Read nande Abatswerĩ 5 Bible Online

Abatswerĩ 5 - nande bible

Abatswerĩ 5

¹Neryo Debora na Baraka mugala wa Abĩnoamũ mobimba ekiro ekyo bati,

²Kusangwa abasondolĩ mobasondola eĨsraelĩ, Kusangwa abandu mobayiha nʼomũhwa, Omwami Mukulu abane eripipwa!

³Muhulikirire, ĩnywe bami; Mutege okũtũ, ĩnywe batabalĩ, Ĩngye, nĩna ngye, nasyimbira Omwami Mukulu; Nasyimba eripipa oko Mwami Mukulu, Nyamuhanga wa Ĩsraelĩ

⁴Omwami Mukulu, omugulu walũa eSeĩrĩ, Omugulu wagenda erĩlũa omwʼirima lyʼeEdomũ, Ekihugo mokyatitimana, olubula molwawĩsya embũla. Ega, ebĩtũ mobyawĩsya amagetsi.

⁵Ebitwa mobyasũkana embere syʼOmwami Mukulu, NʼeSĩnaĩ embere syʼOmwami Mukulu, Nyamuhanga wa Ĩsraelĩ.

⁶Omo biro bya Samũgarĩ omugala wa Anatĩ, Omo biro bya Yaelĩ, esyonzira nene mositalabwamo, Nʼabagendĩ mobalaba omo nzira syʼemikito.

⁷Abatabalĩ mobũmbya omo Ĩsraelĩ, ega mobũmbya, Erĩhĩka aho nahanganira, ĩngye, Debora, Aho nahanganira mo nyĩnya, omo Ĩsraelĩ.

⁸Mobayisoga esyonyamuhanga nyihyanyihya; Neryo mohabya amalwa omo syongyo. Mohatabya engabo kutse erĩtũmo ebikalolawako Omo katĩkatĩ kʼamaelfu makũmĩ ani omo Ĩsraelĩ.

⁹Omutima wage alolere oko batabalĩ ba Ĩsraelĩ. Abayiha omo lwanzo omo katĩkatĩ kʼabandu, Omwami Mukulu abane eripipwa.

¹⁰Mũtũlego, ĩnywe mũhekĩrwe nʼesyopunda nyeru-nyeru. Ĩnywe mwĩkere oko mikeka eyʼobũgũlĩ bunene, Ĩnywe mukalendera omo nzira—mwimbe!

¹¹Oko mirenge yʼabandu abakasolola ebihangulo ahali amagetsi, Aho basyagambuliraho emĩbĩrĩ yitunganene yʼOmwami Mukulu Ye mĩbĩrĩ itunganene busana nʼabagunda buwe omo Ĩsraelĩ. Neryo abandu bʼOmwami Mukulu mobakĩma oko syongyo.

¹²Debora, ubuke, ubuke; Ubuke, ubuke, wimbe Olwimbo. Baraka, uhangane, utwale abanyegawa bawe, uwe mugala wa Abĩnoamũ.

¹³Neryo abandu abasĩgala mobandagalira abakulu; Abandu bʼOmwami Mukulu mobandagala busana nage ngʼabandu bʼamalwa.

¹⁴Erĩlũa eEfũraĩmũ ababutirawa eAmaleke mobandagala, Enyũma kuwe Benyamĩna, omo bandu bawe; Erĩlũa eMakĩrĩ abatabalĩ mobandagala, Nʼerĩlũa eZebũlonĩ abakahamba omũtso wʼomũsondolĩ.

¹⁵Nʼabanya-mwami ba Ĩsakarĩ babya haguma na Debora; Ngoko Ĩsakarĩ abya, Baraka naye kwʼabya atya; Omo musya mobanguha erihuluka oko bisando biwe. Omo magabo wa Rũbenĩ Mohabya erĩyĩsũnza lĩnene lyʼomutima.

¹⁶Busana nakĩ wĩkere omo katĩkatĩ kʼebĩyĩte byʼesyombũlĩ, Erĩowa esyonyamulera busana nʼebihangulo kwehĩ? Oko magabo wa Rũbenĩ Habya erisonda-sondya lĩnene lyʼomutima.

¹⁷Gileadĩ mwikala eyisirya wʼeYorodanĩ. Na Danĩ, busana nakĩ mwasĩgala omo mato kwehĩ? Aserĩ mwĩkala bũkũtũ oko mũsĩke wʼengetsi, Kandi mwĩkala oko hʼerĩĩkya liwe.

¹⁸Zebũlonĩ babya bandu abatsama esyongebe syabo okwʼihola, Na Nafũtalĩ nibya ahʼendata hʼomolĩ.

¹⁹Abami mobasa mobalwa; Nʼabami bʼeKanana mobalwira EEtanakĩ hakũhĩ nʼamagetsi wʼeMĩgĩdo. Mobatahamba obunyegwa omo bĩtsĩpa.

²⁰Erĩlũa elubula esyongũnũnũ mosyalwa, Mosyalwa na Sĩsera omo nzira syasyo.

²¹Olũsĩ lwʼeKĩsonĩ molwatwalabo, Olũsĩ lwa kera olo, olũsĩ lwʼeKĩsonĩ. Omutima wage, kwamirira omo maka.

²²Neryo ebigere byʼesyosabayĩrĩ mobyalyatanga Busana nʼerihala-hala, Erihala-hala lyʼesyosabayĩrĩ syʼamaka.

²³Omũlaĩka wʼOmwami Mukulu ati, Mutakire Merozĩ, Mutakire erĩkalĩre esyondũlanĩ syako, Kusangwa mobatahĩka erĩwatĩkya Omwami Mukulu, Erĩwatĩkya Omwami Mukulu eribambira abalwĩ.

²⁴Yaelĩ nĩ wʼomũyĩsa kwilaba abakalĩ, Omũkalĩ wa Heberĩ Omũkenĩ; Nĩ wʼomũyĩsa kwilaba bakalĩ omo hema.

²⁵Mwasaba amagetsi, naye mwamuha amasabũ; Mwamuletera amagũta gʼomo kibindi kyʼobukama.

²⁶Mwahĩra ebyala biwe oko ngyingyi yʼehema, Nʼebyala biwe byʼamali oko nyondo yʼomũkolĩ; Nʼomo nyondo mwĩta Sĩsera, mwahũrũnganĩayo omo mutwe wuwe; Ega, mwatobola mwahũrũnganĩayo omo masakira wuwe.

²⁷Mũnamira oko bisando biwe, mwawa, mwalambukala; Mũnamira oko bisando biwe, mwawa. Nʼaho ũnamira, ha awira nʼerihola.

²⁸Mwaleberya omwʼĩdĩrĩsa, mwalira, Ye nyĩnya wa Sĩsera mwalirira omwʼĩdĩrĩsa, Nĩkĩ kyo kyalekĩre egalĩ yiwe ĩtahĩka kwehĩ? Busana nakĩ ebĩrĩngo byʼegalĩ yiwe sibyetanguha kwehĩ?

²⁹Abakalĩ buwe bʼamenge bangamũsũbĩrya, Ega, mwayĩsũbĩrya ebĩnywa ebyo ati,

³⁰Sibetabanabyo, sibetagaba ebyanyegawa kwehĩ? Omwana-muto, abana-bato babiri oko buli mundu wʼamalwa; Ebinyego byʼesyongimba miringomiringo busana na Sĩsera, Ebinyego byʼolukimba lwʼerangĩ olũsonĩre, Ebinyego byʼesyongimba esĩtsotsĩre oko mbande ĩbĩrĩ, Oko bĩkya byʼoyũkahũnga kwehĩ?

³¹Esyonzĩgũ syawe syosĩ sihere sitya, uwe Mwami Mukulu, Nĩkwa abakamwanza babye ngʼeryuba omugulu likahuluka nʼamaka walyo. Nʼekihugo mokyahumula emyaka makũmĩ ani.