Read nande Abatswerĩ 15 Bible Online

Abatswerĩ 15 - nande bible

Abatswerĩ 15

¹Nĩkwa enyũma wʼaho, oko mugulu wʼerigesa engano, Samũsonĩ mwayabana omũkalĩ wuwe mwamutwalira ekyana kyʼembene; kandi mwabũga ati, Ngandiya omo kisenge kyʼogʼomwage. Nĩkwa tata wʼomũkalĩ mwatalĩga akayamo.

²Neryo tata wuwe mwabũga ati, Kwenene monaganĩrya nyiti, wabirimupona kũndũ; kyaleka inamuha mũlĩkyenyũ; ko mwali wabo mulere si mubuya kwilaba ye kwehĩ? Ngakugonga abye wawe omo mwanya wʼogundi.

³Neryo Samũsonĩ mwabwirabo ati, Lero Sindiendisyabya oko lubanza lwʼAbafĩlĩstĩnĩ, omugulu ngakola bo nabi.

⁴Neryo Samũsonĩ mwayahamba esyoboha magana asatu (300). Kandi mwĩmya ebisosomole, neryo mwakũndĩkanĩa emikira yasyo kandi mwahĩra ekisosomole omo katĩkatĩ kʼobuli mikira ĩbĩrĩ.

⁵Neryo abere abĩakya omuliro oko bisosomole, mwalwĩkĩrasyo eriya omo ngano yʼAbafĩlĩstĩnĩ, mwahĩsya emiganda nʼengano eyabya ihangene, haguma nʼamalima wʼebĩnyũ nʼamalima wʼemĩzeĩtũnĩ nibya.

⁶Neryo Abafĩlĩstĩnĩ mobabũga bati, Nindi oyuliakola ekĩ kwehĩ? Nabo bati, Samũsonĩ, Omukwe wʼOmũtĩmũnĩ, oyo wĩmaya omũkalĩ wuwe nʼerimuha mũlĩkyabo. Neryo Abafĩlĩstĩnĩ mobahetukiraho, mobamũhĩsya na tata wuwe omo muliro.

⁷Na Samũsonĩ mwabũga nabo ati, Kusangwa mwamakola mutya, nage kwenene nasyabakĩsĩryako, nʼenyũma wʼaho inaleka.

⁸Neryo mwĩtabo mwagonyolerabo nʼekĩto kinene; neryo mwandagala mwĩkala omo mbatatanĩ yʼerĩbwe yʼeEtamũ.

⁹Neryo Abafĩlĩstĩnĩ mobahetuka, mobalalirira eYũda, mobayisanza eLehĩ.

¹⁰Nʼabandu bʼeYũda mobabũga bati, Busana nakĩ mukasa eritubambira kwehĩ? Nabo mobabũga bati, Twamahetukira eno eriboha Samũsonĩ, nʼerimukolera ngoko atukola.

¹¹Neryo abalume bʼeYũda elfu ĩsatu mobandagalira omo mbatatanĩ yʼerĩbwe lyʼeEtamũ, mobabwira Samũsonĩ, bati, Sĩwasĩ Abafĩlĩstĩnĩ ko bali batabalĩ betu kwehĩ? Ekĩ nĩkĩ ekyo wabiritukolera kwehĩ? Neryo mwabwirabo ati, Ngoko banyikola ko nabirikolabo nyitya.

¹²Nabo mobamubwira bati, Twamandagala erikuboha, itwatoka erĩkũhĩra omo byala byʼAbafilĩstĩnĩ. Na Samũsonĩ mwabwirabo ati, Mũnyĩlahĩrĩraye, muti simwendisyanyiwako ĩnywebene.

¹³Nabo mobamubwira bati, Iyihi; nĩkwa tukandikuboha ndeke, nʼerĩkũhĩra omo byala byabo; nĩkwa kwenene sĩtwendĩkwĩta. Neryo mobamukanika omo bikoba bibiri ebihya-bihya mobamũlũsya omo mbatatanĩ.

¹⁴Omugulu ahĩka eLehĩ Abafĩlĩstĩnĩ mobamũta obogo omugulu bahĩndana naye; neryo Omũlĩmũ wʼOmwami Mukulu mwamũhĩkako nʼamaka, nʼebikoba ebyabya oko maboko wuwe mobyabya ngʼebiti byʼekĩtanĩ ebiriahya omo muliro nʼamakũndĩkĩra wuwe mwatoga oko byala biwe.

¹⁵Kandi mwabana omukese mubisi wʼepunda, neryo mwasumba ebyala biwe mwahambago; kandi mwĩta mugo abandu elfu nguma.

¹⁶Neryo Samũsonĩ mwabũga ati, Omo mukese wʼepunda ebilundo endata oko bilundo, Omo mukese wʼepunda, nabĩrĩta abandu elfu nguma.

¹⁷Neryo, abere abibuga erĩbũga, mwagusa omukese owalwe omo byala biwe; nʼaho mohahulwa mo Ramatĩ-lehĩ.

¹⁸Neryo Samũsonĩ mwakwa enyota nene, mwalakira Omwami Mukulu ati, Uwe wabiriha omulamo munene oyũ omo byala byʼomugombe wawe; na lino ngandihola nʼenyota, nʼeriwa omo byala byʼabatabwene kwehĩ?

¹⁹Nĩkwa Nyamuhanga mwatula ekyũna omo Lehĩ, nʼamagetsi mwalũamo; naye abere abĩpũlya, ekĩrĩmũ kiwe mokyasuba, naye mwabyaho. Kyaleka inialuka erĩna lyaho mo Enĩhakore,[1] eyiri eLehĩ erĩhĩka mũnabwĩre.

²⁰Naye mwatswera Ĩsraelĩ omo biro byʼAbafĩlĩstĩnĩ myaka makũmĩ abiri.