Read nande Abatswerĩ 18 Bible Online

Abatswerĩ 18 - nande bible

Abatswerĩ 18

¹Oko biro ebyo isihali mwami omo Ĩsraelĩ; kandi omo biro ebyo, ekihanda kya Danĩ mobasonda omwandu wʼerĩĩkalamo; kusangwa erĩhĩka oko kiro ekyo omwandu isialitawirabo ngʼenzĩgalya omo katĩkatĩ kʼebihanda bya Ĩsraelĩ.

²Nʼabana ba Danĩ mobatuma abandu batanu omo kĩtũnga kyabo omo miganzo yabo yosĩ, abandu esyombangĩ, erĩlũa eSora, nʼerĩlũa eEstaolĩ, eriyalinga ekihugo, nʼerĩsondyakyo, kandi mobabũga nabo bati, Mugende, muyalinge ekihugo. Neryo mobahĩka oko kihugo kyʼebitwa kya Efũraĩmũ, oko nyũmba ya Mĩka, mobagotseraho.

³Nʼomugulu babya hakũhĩ nʼenyũmba ya Mĩka, mobaminyerera omulenge wʼomũlwana Mũlawĩ oyo; mobakitiraho, mobamũbũlya bati, Nindi wakuleta eno kwehĩ? Kandi ukakola hano hokĩ kwehĩ? Uli nakĩ hano kwehĩ?

⁴Naye mwabwirabo ati, Mĩka abirinyiyira atya nʼatya, kandi abirimba omũbĩrĩ, nage nabiribya mũhererĩ wuwe.

⁵Nabo mobamubwira, bati, Tukakusaba tuti ũtũbũlĩraye Nyamuhanga, itwatoka eriminya enzira yetu eyo tukayamo ngʼĩnatsũmwĩre.

⁶Nʼomũhererĩ mwabũga nabo ati, Mugende buholo; enzira eyo mukayamo Omwami Mukulu amasĩmayo.

⁷Neryo abandu batanu abo mobayigendera, mobahĩka eLaĩsĩ, mobalangira abandu ababyamo ĩbĩkere buholo, ngʼemibere yʼAbasĩdonĩ, ĩbĩkere bũkũtũ nʼobuholo; kusangwa sihabya mũtabalĩ omo kihugo, oyũkanũbayabo omo mwatsi, kandi ibali hali oko Basĩdonĩ, isibali nʼomwatsi oko bandi bandu.

⁸Kandi mobahĩka oko bagala babo eSora nʼeEstaolĩ. Nʼabagala babo mobabũlyabo bati, Mũtĩkĩ kwehĩ?

⁹Nabo mobabũga bati, Muhangane, tuyalwe nabo, kusangwa twabirilangira ekihugo, neryo lebaya, ni kibuya kũndũ. Nenyũ mukayihunira kwehĩ? Simubye eriamala busana nʼeriingira nʼerĩsĩgalya ekihugo.

¹⁰Omugulu mukayamo mwasyahĩka oko bandu batekene, nʼekihugo ni kinene; kusangwa Nyamuhanga abirihakyo omo byala byenyũ, ahate bwaga bwʼekindu nʼekiguma ekiri muna-kihugo.

¹¹Neryo mohahongoka bandu magana ndatu bakalũa omo kĩtũnga kya Danĩ, bakalũa eSora nʼeEstaolĩ ibanambite ebindu byʼamalwa.

¹²Neryo mobahetukirayo mobahanda endwiro eKĩrĩatĩ-yearĩmũ, eYũda. Kyaleka ibahulaho mo kilaliriro kya Danĩ erĩhĩka mũnabwĩre; lebaya, kiri ebwanga bwʼeyĩkwa wʼeKĩrĩatĩ-yearĩmũ.

¹³Kandi mobalabaho erĩhĩka oko kihugo kyʼebitwa kya Efũraĩmũ, mobahĩka oko nyũmba ya Mĩka.

¹⁴Neryo abalume batanu abayalinga ekihugo kyʼeLaĩsĩ mobasũbĩrya, mobabwira bagala babo, bati, Mũnasĩ omo manyũmba aya ngoko muli eefodĩ nʼeterafĩmũ, nʼesanamu eyĩbatsĩre, eyĩbambĩre kwʼebĩtsĩpa, kwehĩ? Neryo lino muminye ekyo mwangakola.

¹⁵Neryo mobakitiraho, mobahĩka oko nyũmba yʼomũlwana Mũlawĩ, ye nyũmba ya Mĩka, mobamũbũlya ngʼaneho ndeke.

¹⁶Nʼabalume magana ndatu abambite ebindu byʼamalwa; babya oko bana ba Danĩ mobahangana oko kyaswa kyʼoko lũkyo.

¹⁷Kandi abalume batanu abo abayalinga ekihugo mobahetuka mobingiramo, mobĩmya esanamu eyĩbatsĩre, eyĩbambĩre kwʼebĩtsĩpa nʼeefodĩ, nʼesisumba syʼenyũmba. Nʼomũhererĩ mwahangana oko kyaswa kyʼoko lũkyo haguma nʼabandu magana ndatu abambite ebindu byʼamalwa.

¹⁸Nʼomugulu abandu aba bingira omo nyũmba ya Mĩka, mobenda esanamu eyĩbatsĩre, eyĩbambĩre kwʼebĩtsĩpa nʼeefodĩ, nʼesisumba, omũhererĩ mwabũlyabo ati, Mukakolakĩ kwehĩ?

¹⁹Nabo mobamubwira bati, Uhune, ũhĩre ebyala byawe oko buno bwawe, wase netu, ubye tata wetu nʼomũhererĩ wetu. Ko lyowene kuwe eribya mũhererĩ oko nyũmba yʼomundu muguma, kutse eribya mũhererĩ busana nʼekihanda nʼekĩtũnga omo Ĩsraelĩ kwehĩ?

²⁰Nʼomutima wʼomũhererĩ mwatsema, neryo mwĩmya eefodĩ nʼesisumba syʼenyũmba nʼesanamu eyĩbatsĩre, eyĩbambĩre kwʼebĩtsĩpa, mwagenda omo katĩkatĩ kʼabandu.

²¹Neryo mobabũnũkala mobahongoka batya, kandi mobahĩra abana balere, nʼebihangulo nʼebindu embere syabo.

²²Nʼomugulu babya hali hake oko nyũmba ya Mĩka, abandu ababya omo manyũmba hakũhĩ nʼenyũmba ya Mĩka mobahĩndana haguma, mobakwamirira abandu ba Danĩ, mobahĩka kubo.

²³Mobabirikira oko bagala ba Danĩ. Neryo abagala ba Danĩ mobakeberabo mobabwira Mĩka, bati, Ũkwĩrekĩ, uti mũkahĩndana haguma kwehĩ?

²⁴Naye mwabũga ati, Mwabiriheka esyonyamuhanga syage esyo nakokotaya, nʼomũhererĩ, nenyũ momwayigendera, nage ngwitekĩ kwehĩ? Neryo mukambwira muti, Ũkwĩrekĩ kwehĩ?

²⁵Nʼabana ba Danĩ mobamubwira bati, Suleke omulenge wawe akogũbwa omo katĩkatĩ ketu, abalume bahitene bakasyakuwako, ĩwatalya engebe yawe, nʼesyongebe syʼekĩtũnga kyawe.

²⁶Nʼabana ba Danĩ mobayigendera; nʼomugulu Mĩka alangira ko bamũlabĩre omo maka, neryo mwabũnũkala mwasuba omo nyũmba yiwe.

²⁷Neryo mobĩmya ebyo Mĩka akokotaya, nʼomũhererĩ oyo abya naye, mobahĩka eLaĩsĩ, oko bandu abatekene nʼobuholo, mobĩtabo omo boya bwʼomũyalĩ mobahĩsya omũyĩ gʼomo muliro.

²⁸Kandi mohatabya mundu wʼerĩlamyabo kusangwa yabya hali oko Sĩdonĩ, kandi isibabegereneko nʼabandi bandu; nago abya omo musya owali hakũhĩ nʼeBetĩ-rehobũ. Kandi mobaswahĩmba omũyĩ oyo, mobĩkala mugo.

²⁹Kandi mobahula erĩna lyʼomũyĩ mo Danĩ ngʼerĩna lya Danĩ tata wabo, oyo wabutawa omo Ĩsraelĩ; nĩkwa erĩmbere erĩna lyʼomũyĩ oyo lyabya Laĩsĩ.

³⁰Nʼabagala ba Danĩ mobayisingikira esanamu yʼeribatsa eyo; na Yonatana, omugala wa Gersomĩ, mugala wa Manase, iye nʼabagala buwe babya abahererĩ oko kihanda kya Danĩ erĩhĩka oko kiro kyʼerĩhũngwa lyʼekihugo.

³¹Neryo mobakolera esanamu yʼeribatsa eyo Mĩka akokotaya, oko mugulu gosĩ enyũmba ya Nyamuhanga yabya eSĩlo.