Read nande Abatswerĩ 20 Bible Online

Abatswerĩ 20 - nande bible

Abatswerĩ 20

¹Neryo abandu ba Ĩsraelĩ bosĩ mobahuluka oko Mwami Mukulu eMĩsĩpa, nʼendeko moyahĩndanĩbwa ngʼomundu muguma, erĩtsũka eDanĩ erĩhĩka eBerĩ-seba, haguma nʼekihugo kyʼeGĩleadĩ.

²Nʼabakulu bʼabandu bosĩ, abʼebihanda byosĩ bya Ĩsraelĩ, mobayĩkanganĩa omo ndeko yʼabandu ba Nyamuhanga, abasĩrĩkanĩ abakagenda omo bisando elfu magana ani (400,000) abaheka omũyalĩ.

³(Nĩkwa abandu ba Benyamĩna mobowa ngoko bagala ba Ĩsraelĩ bamahetukira eMĩsĩpa.) Nʼabagala ba Ĩsraelĩ mobabũga bati, Mutubwire, ebibi ebĩ byakoleka biti kwehĩ?

⁴NʼOmũlawĩ ĩba wʼomũkalĩ oyo wĩtawa mwasũbĩrya mwabũga ati, Monahĩkĩra eGĩbea ya Benyamĩna erilalirirayo, ĩngye nʼomũhwekĩ wage.

⁵Nʼabandu bʼeGĩbea mobanyibambira mobatĩmba oko nyũmba omo kiro busana nage. Mobaganĩrya erĩnyĩta; nĩkwa mobatsandya omũhwekĩ wage nʼamaka, kyaleka iniahola.

⁶Kandi monĩmya omũhwekĩ wage nʼerimugaba mo bihande-bihande, monamutuma omo kihugo kyosĩ kyʼomwandu wa Ĩsraelĩ; kusangwa babirikola omwatsi atĩsĩrĩre nʼowʼesĩsonĩ omo Ĩsraelĩ.

⁷Mũlebaye, ĩnywe bosĩ abana ba Ĩsraelĩ, ĩnywe bosĩ, Musohe, mulete erihana lyenyũ lyo hano.

⁸Neryo abandu bosĩ mobahangana ngʼomundu muguma, bati, Sihali nʼomuguma oyo wasyagenda omo hema yiwe, kandi sihali oyo wasyasuba nʼomuguma oko nyũmba yiwe.

⁹Nĩkwa twasyakola omwatsi muguma oyũ oko Gĩbea; twasyabambirago omwʼigereka.

¹⁰Twasyĩmya abandu ĩkũmĩ (10) omwʼĩgana (100) omo bihanda byosĩ bya Ĩsraelĩ; nʼerĩgana (100) omo elfu (1,000), na elfu nguma (1,000) omo elfu ĩkũmĩ (10,000), erienda akalyo busana nʼabandu, ibatoka erisuyirabo omugulu bakahĩka eGĩbea wa Benyamĩna, busana nʼemĩbĩrĩ yosĩ yʼesĩsonĩ babirikola omo Ĩsraelĩ.

¹¹Neryo abandu bosĩ ba Ĩsraelĩ mobahĩndana eribambira omũyĩ oyo, ibabiribohana haguma ngʼomundu muguma.

¹²Neryo ebihanda bya Ĩsraelĩ mobatuma abandu omo kihanda kyosĩ kya Benyamĩna, bati, Ekĩ ni kibi kyahi kyabĩrĩhĩka omo katĩkatĩ kenyũ kwehĩ?

¹³Neryo lino mũhũlũkaye abandu abo, abatswatswa, abali eGĩbea, itwatoka erĩĩtabo, nʼerĩlũsya ekibi ekĩ omo katĩkatĩ ka Ĩsraelĩ. Nĩkwa abandu ba Benyamĩna mobatalĩga erĩowa omulenge wʼabagala babo abana ba Ĩsraelĩ.

¹⁴Neryo abana ba Benyamĩna mobayĩhĩndanĩa haguma eGĩbea erĩlũa omo mĩyĩ, eriyalwa nʼabagala ba Ĩsraelĩ.

¹⁵Abagala ba Benyamĩna mobaganzwa ekiro ekyo abalũa omo mĩyĩ elfu makũmĩ abiri nʼendatu (26,000) abakaheka omũyalĩ, esyondũlanĩ syʼeGĩbea siteko, abaganzawa mo bandu magana alinda (700) abayisogawa.

¹⁶Omo katĩkatĩ kʼabandu bosĩ aba mohabya abalume abayisogawa magana alinda (700) abʼamalembe; obuli muguma iniakatoka erigusa erĩbwe oko luywiri bũtalabya.

¹⁷Nʼabalume ba Ĩsraelĩ, Ababenyamĩna bateko, mobaganzwa balume elfu magana ani (400,000) abakaheka emĩyalĩ; abosĩ aba babya bandu bʼamalwa.

¹⁸Neryo abagala ba Ĩsraelĩ mobahangana, mobahetukira eBetelĩ, mobabũlya Omwami Mukulu; mobabũga bati, Nindi wasyatsũka eriyalwa busana netu nʼabagala ba Benyamĩna kwehĩ? Neryo Omwami Mukulu mwabũga ati, Yũda atsũke.

¹⁹Nʼabana ba Ĩsraelĩ mobahangana omo ngyakya, mobahanda ekilaliriro busana nʼerilwa nʼeGĩbea.

²⁰Nʼabalume ba Ĩsraelĩ mobayalwa na Benyamĩna; nʼabalume ba Ĩsraelĩ mobategekanĩa amalwa eribambirabo eGĩbea.

²¹Neryo abagala ba Benyamĩna mobalũa eGĩbea mobalalika Abaĩsraelĩ oko kitaka oko kiro ekyo elfu makũmĩ abiri nʼĩbĩrĩ (22,000).

²²Kandi abandu, abalume bʼeĨsraelĩ mobasĩkya omutima wabo, kandi mobategekanĩa amalwa aho bayĩtegekanĩraya ekiro kyʼerĩtsũka.

²³Kandi abana ba Ĩsraelĩ mobahetuka eriyalirira embere syʼOmwami Mukulu erĩhĩka omwʼĩgolo-golo; kandĩ mobabũlya Omwami Mukulu bati, Tunagende kandi oko malwa nʼabagala ba Benyamĩna mugala wetu kwehĩ? Neryo Omwami Mukulu mwabũga ati, Uyalwe naye.

²⁴Neryo abagala ba Ĩsraelĩ mobasegera hakũhĩ eribambira bagala ba Benyamĩna ekiro kyʼakabiri.

²⁵Na Benyamĩna mwahuluka erĩlũa eGĩbea eriyalwa nabo oko kiro kyʼakabiri, mwalalikabo kandi oko kitaka omo bana ba Ĩsraelĩ elfu erĩkũmĩ nʼomunani (18,000); abandu bosĩ aba babya bakaheka emĩyalĩ.

²⁶Neryo abana ba Ĩsraelĩ bosĩ, nʼabandu bosĩ mobahetuka erĩhĩka eBetelĩ, mobalira, mobĩkalaho embere syʼOmwami Mukulu, mobatsira akalyo ekiro ekyo erĩhĩka omwʼĩgolo-golo; mobahonga amahere wʼerĩokererya nʼamahere wʼobuholo embere syʼOmwami Mukulu.

²⁷Nʼabagala ba Ĩsraelĩ mobabũlya Omwami Mukulu (kusangwa erĩsandũko lyʼendagano ya Nyamuhanga lyabyaho oko biro ebyo;

²⁸na Fĩnehasĩ, omugala wa Eleazarĩ, omugala wa Harũnĩ, mwimana embere walyo oko biro ebyo) bati, Nyinahongoke kandi eriyalwa nʼabagala ba Benyamĩna omugala wetu, kutse nyũmbaye kwehĩ? Omwami Mukulu mwabũga ati, Hetuka; kusangwa omo ngyakya nasyamũhĩra omo byala byawe.

²⁹Neryo Ĩsraelĩ mwahĩra abalĩmbya erĩtĩmba oko Gĩbea.

³⁰Nʼoko kiro kyʼebisatu abagala ba Ĩsraelĩ mobabambira abagala ba Benyamĩna, mobayĩtegekanĩa erilwa nʼeGĩbea, ngʼeyindi migulu.

³¹Nʼabagala ba Benyamĩna mobahongoka eriyalwa nʼabandu, kandi mobakurirwa hali oko mũyĩ; mobatsũka erĩswĩrya nʼerĩĩta abalume oko bandu ngʼeyindi migulu, omo syombalu, enguma ya kusyo yikahetukira eBetelĩ, nʼeyindi eyikaya eGĩbea, nʼomolĩ, nga balume makũmĩ asatu (30) ba Ĩsraelĩ.

³²Nʼabagala ba Benyamĩna mobabũga bati, Bamawa embere syetu ngʼerĩmbere. Nĩkwa abagala ba Ĩsraelĩ mobabũga bati, Tusage, nʼerikurira bo hali oko mũyĩ omo mbalu.

³³Neryo abalume bosĩ ba Ĩsraelĩ mobahangana omo mwanya wabo, mobayĩtegekanĩa eBaalĩ-tamarĩ; nʼabalĩmbya bʼAbaĩsraelĩ mobalũa omo bibuti byabo, eMaaregeba.

³⁴Neryo omugulu babambira Gĩbea abalume elfu ĩkũmĩ (10,000) abayisogawa omo Ĩsraelĩ yosĩ, amalwa mwakala; nĩkwa Benyamĩna sibabya basĩ ngoko erĩkwa lyabya hakũhĩ nabo.

³⁵NʼOmwami Mukulu mwĩta Benyamĩna embere sya Ĩsraelĩ; kyaleka abagala ba Ĩsraelĩ ĩbĩta omo Babenyamina ekiro ekyo elfu makũmĩ abiri nʼĩtanu nʼerĩgana (25,100), abosĩ aba babya abakaheka emĩyalĩ.

³⁶Neryo abagala ba Benyamĩna mobalangira ngoko babĩrĩkĩndwa, omugulu abalume ba Ĩsraelĩ bahigukalira Benyamĩna, kusangwa bayiketera abalĩmbya abo bahĩra eribambira eGĩbea.

³⁷Neryo abalĩmbya mobanguha, mobagulukira eGĩbea; nʼabalĩmbya mobayitwalaho mobĩta omũyĩ gosĩ omo boya bʼomũyalĩ.

³⁸Neryo ekiminyikalo ekyalaganawa omo katĩkatĩ kʼabalume ba Ĩsraelĩ nʼabalĩmbya, kyabya kiti batũmbaye ekĩtũ kinene kyʼomũkĩ ekikahetuka erĩlũa omo mũyĩ.

³⁹Neryo abalume ba Ĩsraelĩ mobabũnũkala omo malwa, nʼAbabenyamĩna mobatsũka erĩswĩrya nʼerĩĩta abalume ba Ĩsraelĩ nga balume kũmĩ asatu; kusangwa babũga bati, Kwenene babĩrĩkĩndwa ahisi embere syetu, ngʼendwiro yʼerĩmbere.

⁴⁰Nĩkwa omugulu ekyũkĩ kyatsũka ngʼekĩtũ erihetuka erĩlũa omo mũyĩ, Ababenyamĩna mobasamalira enyũma syabo; neryo lebaya, omũyĩ gosĩ mwalola endata omo mũkĩ.

⁴¹Nʼabalume ba Ĩsraelĩ mobabũnũkala, nʼabalume ba Benyamĩna mobagasama; kusangwa balangira erĩkwa ko lyabya hakũhĩ nabo.

⁴²Neryo, mobalolya emigongo yabo oko balume ba Ĩsraelĩ erilola ebwanga bwʼembwarara; nĩkwa amalwa mwatangabo; kandi abalũa omo mĩyĩ mobĩtĩrabo omo katĩkatĩ kabo.

⁴³Mobatĩmba oko Babenyamĩna oko mbande syosĩ, mobakwamirirabo butaluhuka nʼeriryatangirirabo eyisirya wʼeGĩbea eyo eryuba likasira.

⁴⁴Litya abalume elfu ĩkũmĩ nʼomunani (18,000) ba Benyamĩna mobawa; abosĩ aba babya esyombangĩ.

⁴⁵Abandi mobabũnũkala mobatibita ebwanga bwʼembwarara okwʼĩbwe lyʼeRĩmonĩ; nĩkwa mobahamba kubo omo syombalu abalume elfu ĩtanu (5,000), nʼeritangabo eGĩdomĩ, mobĩta abalume ba kubo elfu ĩbĩrĩ (2,000).

⁴⁶Neryo abosĩ ba Benyamĩna abawa ekiro ekyo babya elfu makũmĩ abiri nʼĩtanu (25,000) abalume abakaheka emĩyalĩ; abosĩ aba babya mbangĩ syʼamalwa.

⁴⁷Nĩkwa abalume magana ndatu mobabũnũkala mobatibita omo mbwarara okwʼĩbwe lyʼeRĩmonĩ, mobĩkala omwʼĩbwe lyʼeRĩmonĩ emikera ĩnĩ.

⁴⁸Nʼabalume ba Ĩsraelĩ mobabũnũkala erilwa nʼabagala ba Benyamĩna mobĩtabo omo boya bʼomũyalĩ, omũyĩ gosĩ nʼebihangulo byʼesyonde nʼebyosĩ ebyo babana; nʼemĩyĩ yosĩ babana mobahĩsyayo omo muliro.