Read nande 1 Petero 2 Bible Online

1 Petero 2 - nande bible

1 Petero 2

¹Neryo mũyĩlũsaye kwʼebibi byosĩ, nʼeribiha lyosĩ, nʼerĩyĩtendererya, nʼeritsura, nʼerirega abandi ryosĩ.

²Mubye ngʼesyomekeke, imukasonda kutsibu amasabũ agowene busana nʼomutima, imwatoka eriusuka busana nʼerilama.

³Ngoko kĩsakĩre kiti, Mwabĩrĩgerya oko bubuya bwʼomukama.

⁴Neryo mwase oko Mukama oyuli erĩbwe eriwite engebe, eryaganawa nʼabandu, nĩkwa eryayisogawa na Nyamuhanga, ngʼerĩbwe eryʼobũgũlĩ bunene.

⁵Mwase ngʼamabwe awawite engebe, mũhĩmbawe mo hekalũ yʼekĩrĩmũ, mubye abahererĩ babũyĩrĩre, abakaherera esyohongo syʼekĩrĩmũ busana na Yesu Kristo, esĩkatsemesaya Nyamuhanga.

⁶Kusangwa Amasako akabũga ati, Lebaya ngahĩmba eSĩonĩ, erĩbwe nayisoga, Erĩbwe ryʼenũnga, eryʼobũgũlĩ bunene, Nʼoyũkamwĩkĩrĩraya sĩendĩsyakwa esĩsonĩ.

⁷Erĩbwe erĩ, nĩ ryʼobũgũlĩ bunene busana nenyũ abakĩkĩrĩraya. Nĩkwa busana nʼabatĩkĩrĩraya, ati, Erĩbwe eryo bahĩmbĩ babana nga ni buyira, Lyabiribya erĩbwe erĩkatũngananaya enũnga yʼenyũmba.

⁸Kandi Amasako ati, Nĩ rĩbwe lyʼerĩtwĩkalya abandu, Nĩ rĩbwe lyʼerĩtoya abandu. Bakatwĩkala kusangwa mobatĩkĩrĩrya ekĩnywa; kandi lyabya erisonda lya Nyamuhanga.

⁹Nĩkwa ĩnywe muli kihanda ekyayisogawa, abahererĩ bʼobwami, ekihanda kĩbũyĩrĩre, abandu ba Nyamuhanga, imwatoka erĩkangya emĩbĩrĩ mibuya ya Nyamuhanga, oyo wababirikira erĩlũa omo mwĩrĩmya nʼeriingira omo kyakakala kiwe kyʼeriswekera.

¹⁰Kusangwa Simwabya bandu, nĩkwa lino muli bandu ba Nyamuhanga; mwabya isimwetabana eriganyira lya Nyamuhanga, nĩkwa lino mwabiribana eriganyira liwe.

¹¹Abanze betu, ngabalemba-lemba ngʼababunga nʼabagendĩ, mugane erikwama esyongumbu syʼomubiri esikalwa nʼomutima.

¹²Muyire emigendere mibuya omo katĩkatĩ kʼEbihanda, neryo nomo bangabatsuma ngʼabakola-nabi, nĩkwa omugulu bakalangira emĩbĩrĩ yenyũ mibuya, ibapipa Nyamuhanga oko kiro kyʼeritswerwa.

¹³Mowe abatabalĩ ba muna-kihugo busana nʼOmukama, kutse ni mwami oyuwite ehamũlĩ yosĩ,

¹⁴kutse abatabalĩ bakulu buwe abakatumawa erisuyira abakola-nabi nʼeripipa abakakola ndeke.

¹⁵Kusangwa erisonda lya Nyamuhanga liti omwʼikola ndeke mũsĩnge ebĩnywa bitya-bitya byʼabandu bakĩrũ.

¹⁶Mukole ngʼabandu bʼobwĩranda nĩkwa Simuyire obwĩranda bwenyũ ngʼekindu kyʼerĩbĩsa ekibi, mubye bakobe ba Nyamuhanga.

¹⁷Mũsĩkaye abandu bosĩ. Mwanze abalĩkyetu Abakristo, mukenge Nyamuhanga, kandi mũsĩkaye omwami.

¹⁸Abagombe, mubye mũkowa abakama benyũ nʼerikengabo ndeke, butsira abakama babuya nʼabʼomutima molo basa, nĩkwa abakama bakalĩre.

¹⁹Omundu akasĩmawa na Nyamuhanga amayĩyĩnĩa omo bulĩge ate ko lubanza, kusangwa akakola erisonda lya Nyamuhanga.

²⁰Nĩkwa endũndĩ ni yahi mwamayĩyĩnĩa omugulu bakabahũnza busana nʼebibi mukakola kwehĩ? Nĩkwa mwamakola ndeke, neryo mũkayĩyĩnĩa omugulu mukagalawa, Nyamuhanga asyabatsumula busana nʼekyo.

²¹Kusangwa Nyamuhanga ababirikira busana nʼomwatsi oyũ. Kusangwa Kristo nibya mwagalwa busana nenyũ, neryo mwabasĩgĩra olugobe olo mwangakwama.

²²Ngoko kĩsakĩre kiti, Mwatakola ekibi, kutse amatebo mwatabanika omo mĩnywa yiwe.

²³Kandi omugulu atsumawa, mwataswatsumabo, omugulu agalawa mwatũbahya, nĩkwa mwayĩhĩra omo byala byʼoyukatswera ebitunganene, ye Nyamuhanga.

²⁴Kristo ĩyowene-wene mwaheka ebibi byetu omo mubiri wuwe oko musalaba, itwatoka erihola oko bibi, nʼeribyaho busana nʼekitunganene; kusangwa mwalamĩbawa omo mĩbĩbũ yiwe.

²⁵Kusangwa mwabya ngʼesyombũlĩ esyatala, nĩkwa lino mwabirisuba oko Mũlĩsya nʼomũteya wʼemitima yenyũ.