Read nande Abatswerĩ 16 Bible Online

Abatswerĩ 16 - nande bible

Abatswerĩ 16

¹Kandi Samũsonĩ mwaya eGaza, mwalangirayo Omũmalaya, neryo mwaya omuwe.

²NʼAbanya Gaza mobabwirwa, ambu, Samũsonĩ abĩrĩhĩka eno. Neryo mobatĩmbaho, mobamulindirira omo kiro kyosĩ oko lũkyo lʼomũyĩ, mobabya bũkũtũ omo kiro kyosĩ, bati, Bwabya bwasesukala, ĩtwamwĩta.

³Na Samũsonĩ mwagotsera erĩhĩka omo katĩ-kanene kʼekiro, neryo mwabuka omo katĩ-kanene kʼekiro, mwahamba esyonyũyĩ syʼoko lũkyo lʼomũyĩ, nʼesyondũyĩ ĩbĩrĩ syasyo, kandi mwakulasyo, nʼengomo nʼebyosĩ, mwahĩrabyo oko bitigo biwe mwahekerasyo oko singi yʼekitwa ekiri eyisirya wʼeHebũronĩ.

⁴Neryo enyũma wʼaho mwanza omũkalĩ omo musya wʼeSorekĩ, erĩna liwe iyo Delĩla.

⁵Nʼabakama bʼAbafĩlĩstĩnĩ mobamũhĩkako, mobamubwira bati, Ũmũlembesanaye, Uminye ahakalũa amaka wuwe manene, nʼomuhanda twangatokamo erĩmũkĩnda, itwatoka erimuboha nʼerĩmwagalya; netu twasyakuha obuli muguma ũkwʼĩtwe ebĩtsĩpa elfu nguma nʼerĩgana.

⁶Neryo Delĩla mwabwira Samũsonĩ ati, Kĩsĩ-kĩsĩ umbwire ahakalũa amaka wawe manene, nʼekyo wangabohwamo nʼerĩkwagalya.

⁷Na Samũsonĩ mwamubwira ati, Bamamboha omo mĩrĩkĩ mibisi irinda eyĩtũmĩre, neryo bya molo-molo inabya ngʼogundi mundu.

⁸Neryo abakama bʼAbafĩlĩstĩnĩ mobamuletera emĩrĩkĩ mibisi irinda eyĩtũmĩre, naye mwamuboha muyo.

⁹Neryo abya nʼabandu abakalĩmbaya ĩbanĩkere omo kisenge. Neryo Delĩla mwabũga naye ati, Samũsonĩ, Abafĩlĩstĩnĩ bamakwasira! Naye mwatwa emĩrĩkĩ eyo, ngʼakagohe kʼembũmba akakatwĩka omugulu kakatũla oko muliro. Neryo amaka wuwe mwataminyikala.

¹⁰Neryo Delĩla mwabwira Samũsonĩ ati, Lebaya, wabirindeba, wabirimbwira amabehĩ; kĩsĩ-kĩsĩ, umbwire, nga wangabohwa ũmũkĩ.

¹¹Naye mwamubwira ati, Bamanyiboha omo bikoba bihya-bihya ebite byakola omũbĩrĩ neryo nasyabya molo, inabya ngʼogundi mundu.

¹²Neryo Delĩla mwĩmya ebikoba bihyabihya, mwamuboha mubyo, neryo mwamubwira ati, Samũsonĩ, Abafĩlĩstĩnĩ bamakwasira! Nʼabakalĩmbaya babya bĩkere omo kisenge. Naye mwatwabyo oko maboko wuwe ngʼakahungyi.

¹³Neryo Delĩla mwabwira Samũsonĩ ati, Erĩhĩka lino wabirindeba nʼerimbwira amabehĩ; umbwire ebyo wangabohwamo. Naye mwamubwira ati, Wamaluka amasunzu alinda wʼesyonzwiri syage haguma nʼemĩlũkĩryo nʼeribohasyo omo ngyingyi, neryo nasyabya molo, nasyabya ngʼogundi mundu.

¹⁴Neryo omugulu Samũsonĩ agotsera, Delĩla mwĩmya amasunzu alinda wʼesyonzwiri siwe mwalukasyo mo mĩlũkĩryo, neryo mwabohayo oko ngyingyi, neryo mwabũga naye ati, Samũsonĩ, Abafĩlĩstĩnĩ bamakwasira! Nĩkwa Samũsonĩ mwabuka omo tũgotserĩ tuwe, mwakula engyingyi yʼomuti, nʼemĩlũ kĩryo.

¹⁵Neryo Delĩla mwabũga naye ati, Ũkabũga uti, Nyĩkwanzĩre, nʼomutima wawe isianyiriko kwehĩ? Esyongendo ĩsatu esĩ wamanyiteba isulitambwira ahakalũa amaka wawe manene.

¹⁶Neryo omugulu Delĩla amuhatikana obuli kiro omo bĩnywa biwe, nʼerĩmũtsotsererya, omutima wuwe mwagalwa erĩhĩka okwʼilwa.

¹⁷Neryo mwamubwira ebyosĩ ebyabya oko mutima wuwe, ati, Olugembe silulilwatakira omo mutwe wage, kusangwa nabiribya ekihangwa uku Nyamuhanga erĩtsũka omo nda ya koyo wage. Namasĩswa, neryo akagala kage kasyanyĩlũako, kandi nasyabya molo, inabya ngʼogundi mundu.

¹⁸Nʼomugulu Delĩla alangira ngoko abirimubwira ebyosĩ byʼomutima wuwe, mwatumira nʼeribirikira abakama bʼAbafĩlĩstĩnĩ, ati, Mwasire iguma, kusangwa abirimbwira ebyosĩ byʼomutima wuwe. Neryo abakama bʼAbafĩlĩstĩnĩ mobahetukira eyo ali, kandi mobaleta esyofranka omo byala byabo.

¹⁹Neryo mwamũgotserya oko marwĩ wuwe; kandi mwabirikira omundu, mwasĩsa amasunzu alinda omo mutwe wuwe; neryo mwatsũka erĩmwagalya, nʼamaka wuwe mwamũlũako.

²⁰Neryo Delĩla mwabũga, ati, Samũsonĩ, Abafĩlĩstĩnĩ bamakwasira! Naye mwabuka omo tũgotserĩ tuwe, mwabũga, ati, Ngandihuluka ngʼeyindi migulu, nʼerĩyĩkakya. Nĩkwa mwataminya ko Mwami Mukulu abĩrĩmũlũako.

²¹Neryo Abafĩlĩstĩnĩ mobamuhamba, mobamulola kwʼameso; mobamuleta eGaza mobamuboha omo mĩrĩkĩ yʼemiringa; kandi Samũsonĩ mwaswera engano omo ngomo.

²²Nĩkwa esyonzwiri syʼomutwe wuwe mosyatsũka erilasa kandi, enyũma wʼerĩsĩswa liwe.

²³Nʼabakama bʼAbafĩlĩstĩnĩ mobahĩndana haguma eriherera ehongo nene uku Dagonĩ nyamuhanga wabo, nʼeritsema; kusangwa babũga bati, nyamuhanga wetu abĩrĩhĩra Samũsonĩ enzĩgũ yetu, omo byala byetu.

²⁴Nʼomugulu abandu bamulolako, mobapipa nyamuhanga wabo; kusangwa babũga bati, Nyamuhanga wetu abĩrĩhĩra enzĩgũ yetu omo byala byetu, oyo waheraya ekihugo kyetu, nʼeriha bangi ũmwʼĩtwe.

²⁵Neryo omugulu emitima yabo yatsema, mobabũga bati, Mubirikire Samũsonĩ, atũsekaye. Neryo mobabirikira Samũsonĩ omo nyũmba yʼomũlĩkĩ; naye mwasekyabo. Kandi mobamũhĩra omo katĩkatĩ kʼesyondũyĩ syʼenyũmba.

²⁶Na Samũsonĩ mwabwira akalwana akabya kamuwite oko byala ati, Uleke nyimata-mate esyondũyĩ esĩsĩyĩkĩrĩre enyũmba, inatoka erĩyegemerya kusyo.

²⁷Nĩkwa enyũmba eyo yabya ĩyoswĩre mwʼabalume nʼabakalĩ; nʼabakama bosĩ bʼAbafĩlĩstĩnĩ babyaho; nʼabalume nʼabakalĩ nga elfu ĩsatu babya oko lutwe ibakasamalira Samũsonĩ kwʼakasekayabo.

²⁸Neryo Samũsonĩ mwalakira Omwami Mukulu, ati, Uwe Mwami Mukulu, kĩsĩ-kĩsĩ, unyibuke, kandi kĩsĩ-kĩsĩ umbe akagala engendo nguma eyĩ nyisa, uwe Nyamuhanga, inatoka erĩyĩkĩsĩrya ngendo nguma oko Bafĩlĩstĩnĩ busana nʼameso wage abiri.

²⁹Na Samũsonĩ mwahamba esyondũyĩ ĩbĩrĩ syʼomo katĩkatĩ esyabya sĩsĩyĩkĩrĩre enyũmba, mwayĩkakĩrya kusyo, enguma omo byala biwe byʼamali, nʼeyindi omo byala biwe byʼamalembe.

³⁰Neryo Samũsonĩ mwabũga, ati, Nyiholane nʼAbafĩlĩstĩnĩ. Neryo mũnamira oko maka wuwe gosĩ; nʼenyũmba moyaterera oko bakama, nʼoko bandu bosĩ ababya muyo. Neryo abaholĩ abo ĩta omo luholo luwe babya bangi kwilaba abo ĩta akineho.

³¹Neryo abagala babo nʼabʼekĩtũnga kyosĩ kya tata wuwe mobandagala, mobamwĩmya, mobamutwala, mobamuta, omo katĩkatĩ kʼeSora nʼeEstaolĩ omo mahero wa tata wuwe Manoa. Naye mwatswera Ĩsraelĩ oko myaka makũmĩ abiri.