Read nande Abatswerĩ 2 Bible Online

Abatswerĩ 2 - nande bible

Abatswerĩ 2

¹Nʼomũlaĩka wʼOmwami Mukulu mwahetuka akalũa eGĩlgalĩ erĩhĩka eBokĩmũ. Neryo mwabũga ati, Monaba-hetũkya erĩlũa eMĩsĩrĩ, nʼeribaleta omo kihugo ekyo nalahĩrĩraya abotata-kulu wenyũ; monabũga nyiti, Sĩndĩendĩsyatwa endagano yage nenyũ kera na kera.

²Nenyũ sĩmũsyehĩra endagano yenyũ haguma nʼesyondũlanĩ syʼekihugo kino; mwasyahĩmbũla ebiherero byabo. Nĩkwa simwetahulikirira omulenge wage; ekĩ ni kyahi ekyo mwamatakola kwehĩ?

³Kyaleka ĩnabũga nyiti, Sindiendisyahigabo embere syenyũ; nĩkwa basyababyako ngʼemisakisaki omo syonganga syenyũ, nʼesyonyamuhanga syabo syasyabya kitego busana nenyũ.

⁴Neryo, omugulu omũlaĩka wʼOmwami Mukulu abũga ebĩnywa ebĩ oko bana bosĩ ba Ĩsraelĩ, abandu mobasumba omulenge wabo mobalira.

⁵Kandi mobahula erĩna lyaho mo Bokĩmũ; kandi mobahongeraho Omwami Mukulu.

⁶Nĩkwa Yosũa abere abĩhongokya abandu, abana ba Ĩsraelĩ mobaya obuli mundu oko mwandu wuwe erĩsĩgalya ekihugo.

⁷Nʼabandu mobakolera Omwami Mukulu oko biro byosĩ bya Yosũa, nʼebiro byosĩ byʼabakulu abakota kwilaba Yosũa, abalola oko mũbĩrĩ munene gosĩ wʼOmwami Mukulu ogo akolera Ĩsraelĩ.

⁸Na Yosũa mugala wa Nũnĩ, omugombe wʼOmwami Mukulu, mwahola, iniawite myaka erĩgana nʼerĩkũmĩ.

⁹Neryo mobamuta omo kihugo kyʼomwandu wuwe eTĩmonatĩ-heresĩ, omo kihugo kyʼebitwa kya Efũraĩmũ, ebwanga bwʼeLutambi lwʼeNdata lwʼekitwa kyʼeGasĩ.

¹⁰Nʼolulengo losĩ olo molweya abĩse-kulu wabo; nʼolundi lulengo molwahangana enyũma syabo, abatabya basĩ Omwami Mukulu, kutse emĩbĩrĩ eyo akolera Ĩsraelĩ.

¹¹Kandi abana ba Ĩsraelĩ mobakola ekibi omo meso wʼOmwami Mukulu, mobakolera Baalĩ;

¹²kandi mobasĩganĩa Omwami Mukulu Nyamuhanga wʼabotata-kulu wabo oyo walũsayabo omo kihugo kyʼeMĩsĩrĩ, mobakwama esindi nyamuhanga syʼebihanda ebyabya bĩtĩmbĩre kubo, kandi mobũnama embere wasyo: mobagalĩranĩa Omwami Mukulu batya.

¹³Mobasĩganĩa Omwami Mukulu, mobakolera Baalĩ, na Astarotĩ.

¹⁴Nʼerihitana lyʼOmwami Mukulu molyagulumira oko Baĩsraelĩ, neryo mwahereryabo omo byala byʼabanyeyĩ abanyegabo; kandi mwagũlyabo omo byala byʼesyonzĩgũ syabo esĩtĩmbĩre kubo, kyaleka ibatatoka eriswahangana embere wʼesyonzĩgũ syabo.

¹⁵Ehosĩ baya, ebyala byʼOmwami Mukulu mobyalwa nabo, ngoko Mwami Mukulu abũga, kandi ngoko Mwami Mukulu alahĩrĩrayabo; neryo mobagalwa kutsibu.

¹⁶Kandi Omwami Mukulu mwahanganĩa abatswerĩ, abalamayabo omo byala byʼabandu abanyegabo.

¹⁷Kandi mobatahulikirira abatswerĩ babo; kusangwa mobaragana nʼesindi nyamuhanga, nʼerĩyũnamirasyo. Mobalũa lũba omo nzira eyo abotata-kulu wabo balenderamo erĩowa ebihano byʼOmwami Mukulu; mobatakola ngʼabotata-kulu wabo.

¹⁸Nʼomugulu Omwami Mukulu ahanganĩrayabo abatswerĩ, Omwami Mukulu mwabya haguma nʼomũtswerĩ oyo, nʼerĩlamyabo omo byala byʼesyonzĩgũ syabo ebiro byosĩ byʼomũtswerĩ oyo; kusangwa Omwami Mukulu mwaganyirabo busana nʼemĩsĩmbo yabo busana nʼabandu banũbayabo nʼerĩagalyabo.

¹⁹Nĩkwa omũtswerĩ abere abihola, mobasuba enyũma, mobakola nabi kwilaba abotata wabo, nʼerikwama esindi nyamuhanga nʼerikolerasyo nʼerĩyũnamirasyo; mobataleka emĩbĩrĩ yabo, kutse esyonzira syabo syʼobũtowa.

²⁰Neryo erihitana lyʼOmwami Mukulu molyagulumira oko Baĩsraelĩ ati, Kusangwa ekihanda ekĩ kyabĩrĩhalya oko ndagano yage eyo nahana abotata-kulu wabo, kandi mobatahulikirira omulenge wage.

²¹Erĩtsũka lino nage sindiendisyahiga nʼomuguma wʼebihanda ebyo embere syabo ebyo Yosũa asĩganaya omugulu ahola;

²²kandi inatoka erirenga Ĩsraelĩ yo mubyo, nga bakandĩsyateya enzira yʼOmwami Mukulu erirendera muyo, ngoko abotata-kulu wabo bategayayo, kutse eyihi.

²³Neryo Omwami Mukulu mwasĩganĩa ebihanda ebyo atya, butsira erihigabyo lũba, kandi mwatahĩrabyo omo byala bya Yosũa.