Read nande 1 Petero 3 Bible Online

1 Petero 3 - nande bible

1 Petero 3

¹Litya nenyũ ĩnywe bakalĩ, mowe abĩba nywe, neryo abatĩowa ekĩnywa kya Nyamuhanga batoke erĩsĩngwa nʼerĩkĩrĩrya busana nʼemigendere yʼabakalĩ babo, isibetabwirwa ekĩnywa nʼekiguma.

²Kusangwa bakalebaya emigendere yenyũ mibuya eyikakenga.

³Nʼobubuya bwenyũ sibubye obwʼeyĩhya, ngʼeriluka esyonzwiri, nʼeriambala emisege yʼesyamagetsi, nʼeriambala emyambalire yowene.

⁴Nĩkwa obubuya bwenyũ bubye bwʼomutima owali omwisi wʼomundu. Bubye obubuya bwʼekĩrĩmũ ekihehere nʼekyʼobũkũtũ, ekitetsanda. Obubuya obo ni bwʼobũgũlĩ bunene embere sya Nyamuhanga.

⁵Kusangwa litya kera abakalĩ babũyĩrĩre, abahĩra amaha uku Nyamuhanga, babya bakayĩsũga, nʼerĩowa abĩba wabo.

⁶Sara naye mwowa Abrahamũ, nʼerimwahula mo mukama. Nenyũ muli bana buwe mwamakola nʼeritendiubaha kindu.

⁷Nenyũ abĩba wabo nibya, mwĩkale nʼabakalĩ benyũ omo menge, ĩmũnasĩ abakalĩ ko bali bolo. Kandi mũsĩkayebo, kusangwa basyabana haguma nenyũ olũsũnzo lwa Nyamuhanga lwʼengebe, neryo mukole mutya erisaba lyenyũ sĩrĩkakĩrĩbawe.

⁸Omo myatsi yosĩ eyĩ tuti, Ĩnywe bosĩ mubye nʼobũlengekanĩa buguma, nʼomutima muguma, mwanzane ngʼabasubeneko, mubye nʼomutima mubuya, kandi mũyĩkehaye.

⁹Sĩmũtũhũlaye ekibi busana nʼekibi, kutse eritsuma busana nʼeritsuma, nĩkwa kumbe mutsumulebo. Kusangwa Nyamuhanga mwababirikira busana nʼomwatsi oyũ, imwabana eritsumula eryo alaga.

¹⁰Ngoko Amasako ati, Oyo wanzĩre eritsemera engebe, nʼeribana ebiro byowene, Olulimi luwe lũmbaye erĩbũga ekibi, nʼemĩnywa yiwe yũmbaye eriteba.

¹¹Ahũtatire ekibi, akole ebibuya; Asonda-sondaye Obuholo, nʼerikwamirirabo.

¹²Kusangwa ameso wʼOmwami Mukulu akatungerera abatunganene, Kandi amatwĩ wuwe akowa erisaba lyabo. Nĩkwa Omwami Mukulu akalola abakola-nabi bʼebitsule.

¹³Nindi asyabakola nabi mwamabya nʼomũhwa wʼerikola ebibuya kwehĩ?

¹⁴Kandi nomo mwangagalwa busana nʼerikola ekitunganene, muli bandu bʼobutseme. Simubahe erĩũbahya lyabo, kandi sĩmũhahũkaye emitima.

¹⁵Nĩkwa omo mitima yenyũ mukenge Kristo ngʼomukama wenyũ. Ĩmũnasĩkĩre endambĩ yosĩ erĩsũbĩrya obuli mundu oyũkababũlaya busana nʼamaha ago muli nago.

¹⁶Nĩkwa mũmũsũbĩraye bolo-bolo, nʼerimukenga. Kandi mubye nʼobunya-mutima bowene, neryo omugulu bakabanegulira, nʼeritsuma emigendere yenyũ yʼobu Kristo, bĩtawe esĩsonĩ.

¹⁷Kusangwa lyowene ndeke imwagalwa busana nʼerikola ebibuya omwʼisonda lya Nyamuhanga, kwilaba erikola nabi.

¹⁸Kusangwa Kristo mwahola busana nenyũ engendo nguma nyisa busana nʼebibi. Omundu mutunganene mwahola busana nʼabandu batatunganene, iniatoka erituleta uku Nyamuhanga. Kandi mwĩtwa oko mubiri nĩkwa mwabana engebe omo kĩrĩmũ.

¹⁹Kandi mwagenda omo mũlĩmũ, mwayatũlago oko bĩrĩmũ ebiri omo mũlĩkĩ.

²⁰Ebĩrĩmũ ebĩ byabya ĩsĩbĩrĩowa Nyamuhanga, omugulu abya akalindabo omo butaluha oko biro ebyo Noa abya akahĩmba obwato. Nʼomo bwato obo abandu bake, Omunani musa, mobalamĩbwa omo magetsi ayo.

²¹Omwatsi oyo nĩ kĩsosekanĩo kyʼolũbatĩso busana nʼerilama lyenyũ. Erĩbatĩsya sĩ ʼlũsya lyʼemĩtĩndũ yʼomubiri, nĩkwa ni ʼlaga Nyamuhanga omo bunya-mutima bowene, erĩlamĩbwa busana nʼerĩlũbũka lya Yesu Kristo.

²²Yesu Kristo abiriya elubula, kandi ali oko byala byʼamali bya Nyamuhanga; iniabiritabala oko bamalaĩka, nʼabʼehamũlĩ bʼelubula nʼabʼamaka.