Read nande Abatswerĩ 13 Bible Online

Abatswerĩ 13 - nande bible

Abatswerĩ 13

¹Nʼabana ba Ĩsraelĩ mobaswakola ebibi omo meso wʼOmwami Mukulu; neryo Omwami Mukulu mwahĩrabo omo byala byʼAbafĩlĩstĩnĩ emyaka makũmĩ ani (40).

²Neryo habya mundu muguma wʼeSora, owʼekĩtũnga kyʼAbadanĩ, erĩna liwe lyabya Manoa; nʼomũkalĩ wuwe abya mugumba, mwatabuta.

³Neryo omũlaĩka wʼOmwami Mukulu mwahulukira omũkalĩ oyo, mwamubwira ati, Talebaya lino, uli mugumba sulibuta; nĩkwa wasyaheka obukule, nʼeributa omugala.

⁴Neryo lino Ũyĩtegaye, sũpũlaye ebĩnyũ kutse obũhĩre, kandi sulye kindu kĩtsandĩre nʼekike.

⁵Kusangwa, lebaya, wasyaheka obukule, nʼeributa omugala; nʼolugembe silwendisyakira omo mutwe wuwe; kusangwa omwana oyo asyabya Omũnazĩrĩ uku Nyamuhanga erĩtsũka omo nda, naye akandĩsyatsũka erĩlamya Abaĩsraelĩ omo byala byʼAbafĩlĩstĩnĩ.

⁶Neryo omũkalĩ mwasa mwabwira ĩba wuwe ati, Omundu wa Nyamuhanga mwakasa aho nyiri, obũsũ buwe bwabya ngʼobũsũ bwʼomũlaĩka wa Nyamuhanga wʼerĩũbahya kutsibu; nage mondamũbũlya ngʼakalũahi, kutse mwatambwira erĩna liwe.

⁷Nĩkwa mwambwira ati, Lebaya, wasyaheka obukule, nʼeributa omugala; na lino Sũsyepũlaya ebĩnyũ kutse ebĩhĩre, kandi sulye kindu ekĩtsandĩre; kusangwa omwana asyabya Ekihangwa kya Nyamuhanga erĩtsũka omo nda erĩhĩka oko kiro kyʼoluholo luwe.

⁸Neryo Manoa mwasaba Omwami Mukulu, ati, Uwe Mukama, ngakusaba, Uleke omundu wa Nyamuhanga oyo watuma ase kandi ũkwʼĩtwe, atũkangĩrĩraye ebyo twasyakolera omwana oyo wasyabutwa.

⁹Neryo Nyamuhanga mwahulikirira omulenge wa Manoa; nʼomũlaĩka wa Nyamuhanga mwasa kandi oko mũkalĩ omugulu abya ĩkere omwʼirima; nĩkwa Manoa ĩba wuwe isiali haguma naye.

¹⁰Nʼomũkalĩ oyo mwanguha, mwatibita, mwabwira ĩba wuwe, ati, Lebaya, omundu amambulukira, oyo wanyĩhĩkako ekiro kirya.

¹¹Neryo Manoa mwahangana mwakwama mũkalĩwe, mwahĩka oko mundu oyo, mwamũbũlya ati, Ni nawe omundu oyo wabũga nʼomũkalĩ kwehĩ? Naye mwabũga ati, Nĩna ngye.

¹²Neryo Manoa mwabũga ati, Lino ebĩnywa byawe bibererere; omwana oyo asyabya ati, twasyamukola tuti kwehĩ?

¹³Nʼomũlaĩka wʼOmwami Mukulu mwabũga na Manoa ati, Oko byosĩ ebyo nabwira omũkalĩ ayĩtegaye.

¹⁴Syasyerya oko kĩndũkĩ ekĩkalũa oko mũlĩkĩ wʼebĩnyũ, kutse syasyepũlaya ebĩnyũ kutse obũhĩre, kutse erirya ekĩndũkĩ ekĩtsandĩre; ategaye ebyosĩ ebyo namuhana.

¹⁵Na Manoa mwabũga nʼomũlaĩka wʼOmwami Mukulu, ati, Ngakusaba nyiti, Uleke tũkũtsĩmbaye, itwatoka erĩkũhũkĩra akahene.

¹⁶Nʼomũlaĩka wʼOmwami Mukulu mwabwira Manoa, ati, Nomo wanganyĩrĩndya, Sindiendirya akalyo kawe; kandi wamasonda erĩkokotya obuhere bwʼerĩokererya, litolere iwahongabo oko Mwami Mukulu. Kusangwa Manoa syabya asĩ kwʼabya mũlaĩka wʼOmwami Mukulu.

¹⁷Na Manoa mwabũlya omũlaĩka wʼOmwami Mukulu, ati, Erĩna lyawe uwendi neryo itwatoka erĩkũsĩkya omugulu ebĩnywa byawe bikabererera.

¹⁸Nʼomũlaĩka wʼOmwami Mukulu mwabũga ati, Busana nakĩ ũkabũlaya erĩna lyage kwehĩ? Kusangwa ni kyʼeriswekera.

¹⁹Neryo Manoa mwĩmya ekyana kyʼembene haguma nʼobuhere bwʼeyĩsyano, mwahongerabyo okwʼĩbwe oko Mwami Mukulu; nʼomũlaĩka mwakola ekyʼeriswekera omugulu Manoa na mũkalĩwe batungerera.

²⁰Kusangwa mokyabya omugulu ekirimi kyʼomuliro kyahetuka erilola elubula erĩlũa oko kiherero, omũlaĩka mwahetuka omo kirimi kyʼomuliro kyʼekiherero. Omugulu Manoa na mũkalĩwe batungerera ebĩ, mobawa nʼerĩtũlama ahisi oko kitaka.

²¹Nĩkwa omũlaĩka wʼOmwami Mukulu mwataswahulukira Manoa kutse uku mũkalĩwe. Neryo Manoa mwaminya kwʼalwe mũlaĩka wʼOmwami Mukulu.

²²Na Manoa mwabũga na mũkalĩwe, ati, Kwenene tukandihola, kusangwa twabirilola uku Nyamuhanga.

²³Nĩkwa omũkalĩ wuwe mwamubwira ati, Kumbe Omwami Mukulu alwe asĩmĩre erĩtwĩta, kumbe sĩangangĩrĩre obuhere bwʼerĩokererya nʼobuhere bwʼeyĩsyano omo byala byetu, kutse sĩangatũkangĩrye emyatsi yosĩ eyĩ, kutse sĩangatũbwĩre emyatsi ngʼeyĩ oko mugulu oyũ.

²⁴Neryo omũkalĩ oyo mwabuta omugala, mwahula erĩna liwe mo Samũsonĩ; nʼomwana oyo mwakula, kandi Omwami Mukulu mwamutsumula.

²⁵Neryo Omũlĩmũ wʼOmwami Mukulu mwatsũka erĩmũkolesya eMahane-danĩ, omo katĩkatĩ kʼeSora nʼeEstaolĩ.