasyakwama amalĩge ayo.

¹²Nyamuhanga mwabĩsũlĩra abamĩnyererĩ aba ngoko mũbĩrĩ wabo siabya busana nabo ĩbobene, nĩkwa busana nenyũ, omugulu babũga emyatsi eyo mwabĩrĩowa. Kandi abakwenda bʼEngulu Yowene, ababũga omo maka wʼOmũlĩmũ Abũyĩrĩre owatumawa erĩlũa elubula, mobababwira ebyʼekwenene ebĩ. Kandi emyatsi eyĩ abamalaĩka banzĩre eriminyayo.

¹³Neryo mubye nʼamalengekanĩa wʼerikola omũbĩrĩ. Mũyĩtegaye, mũhĩre amaha wenyũ ndeke oko lukogo olo Yesu Kristo asyabaletera ekiro asyabĩsũlwa.

¹⁴Mubye bana abakowa Nyamuhanga. Simusyekwama esyongumbu esyo mwabya mukakwama erĩmbere omo butaminya bwenyũ.

¹⁵Nĩkwa mubye babũyĩrĩre omo migendere yenyũ, nga Nyamuhanga oyo wababirikira abũyĩrĩre.

¹⁶Kusangwa Amasako ati, Mwasyabya babũyĩrĩre, ngoko nage nyĩbũyĩrĩre.

¹⁷Omugulu mukasaba Nyamuhanga, mukamwahula mo Tata, oyukatswera obuli mundu, butsira obutaga, ngʼemĩbĩrĩ yiwe kwʼiri; mulendere nʼerikenga Nyamuhanga omugulu mukine omo kihugo kino.

¹⁸Kusangwa mũnasĩ momũtatongolĩbwa oko mitsye mitya-mitya nʼemigendere yʼabotata-kulu wenyũ, omo bindu ebikahera, ngʼebĩtsĩpa kutse esyamagetsi.

¹⁹Nĩkwa mwatongolĩbawa omo musasi wa Kristo, owʼobũgũlĩ bunene, naye abya ngʼekyana kyʼembũlĩ ekite kwʼekĩtĩngũ kutse bulema.

²⁰Kusangwa Nyamuhanga ayisoga Kristo ekihugo kite kyahangikwa. Nĩkwa abirihuluka omo biro ebĩ byʼenyũma-nyũma busana nenyũ.

²¹Neryo busana na Kristo mwabĩrĩkĩrĩrya Nyamuhanga oyo wamũlũbũkaya oko baholĩ nʼerimuha olukengerwa. Neryo erĩkĩrĩrya lyenyũ nʼamaha wenyũ ibyabya uku Nyamuhanga.

²²Neryo kusangwa mwabĩrĩerya emitima yenyũ, busana nʼerĩowa omwatsi wʼekwenene, kandi mwabiribya nʼolwanzo olute nʼeriteba busana nʼabalĩkyetu, lino litolere imwanzana nʼemitima yenyũ yosĩ nʼomũhwa.

²³Kusangwa mwabiributwa buhya-buhya, butsira omo mbuto eyikahonda, nĩkwa omo mbuto eyitehonda, kye kĩnywa kya Nyamuhanga, ekiri mwʼengebe, kandi ekikakota.

²⁴Ngoko kĩsakĩre kiti, Abandu bosĩ bali ngʼebiti byʼomolĩ, Nʼobubuya bwabo buli ngʼomusanga wʼebiti. Ebiti bikuma nʼomusanga wabyo akalagala.

²⁵Nĩkwa ekĩnywa kyʼomukama kikakota. Ekĩ kyo kĩnywa kyʼEngulu Yowene ekyatũlawa ũkwʼĩnywe.