Read nande 1 Petero 4 Bible Online

1 Petero 4 - nande bible

1 Petero 4

¹Neryo kusangwa Kristo abiriagalwa omo mubiri, nenyũ nibya mũyĩsũnze obũlengekanĩa obo, kusangwa oyukagalawa omo mubiri abĩrĩũmbya oko bibi.

²Nĩkwa lino omugulu mukineho omo mubiri, mukwame erisonda lya Nyamuhanga butsira esyongumbu syʼabandu.

³Kusangwa oko mugulu owalaba mwabirikwama endambĩ yingaho amalengekanĩa wʼabatĩkĩrĩrye. Mwabya mukakwama erĩsĩngĩra, nʼesyongumbu, nʼerĩkũnda, nʼeritamira, nʼerĩyalũmba, nʼesyonye syʼesyosanamu.

⁴Kandi abʼebihanda bakasweka omugulu mutesangira nabo omo syonye syabo syʼeritamira, neryo bakabatsuma.

⁵Nĩkwa basyakanganĩa Nyamuhanga ebyo bakola, naye asĩkĩre erĩtwa esyombanza syʼabaliho nʼesyʼabaholĩre.

⁶Kusangwa Engulu Yowene yabĩrĩtũlwa ukwʼabo babirihola, nomo babiritswerwa omo mubiri ngʼabandu bosĩ ko bakatswerawa. Nĩkwa mwatũlayo kubo batoke eribyaho omo kĩrĩmũ ngʼerisonda lya Nyamuhanga.

⁷Endũlĩ yʼemyatsi yosĩ iri hakũhĩ. Neryo mubye nʼobũlengekanĩa bwʼamenge, nʼobwʼerĩyĩteya, imwatoka erisaba.

⁸Kwilaba emyatsi yosĩ, mũkwe omũhwa wʼerianzana kutsibu, kusangwa olwanzo lũkakũnĩngĩra ebibi bingi.

⁹Mũkokanaye omo manyũmba wenyũ butsira eriyitonga-tonga.

¹⁰Obuli mundu abirihabwa olũsũnzo lwʼomũsĩndo olũkalũa uku Nyamuhanga. Mukolerane omo lũsũnzo olo, ngʼabateya bʼolũsũnzo mĩsĩndomĩsĩndo Nyamuhanga akatuha.

¹¹Oyũkatũlago, atũle ebĩnywa bya Nyamuhanga. Oyukakola omũbĩrĩ, akolego omo maka ago Nyamuhanga akamuha. Neryo omo myatsi yosĩ Nyamuhanga apipawe busana na Yesu Kristo. Olukengerwa nʼobũtokĩ ni biwe kera na kera. Amina.

¹²Abanze, simusweke busana nʼerirengwako erĩkalĩre erĩkabahĩkako nga ni kindu kyʼehandi busana nenyũ.

¹³Nĩkwa mutseme kusangwa mukasangira amalĩge wa Kristo. Neryo omugulu olukengerwa luwe lwasyabĩsũlwa, imwatoka eritsema nʼeritsanga.

¹⁴Mwamatsumwa kusangwa mukakwama Kristo, muli nʼomũyĩsa, kusangwa Omũlĩmũ wʼolukengerwa, wʼOmũlĩmũ wa Nyamuhanga ĩkere nenyũ.

¹⁵Nĩkwa Sihabye mundu omo katĩkatĩ kenyũ oyukagalawa ngʼomwĩtĩ, kutse ngʼomũrahĩ, kutse ngʼomũkolĩ wʼebibi, kutse oyũkayĩhĩra omo myatsi ya bene.

¹⁶Nĩkwa omundu amagalwa kusangwa ni Mukristo, sĩakwe esĩsonĩ, nĩkwa apipe Nyamuhanga busana nʼeribya Mukristo.

¹⁷Kusangwa omugulu wʼeritswera abandu ba Nyamuhanga abĩrĩhĩka. Neryo eritswera eryo lyamatsũka ũkwʼĩtwe, endũlĩ yʼabandu abatetsomana Engulu Yowene ya Nyamuhanga yasyabya yiti kwehĩ?

¹⁸Ngoko Amasako akabũga ati, Lyamakala busana nʼomundu utunganene erĩlamĩbwa, Oyutekenga Nyamuhanga, nʼomukolanabi, basyabya bati kwehĩ?

¹⁹Neryo abakagalawa busana nʼerisonda lya Nyamuhanga, bahĩre emitima yabo omo byala byʼOmũhangĩkĩ oyuteregula, babye bakakola ekitunganene.