Read nande 1 Yoane 3 Bible Online

1 Yoane 3 - nande bible

1 Yoane 3

¹Mulangire ngoko Tata abiritwanza kutsibu, kusangwa tukahulawa mo bana ba Nyamuhanga; ko tune tutya. Busana nʼomwatsi oyũ; ekihugo sĩkĩtwasĩ, kusangwa mokitetaminya Nyamuhanga.

²Abanze betu, lino tuli bana ba Nyamuhanga, nĩkwa sikyetaminyikala ngoko twasyabya. Nĩkwa tũnasĩ ekiro Kristo asyabutuka, twasyamusosa, kusangwa twasyamulolako ngoko ali.

³Nʼobuli mundu oyuli nʼamaha aya uku Kristo, akayihigula oko bibi, ngoko Kristo abũyĩrĩre.

⁴Oyukakola ebibi akaketa Emigambo ya Nyamuhanga. Kusangwa ekibi ni ʼketa Emigambo.

⁵Kandi mũnasĩ ngoko Kristo kwʼaminyikala erĩlũsya ebibi byʼabandu; kandi Kristo siali kwʼekibi.

⁶Sihali mundu oyumatikene na Kristo oyukakola ebibi. Nʼoyukakola ebibi, isialitamulolako nʼahake, kutse erimuminya.

⁷Bana bage balere, simuleke omundu akabateba. Omundu oyukakola ebitunganene, atunganene ngoko Kristo naye atunganene.

⁸Nĩkwa oyukakola ebibi ni wʼeSatanĩ, kusangwa Satanĩ atula akakola ebibi erĩtsũka erĩmbere. Omugala wa Nyamuhanga mwaminyikala busana nʼomwatsi oyũ wʼerĩherya emĩbĩrĩ yʼeSatanĩ.

⁹Obuli mundu Oyukabutawa na Nyamuhanga sialikola ebibi, kusangwa awite obu Nyamuhanga omwisi wuwe; neryo sialitoka erikola ebibi, kusangwa Nyamuhanga ni Tata wuwe.

¹⁰Ũmwʼekĩ abana ba Nyamuhanga nʼabana bʼeSatanĩ baminyikere. Oyutekola ebitunganene, kutse omundu Oyũtanzĩre mũlĩkyabo, abo si bana ba Nyamuhanga!

¹¹Kusangwa omwatsi ogo mwowa erĩtsũka erĩmbere goyũ: Twanganzana.

¹²Situbye nga Kaĩna, oyo wabya wʼOmubi Oyo, neryo mwĩta mulumuna wuwe. Neryo mwamwĩta busana nakĩ kwehĩ? Kusangwa emĩbĩrĩ ya Kaĩna yabya mibi, nĩkwa eya mulumuna wuwe yabya itunganene.

¹³Neryo balĩkyetu, simusweke abandu bʼekihugo bamabakwa obusu.

¹⁴Ĩtwe tũnasĩ ko twabĩrĩlũa oko luholo, nʼeribana engebe, twasĩ tutya kusangwa tukanza abalĩkyetu. Oyutianza ĩkere omo luholo.

¹⁵Obuli mundu Oyũkakwa mũlĩkyabo yʼobusu nĩ mwĩtĩ, kandi mũnasĩ ko hate mwĩtĩ oyuwite engebe yʼerikota omwisi wuwe.

¹⁶Tukaminya olwanzo ko luli lutya, tuti Kristo mwaha engebe yiwe busana netu. Netu litolere itwaha esyongebe syetu busana nʼabalĩkyetu.

¹⁷Omundu oyuwite ebindu byʼekihugo kino, neryo akalangira mũlĩkyabo ali nʼobwaga, ĩnĩakakalaya omutima wuwe nʼerĩmwĩma, awite olwanzo lwa Nyamuhanga omo mutima wuwe mo ati kwehĩ?

¹⁸Bana bage, simwanze omo bĩnywa kutse omo lulimi lusa, nĩkwa twanze omo mĩbĩrĩ nʼekwenene.

¹⁹Busana nʼekĩ twasyaminya ko tuli bʼomwatsi wʼekwenene, nʼemitima yetu yasyasĩka embere sya Nyamuhanga.

²⁰Kusangwa omutima wetu amatuhandikirira, Nyamuhanga ni mukulu, alengĩre emitima yetu, kandi asĩ emyatsi yosĩ.

²¹Abanze, omutima wetu amatindatũsĩnga, tuwite erĩsĩka embere sya Nyamuhanga.

²²Kandi tukabana ebyosĩ ebyo tũkamũbũlaya, kusangwa tukakwama ebihano biwe, kandi tukakola emyatsi eyo eyĩkamũtsemesaya.

²³Neryo ekihano kiwe kiti twĩkĩrĩraye erĩna lyʼomugala wuwe Yesu Kristo, nʼerianzana, ngoko Kristo atuhana.

²⁴Kandi oyukakwama ebihano biwe, amatikene na Kristo, na Kristo amatikene naye. NʼOmũlĩmũ ogo atuha akaleka itwaminya kwʼamatikene netu.