Read nande Abatswerĩ 17 Bible Online

Abatswerĩ 17 - nande bible

Abatswerĩ 17

¹Kandi mohabya omundu wʼekihugo kyʼebitwa kya Efũraĩmũ erĩna liwe iyo Mĩka.

²Naye mwabũga na koyo wuwe ati, Ebĩtsĩpa elfu nguma nʼerĩgana liguma ebĩmĩbawa ukʼuwe ebyo watakira busana nabyo, kandi mowabũgakyo omo matwĩ wage, lebaya ebĩtsĩpa ebyo biri haguma nage; ĩngye nĩmayabyo. Neryo koyo wuwe mwabũga ati, Omwami Mukulu atsumule mugala wage.

³Neryo mwasũbũlĩrya nyĩnya wuwe ebĩtsĩpa elfu nguma nʼerĩgana; na koyo wuwe mwabũga ati, Kwenene nomo nangasolola ebĩtsĩpa oko Mwami Mukulu bĩkalũa omo byala byage busana nʼomugala wage eribatsa esanamu nʼeribamba kwʼebĩtsĩpa; na lino, ngandĩkũsũbũlĩryabyo.

⁴Kandi omugulu asũbũlĩraya nyĩnya yʼebĩtsĩpa ebyo, nyĩnya wuwe mwĩmya ebĩtsĩpa magana abiri, mwahabyo omũhesĩ wʼebĩtsĩpa, oyo wabatsa esanamu nʼeribamba kwʼebĩtsĩpa ebyo, mobyabya omo nyũmba ya Mĩka.

⁵Nʼomundu oyo ye Mĩka abya nʼenyũmba yʼesyonyamuhanga, kandi mwakokotya eefodĩ nʼesisumba, neryo mwasolola omuguma oko bagala buwe, eribya mũhererĩ wuwe.

⁶Oko biro ebyo isihali mwami omo Ĩsraelĩ; obuli mundu iniakakola ekyo amalangira nga kitunganene omo meso wuwe.

⁷Kandi mohabya omũlwana muguma wʼeBetelehemũ-Yũda, owʼekĩtũnga kya Yũda, oyo wabya Mũlawĩ; neryo abya akabungiraho.

⁸Nʼomundu oyo mwalũa oko mũyĩ, mwalũa eBetelehemũ-Yũda, eriyabungira aho angabana omwanya; neryo omo lugendo luwe mwahĩka oko kihugo kyʼebitwa kya Efũraĩmũ oko nyũmba ya Mĩka.

⁹Neryo Mĩka mwamũbũlya ati, Ũkalũa hahi kwehĩ? Naye mwamũsũbĩrya ati, Ĩngye indi Mũlawĩ wʼeBetelehemũ-Yũda, kandi ngabungira aho nangabana omwanya.

¹⁰Na Mĩka mwamubwira ati, Wĩkale nage, ubye tata nʼomũhererĩ wage, nage nasyakuha ebĩtsĩpa ĩkũmĩ obuli mwaka, nʼolukimba lwʼeriambala, nʼakalyo. NʼOmũlawĩ oyo mwingiramo.

¹¹Neryo Omũlawĩ mwasĩma erĩĩkala nʼomundu oyo; nʼomũlwana oyo mwabya busana naye ngʼomuguma wʼoko bagala buwe.

¹²Na Mĩka mwahigula Omũlawĩ oyo, nʼomũlwana oyo mwabya mũhererĩ wuwe, neryo mwĩkala omo nyũmba ya Mĩka.

¹³Neryo Mĩka mwabũga ati, Lino namaminya Omwami Mukulu kwʼasyaleka inakamaha, kusangwa ngwite Omũlawĩ eribya ngʼomũhererĩ.