Read nande 1 Yoane 4 Bible Online

1 Yoane 4 - nande bible

1 Yoane 4

¹Abanze betu, sĩmwĩkĩrĩraye obuli kĩrĩmũ, nĩkwa mulenge oko bĩrĩmũ byʼabandu erĩrebya nga bĩkalũa uku Nyamuhanga; kusangwa abamĩnyererĩ bangi bʼamabehĩ babiriyitsatsanga omo kihugo.

²Busana nʼekĩ mwasyaminya nga nĩ Mũlĩmũ wa Nyamuhanga: obuli mundu oyũkalĩgago ati, Yesu Kristo abĩrĩhĩka omo mubiri wʼabandu, awite Omũlĩmũ owakalũa ewa Nyamuhanga.

³Nĩkwa obuli mundu oyũterĩga Yesu siawite Omũlĩmũ owakalũa uku Nyamuhanga. Ekĩrĩmũ ekĩ nĩ nzĩgũ ya Kristo. Nenyũ mwabĩrĩowa enzĩgũ eyo kwʼikasa, na lino ine omo kihugo.

⁴Bana bage balere, ĩnywe muli ba Nyamuhanga, kandi mwabĩrĩkĩnda abamĩnyererĩ bʼamabehĩ abo. Kusangwa Omũlĩmũ owali omwisi wenyũ ni mukulu, alengĩre ekĩrĩmũ ekiri omo bandu bʼekihugo.

⁵Aba ni bandu bʼekihugo, bo bakabũga emyatsi yʼekihugo, nʼekihugo kĩkowabo.

⁶Ĩtwe tuli ba Nyamuhanga, nʼoyo wasĩ Nyamuhanga akatowa. Kandi oyute wa Nyamuhanga sĩalĩtowa. Ũmwʼekĩ tukaminya Omũlĩmũ wʼekwenene, nʼekĩrĩmũ kyʼeriteba.

⁷Abanze betu, twanzane, kusangwa olwanzo lũkalũa uku Nyamuhanga. Obuli mundu Oyukanza, Nyamuhanga abirimubuta, kandi asĩ Nyamuhanga.

⁸Oyutianza sialitaminya Nyamuhanga, kusangwa Nyamuhanga ni Lwanzo.

⁹Olwanzo lwa Nyamuhanga lwabiriminyikala ũkwʼĩtwe omo mwatsi ono, ati, Nyamuhanga mwatuma Mugala mubutwa muguma wuwe omo kihugo, itwatoka eribana engebe busana naye.

¹⁰Olwanzo lolũ; butsira ambu ĩtwe twanza Nyamuhanga, nĩkwa iye mwatwanza, mwatuma Omugala wuwe eribya mbanulo busana nʼebibi byetu.

¹¹Abanze betu, Nyamuhanga amatwanza atya, netu litolere itwanzana.

¹²Sihali mundu oyo walola uku Nyamuhanga na kera, nĩkwa twamanzana, Nyamuhanga amatikene netu, kandi olwanzo luwe lwabĩrĩhĩkana omwisi wetu.

¹³Nyamuhanga abirituha Omũlĩmũ wuwe, kikaleka itwaminya ko tumatikene na Nyamuhanga, kandi ko Nyamuhanga amatikene netu.

¹⁴Netu twabirilangira, kandi tũkatũlago ko Tata abirituma Mugala wuwe eribya Mũlamya wʼekihugo.

¹⁵Kandi oyũkalĩga ati, Yesu ni Mugala wa Nyamuhanga, neryo Nyamuhanga amatikene naye, kandi naye amatikene na Nyamuhanga.

¹⁶Netu twabiriminya, kandi twĩkĩrĩrye olwanzo olo Nyamuhanga abiritwanzamo. Nyamuhanga ni lwanzo, nʼoyuli nʼolwanzo amatikene na Nyamuhanga, kandi Nyamuhanga amatikene naye.

¹⁷Neryo olwanzo lũkahĩkana omwisi syetu, itwatoka erĩsĩka oko Kiro kyʼeritswerwa. Kusangwa ngoko Kristo ali, netu ko tuli tutya omo kihugo kino.

¹⁸Sihali eriubaha omo lwanzo; nĩkwa olwanzo olũhĩkene lukahiga eriubaha lyosĩ. Oyukubaha syalĩtahĩkana omo lwanzo, kusangwa eriubaha lĩkahĩka busana nʼerisuyirwa.

¹⁹Tukanza, kusangwa Nyamuhanga mwatsũka eritwanza.

²⁰Omundu amabũga ati, Nyanzĩre Nyamuhanga, ĩnĩakakwa mũlĩkyabo yʼobusu ini mũbehĩ. Kusangwa Oyũtanzĩre mũlĩkyabo oyo abirilolako, siangatoka erianza Nyamuhanga oyo ate atalolako.

²¹Kandi Kristo mwatuha ekihano ekĩ ati, Oyo wanzĩre Nyamuhanga, anze nʼomũlĩkyabo nibya.