Read nande Abatswerĩ 1 Bible Online

Abatswerĩ 1 - nande bible

Abatswerĩ 1

¹Neryo enyũma wʼoluholo lwa Yosũa, abana ba Ĩsraelĩ mobabũlya Omwami Mukulu bati, Nindi wasyatsũka eriyatubambira Abakanana, erilwa nabo kwehĩ?

²Neryo Omwami Mukulu mwabũga ati, Yũda akandiyalwa, lebaya nabĩrĩhĩra ekihugo omo byala biwe.

³Na Yũda mwabwira Sĩmeonĩ mugala wabo ati, Wase haguma nage oko mugereko wage, tulwe nʼAbakanana; nage nasyagenda haguma nawe omo mugereko wawe. Neryo Sĩmeonĩ mwagenda naye.

⁴Na Yũda mwahongoka, neryo Omwami Mukulu mwahĩra Abakanana nʼAbaperezĩ omo byala byabo. Mobĩtĩra eBezekĩ abandu elfu ĩkũmĩ.

⁵Kandi mobeya Adonĩ-bezekĩ eBezekĩ; mobalwa naye, kandi mobĩta Abakanana nʼAbaperezĩ.

⁶Nĩkwa Adonĩ-bezekĩ mwasaga; neryo mobamukwama, neryo mobamuhamba, mobamũtwako ebikumo biwe nʼamano wuwe wʼobulume.

⁷Na Adonĩ-bezekĩ mwabũga ati, Abami makũmĩ alinda abatũbawa kwʼebikumo nʼamano wabo wʼobulume, mobasongya akalyo kabo omwisi wʼemesa yage. Ngoko nakola, Nyamuhanga abĩrĩnyĩtũhũlĩryako. Neryo mobamuleta eYerũsalema, mwaholerayo.

⁸Kandi abana ba Yũda mobabambira eYerũsalema, mobĩmyago, mobĩtago omo boya bwʼomũyalĩ, mobatĩmĩka omũyĩ gʼomo muliro.

⁹Nʼenyũma wʼaho, abana ba Yũda mobandagala nʼerilwa nʼAbakanana ababya bĩkere omo kihugo kyʼebitwa, nʼelutambi lwʼeyĩkwa, nʼeyĩbanda.

¹⁰Kandi Yũda mwayabambira Abakanana ababya bĩkere eHebũronĩ (nĩkwa erĩna lya Hebũronĩ erĩmbere lyabya Kĩrĩatĩarba); kandi mobĩta Sesaĩ, na Ahĩmanĩ, na Talmayĩ.

¹¹Nʼerĩlũa eyo, mwayabambira esyondũlanĩ syʼeDebĩrĩ. (Nĩkwa erĩna lya Debĩrĩ erĩmbere lyabya Kĩrĩatĩ-seferĩ.)

¹²Na Kalebũ mwabũga ati, Oyo wasyabambira eKĩrĩatĩ-seferĩ, nʼerĩĩmyago, nasyamuha Akĩsa mwali wage eribya mũkalĩ wuwe.

¹³Neryo Otĩnĩelĩ mugala wa Kenazĩ, mulumuna wa Kalebũ, mwĩmyago; neryo mwamuha Akĩsa mwali wuwe eribya mũkalĩ wuwe.

¹⁴Neryo, omugulu ahĩka ewuwe mwamwombomberya eriyasaba tata wuwe yʼeririma. Neryo mwakĩma oko punda yiwe, na Kalebũ mwamũbũlya ati, Ukasondakĩ kwehĩ?

¹⁵Naye mwamubwira ati, Umba omũyĩsa, kusangwa wabirimba ekihugo kyʼeLutambi lwʼeYĩkwa, umbe nʼesĩsoko syʼamagetsi. Na Kalebũ mwamuha esĩsoko syʼendata nʼesĩsoko syʼeyĩkwa.

¹⁶Kandi abana ba Mũkenĩ, bonde bwa Musa, mobahetuka erĩlũa oko mũyĩ wʼemiti yʼamabondo haguma nʼabana ba Yũda eriya omo mbwarara ya Yũda, eyiri eLutambi lwʼeYĩkwa lwʼeAradĩ; mobayayo erĩĩkala nʼabandu bayo.

¹⁷Na Yũda mwagenda na mugala wabo ye Sĩmeonĩ, mobĩta Abakanana ababya bĩkere eSefatĩ, mobaheryago kũndũ. Nʼerĩna lyʼomũyĩ oyo lyabya likahulwa mo Horma.

¹⁸Yũda mwĩmya eGaza haguma nʼekihugo kyago, nʼeAskelonĩ nʼekihugo kyago, nʼeEkronĩ nʼekihugo kyago.

¹⁹Neryo Omwami Mukulu mwabya haguma na Yũda; neryo mwahamba ekihugo kyʼebitwa; nĩkwa mwataluka erihiga esyondũlanĩ esyabya omo musya, kusangwa babya bawite esyogalĩ syʼebyuma.

²⁰Neryo mobaha Kalebũ eHebũronĩ, ngoko Musa abũga; naye mwahiga abagala basatu ba Anakĩ beyo.

²¹Nʼabana ba Benyamĩna mobatahiga Abayebũsĩ ababya bĩkere eYerũsalema; nĩkwa Abayebũsĩ bĩkere haguma nʼabana ba Benyamĩna eYerũsalema erĩhĩka mũnabwĩre.

²²Abʼekĩtũnga kya Yosefũ, nabo mobayabambira eBetelĩ; nʼOmwami Mukulu mwabya haguma nabo.

²³Nʼekĩtũnga kya Yosefũ mobatuma eriringa eBetelĩ. (Nĩkwa erĩna lyʼomũyĩ erĩmbere lyabya Lũzĩ.)

²⁴Kandi abalĩngĩ mobalola oko mundu akalũa omo mũyĩ, mobamubwira bati, Tukakusaba tuti, Ũtũkangaye obwingiriro bwʼeriingira omo mũyĩ, netu twasyakukola ndeke.

²⁵Naye mwakangyabo obwingiriro bwʼomũyĩ; neryo mobĩta omũyĩ omo boya bwʼomũyalĩ; nĩkwa mobabalya omundu oyo nʼekĩtũnga kiwe kyosĩ.

²⁶Nʼomundu oyo mwaya omo kihugo kyʼAbahĩtĩ, mwahĩmba omũyĩ, mwahula erĩna lyago mo Lũzĩ, erĩ nĩ rĩna lyago erĩhĩka na mũnabwĩre.

²⁷Na Manase mwatahũnga eBetĩ-seanĩ nʼehĩyĩ hyayo, kutse eTanakĩ nʼehĩyĩ hyayo, kutse esyondũlanĩ syʼeDorĩ nʼehĩyĩ hyayo, kutse esyondũlanĩ syʼeĨbleamũ nʼehĩyĩ hyayo, kutse esyondũlanĩ syʼeMĩgĩdo nʼehĩyĩ hyayo; nĩkwa Abakanana mobahatikana erĩĩkala omo kihugo ekyo.

²⁸Neryo omugulu Abaĩsraelĩ babana maka, mobakolesya Abakanana omũbĩrĩ wʼobukobe, mobatahigabo ndeke.

²⁹Na Efũraĩmũ mwatahiga Abakanana ababya bĩkere eGezerĩ; nĩkwa Abakanana mobĩkala eGezerĩ haguma nabo.

³⁰Zebũlonĩ mwatahiga esyondũlanĩ syʼeKĩtronĩ, kutse esyondũlanĩ syʼeNahalolĩ; nĩkwa Abakanana mobĩkala omo katĩkatĩ kabo, mobabya oko mũbĩrĩ wʼobukobe.

³¹Aserĩ mwatahiga esyondũlanĩ Ako, kutse esyondũlanĩ syʼeSĩdona, kutse esyʼeAlabũ, kutse esyʼeAkĩzĩbũ, kutse esyʼeHelba, kutse esyʼeAfika, kutse esyʼeRehobũ.

³²Litya Abaaserĩ mobĩkala omo katĩkatĩ kʼAbakanana, esyondũlanĩ syʼekihugo; kusangwa mobatahigabo.

³³Nafũtalĩ mwatahiga esyondũlanĩ syʼeBetĩ-semesĩ, kutse esyondũlanĩ syʼeBetĩ-anatĩ; nĩkwa mwĩkala omo katĩkatĩ kʼAbakanana, esyondũlanĩ syʼekihugo; nĩkwa esyondũlanĩ syʼeBetĩ-semesĩ nʼesyʼeBetĩ-anatĩ mobabya oko mũbĩrĩ wʼobukobe.

³⁴NʼAbaamorĩ mobahiga abana ba Danĩ erĩhĩka oko kihugo kyʼebitwa; kusangwa mobatalĩgĩrabo eriandagala omo musya;

³⁵nĩkwa Abaamorĩ mobahatikana erĩĩkala omo kitwa kyʼeHeresĩ, eAyalonĩ, nʼeSalabĩmũ; nĩkwa omugulu amaka wʼekĩtũnga kya Yosefũ asĩngana, Abaamorĩ mobabya bakobe.

³⁶Nʼomutano wʼAbaamorĩ abya atsũkĩre oko bwiruka bwa Akarabĩmũ erĩtsũka okwʼĩbwe, nʼerihetuka.